Vhadzulapo vha vhupo ha Mavambe, Ghandhlani, ngei Malamulele vho sinyuswa nga uvha na ṱhahelelo ya maḓi lwa tshifhinga tshi swikaho nwedzi he vha swika kha u vala vhupo hune havha na nḓisedzo ya maḓi ha Malamulele Water Treatment Scheme. Izwo zwo bvelela nga ḽa fumbili Lara.

Vhadzulapo vha Magangeni nnḓa ha Tshitandani vha tshe vho akhamaszwa nga tshiwo tshe tsha bvelela nga matsheloni a Lavhuna ḽa fumbili-raru kusini uko, hu tshi wanala lushie tsini na damu ḽa Lemana. Mudzulapo wa afho Magangeni vhari vhovha vha khou tshimbila musi vha tshi ṱangana na mmbwa i tshi khou kukuna rambo ḽa zwine zwa vhonala hu nama, nga u sendela tsini vha tshi ṱoḓa u vhona uri ndi namaḓe, vha tou akhamadzwa lwe vha ṱoḓa u khauwa mbilu nga u vhona uri ndi lushie.

Ramuzika wa muzika wa rege na gospel Rofhiwa Nethwadzi o anḓadza aḽibamu yawe ya vhuvhili ye yavha yo lindelwa nga vhanzhi, ine ya vhidzwa Ndi nne onoula nga Mugivhela wa ḽa fumbili-ṱhanu Ḽara. Aḽibamu iyo ina nyimbo dza fumi-raru, na mbili dza u inga nga nṱha. Rofhiwa ane avha na minwaha ya furaru-raru o bebwa kusini kwa Tshiheni, he a fhedza o pfulutshela Tshirenzheni, ngei Nzhelele. Zwa muzika khae ndi zwine a ita nga tshifhinga tsha uḓi mbvumbvusa sa izwi a tshi shuma kha muhasho wa mulayo sa Paralegal vunḓuni ḽa Gauteng.

Uvha hone ha mufhiso wo kalulaho kha zwipiḓa zwinzhi zwa shango, ho katelwa na vhupo ha Vhembe, vhathu vhanzhi vha khou vhonala vha khouya madamuni na milamboni u fhungudza mufhiso zwine zwavha nḓila dzo ḓoweleaho, zwihulu kha vhupo ha mahayani.

Vha muṱa wa ha Chauke ngei Dopeni, Nzhelele vha tshe vho akhamadzwa na uḓi vhudzisa mbudziso nnzhi dzisina phindulo nga murahu ha u thuntshwa ha vhulawa muraḓo wa muṱa wavho nga Ḽavhuṱanu, ḽa fumi-sumbe Ḽara.

Muloro wa  Issac Modipa a bvaho Tshiozwi, wa uvha mulugisi wa zwiendedzi, u vhonala wo wedza. Issac a tshi aluwa ovha o tama uvha mulugisi na u bveledza zwiendedzi nga nḓila yawe. Fhedzi nga u shaya masheleni hayani, izwo zwo konḓa uri a wedze muloro wawe. O touvha mashudu a tshi swika kha u shumisa dzi ḓaraṱa u bveledza zwishumiswa, zwine a rengisa na u kunga vhathu ngazwo hayani hawe.

Mutsila Bono Dzivhani a bvaho Tshivhulani, nnḓa ha Sibasa, u vhonala o wana nḓila ya u ḓi fhodza kha tshenzhemo i konḓaho ye a ṱangana nayo sa mupondiwa we a tshipiwa minwaha mivhili yo fhiraho. U tshipiwa zwo mu sia na mbonzhe muvhilini na muyani. Bono u shumisa vhupfiwa hawe u bveledza vhutsila, na u ṱahisa uri vhutsila vhu a kona u thusa muthu u fhola kha zwine a khou ṱangana nazwo.

U phaḓaladzwa ha mafhungo asi one kha zwileludzi zwa vhudavhidzani, azwi siki nḓaḓo fhedzi kha vhathu, zwi dovha hafhu zwa vhaisa vha kwameaho nga mafhungo ayo asi one. U phaḓaladzwa ha mafhungo asi one zwi kwamaho musidzanyana we a ḓo tambudza munwe mugudiswa ngae ngei tshikoloni tsha Mbilwi minwaha mivhili yo fhiraho, o fhedza oḓi haṱula vhutshilo.

Nyalunako e a dzhenelela muṱaṱisano wa vhonyalunako wa Miss Teen Afrika Tshipembe, Tshepiso Mphidi a bvaho Haradali, uri vhasidzanyana vha fanela u ṱutshela zwa uvha na vhushaka ha u funana na vhathu vhahulwane vhane vha vhidzwa “Sugar daddy” zwine zwavha zwo vhangiwa nga mutsiko wa u ṱoḓa u fana na ṱhama dzavho. Uri ndi khwine u vha vhona vho sedzana na pfunzo dzavho uri vha kone uḓi fhaṱela vhumatshelo havhuḓi. Muṱaṱisano wa Miss Teen Afrika Tshipembe u ḓo farelwa State Theatre ngei Pretoria nga ḽa fumi-rathi Nyendavhusiku ṅwaha uno.

Muhashi wa Phalaphala FM ane a dovha avha muṱuṱuwedzi kha vhudavhidzani ha TikTok Mutsitselwa Mureri u khou ḓi sikela dzina kha nḓowetshumo ya maṅwalo. Mutsitselwa o pfufhiwa kha pfufho dza Book Behind kha tshiteṅwa tsha bugu ya khwine ya luambo lwa Tshivenda. Idzo ndi pfufho dzine vha dzhiela nṱha vhaṅwali vhane vha shumisa nyambo dza ḓamuni dzofhambanaho. Pfufho yawe ndi ya kha bugu yawe ya Mbuno dza Lufuno. Vhuṱambo ha pfufho ho farelwa ngei Pietermaritzburg nga Mugivhela wa ḽa fumi-na-thihi, dze havha hu khou tou khethwa vhathu nga tshitshavha.

Kha dziṅwe dza dzi khuḓano dza miṱa ya musanda, ndi u bviswa ha Thovhele vha vhupo ha Dzanani khala Nzhelele.

Kha tshiwo tshe tsha mangadza vhadzulapo na u sia vhanzhi vhe na dzi mbudziso u fhira dzi phindulo, ndi musi munna wa pholisa we avha a khou kaidzelwa phosho ya radio o swika he a thuntsha a huvhadza mune wa fhethu hune a dzula hone. Tshiwo tsho bvelela nga Musumbuluwo ngei Makwarela, tsini na Sibasa.

Mavhengele tserekano a Elim vha husumba honovha  tshivhilelana tsha u ṱangulwa nga mavemu, izwi ndi nga murahu ha tshiwo tshe tsha bvelela kha vhengele ḽa Ackermans nga Sondaha ya fumi-ṱahe. U ṱangulwa uho ho bvelelwa nga matsheloni nga awara ya vhufumi he vha ṱangula ṱhingokhwalwa dze dzisi bulwe tshivhalo.