Ho waniwa mmbwa dzo fa dzo shelelwa mulimo

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Mmbwa dza fumi-na-rathi dzo wanala dzo fa kusini kwa Mafukani tsini na Matavhela, zwine vhathu vha tenda uri dzovha dzo shelelwa mulimo.

Vho Thathani Tapela, muṅwe wa vhadzulapo vhevha wana mmbwa dzavho yo fa, vho ṱahisa zwauri zwiito izwi zwau shelela zwifuwo mulimo ndi kale zwi khou itea kha muvhundu uyo. Vho Tapela vho amba zwauri zwifuwo zwi fanaho na dzi mmbwa na dzi kholomo zwi khou shelelwa mulimo, hone vha ofha uri na vhone vhane vho tsireledzea naa, vhari vha na nyofho uri zwine zwa khou itwa kha zwifuwo zwi nga itwa na khavho sa muṋe wa zwifuwo.

Nga murahu hathoḓuluso nga ha u fa ha mmbwa yavho, Vho Tapela vho ḓou wana zwauri mmbwa tharu dzi sa ḓivhei uri dzi bva ngafhi dzo ṱhasela mbudzi ine yavha ya muṅwe mudzulapo kha muvhundu wavho vhege mbili dzo fhiraho. Mune wa mbudzi iyo, o sinyuswa nga tshiwo itsho, o ḓou dzhia mbudzi yawe yo faho a ṱuwa nayo hayani a ita nau shushedza uri arali muṋe wa mmbwa idzo dzo ṱhaselaho mbudzi yawe hu ḓovha na masiandaitwa ane ha ngaḓo takadza vhathu. 

Zworalo, Vho Ndavha Rakhadani, mudzulapo vhane vha humbulelwa uri ndi vhone vhoshelaho tshanḓa kha tshiwo itshi, vho hanedza  uri ndi vhone vhe vha shelela mmbwa idzi mulimo dzafa. Vho amba zwauri ubva nga ṅwedzi wa Phando ṅwaha uno, ho fa mbudzi dzavho dza rathi dze dza ṱhaselwa nga dzi mmbwa, fhedzi ahuna na muthihi we a ḓa a dzhia vhuḓifhinduleli kha zwe zwa itea.

Vhamusanda Vho Nndileleni Nemafukani, vhane vhavha murangaphanḓa wa sialala kha kusi kwa Mafukani, vho khwaṱhisedza zwauri mmbwa dza fumi-na-rathi dzo wanala dzo fa maḓuvha o fhiraho, zwe zwa sia vhathu vha khou vhilaela. Vho amba zwauri vha khou ṱoḓulusa kha tshiwo itshi. U sinyuwa havho nau vhilaela ho ḓou nana musi hu tshi wanala kholomo ṱhanu dzo fa, zwine ha humbulelwa uri dzo tou shelelwa mulimo, hone zwa zwino ho wanala mmbwa idzi dza fumi-na-rathi dzo faho.

Ṅwedzi wo fhiraho, rabulasi kha muvhundu uyo wa Mafukani, Vho Nkhetheni Rakhadani, vho ita ṱhoho dza mafhungo musi vha tshi wana kholomo dzavho dzo fa.

Date:16 June 2024

By: Silas Nduvheni

Read: 128