Vho Makhadi vho khethwa sa muthusamudzulatshidulo wa Sanef

Ṱhalutshedzo nga Khathutshelo Raliphaswa.

Muṅwe wa vhoramafhungo vha ṱhonifheaho Afrika Tshipembe, Vho Tshamano Makhadi, vho khethwa sa muthusa mudzulatshidulo vha foramu ya South African National Editors (sANEF) nga tshifhinga tsha dzulo ḽa ṅwaha na ṅwaha ḽe ḽa farelwa Johannesburg nga Mugivhela wa vhege yo fhiraho.

Vho Makhadi vhane vha bva kha ḽa Itsani kha tshiṱiriki tsha Vhembe, vha na minwaha ia paḓaho ya fumbili-sumbe vhe kha nḓowetshumo ya zwa Mafhungo. Nga nnḓa ha uvha murangaphanḓa kha Sanef lwa minwaha i hovhelelaho ya fumi, Vho Makhadi vho no shuma kha khamphani dza phuraivethe na dza muvhuso u fana na kha koporasi ya khasho ya ḽa Afrika Tshipembe (SABC) na yone eTV. Vho shuma sa mugudisi wa matshudeni na mulangi wa muhasho wa zwa budo la mafhungo na vhudavhidzani Tshwane Univesity of Technology (TUT) lwa minwaha ya fumi-sumbe yo fhiraho.

Kha nyambedzano na vha Limpopo Mirror nga Mugivhela, Vho Makhadi vho amba zwauri vhone zwavhuḓivhuḓi vho bebelwa Haramantsha, kha muvhundu wa Sinthumule. He vha muṱa wavho vha ḓou pfulutshela Itsani nnḓa nyana ha Ṱhohoyanḓou he vha ḓou alutshela hone.

Vho Makhadi vhovha muṅwe wa vhoramafhungo vhe vhavha na tshikhala tsha uvha na nyambedzano na madzhakanḓila vha Afrika Tshipembe vhe vha lwela mbofholowo, Vho Nelson Rholihlahla ‘Madiba’ Mandela na vhone Vho Walter Sisulu, kha mishumo yavho vhe kha zwa thelevishini. Vho shuma kha mafhungo a zwa polotiki ha SABC Radio vhe na vhaṅwe vhoramafhungo vha ṱhonifheaho, vha tshi ṅwala nga ha zwine zwa itea u mona na ḽifhasi . Vho dovha muraḓo wa eTV ngei Johannesburg vha sa athu u iswa Cape Town nga murahu vha iswa KwaZulu Natal.

Vho Makhadi vhovha muraḓo wa bodo ya Sanef nga ṅwaha wa 2015. Vha khethwa sa mudzulatshidulo wa komiti ya zwa pfunzo na pfumbudzo luraru vha sa athu u khethwa sa mufaragwama wa dzangano hone zwa zwino vha muthusa  mudzulatshidulo afho Sanef. Tshikhala tshiṅwe na tshiṅwe tshovha tsha minwaha mivhili, hone vho thusa u alusa zwa masheleni a Sanef.

Vho Makhadi vha tenda zwauri mbofholowo yavhoramafhungo ndi mbofholowo ya vhathu hone Sanef vha na mushumo wa u zwi bveledzwa. Vho Makhadi vha dovha hafhu vhavha muraḓo wa khoro ya nyanḓadzo ya Afrika Tshipembe na uvha muraḓo wa khoro ya zwa vhudavhidzani hoḓi imisaho nga hoṱhe ha Afrika.

Musi vha tshi vhudziswa uri vho zwi kona hani u alusa tshikwama tsha Sanef sa muthu ane ndi ramafhungo, vho amba zwauri lwa minwaha vhovha vhe na lutamo lwa uvha kha zwa masheleni, vha dovha hafhu vha livhuwa mufarisi wavho Vho Phathutshedzo Makhadi vhane vhavha chartered accountant na mulangi wa feme ya zwa dzi accounting, vhe vha vha nea thikhedzo na ngeletshedzo dzo teaho.

Kha maimo ane vhavha nao, vhari vhuyimo vhune vha vhu funesa ndi uvha khotsi. Vho Makhadi vha na vhana vhararu Mpho, Thendo na Tsiko Makhadi. Vha tenda khauri avha khotsi fhedzi kha vhana vhavho, vha dovha hafhu vha vha mueletshedzi khavho.

Date:26 July 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 156