ADVERTISEMENT:

 
 

Makhadzi, ramuzika a funwaho wa Vhembe, Venda Hamashamba, o swikelela ṋaledzi musi a tshi wana pfufho ya Black Entertainment Television (BET) 2024 nga Sondaha ya ḽa furaru Fulwi ngei Los Angeles, Carlifornia. Tshifanyiso tsho bveledzwa.

Makhadzi o wina kha pfufho dza BET 2024.

 

Tshiṱori nga Thembi Siaga. Ṱhalutshedzo nga Khathutshelo Raliphaswa.

Muṅwe wa ramuzika wa Vhembe adivheaho, Makhadzi o swikela ṋaledzi musi a tshi wana tshiphuga tsha pfufho dza Black Entertainment Television (BET) 2024 nga Sondaha ya ḽa furaru Fulwi ngei Los Angeles, Carlifornia.

Ramuzika uyu wa minwaha ya fumbili-malo, Ndivhudzannyi Ralivhona a bvaho Hamashamba tsini nnyana na Elim, ane a ḓivhea khwiṋe nga la Makhadzi kha nḓowetshumo ya muzika, ndi ane shango ḽa Afrika Tshipembe ḽa ḓi kukumusa ngae nga murahu ha u wana tshiphuga tshawe. Tshiphuga itshi o tshi newa kha tshiteṅwa tsha u khethwa nga vhaṱaleli: tsha mutsila muswa wa khwiṋe wau mona na ḽifhasi kha pfufho dza BET, he a kunda vhaṅwe vhatsila hu tshi katelwa ramuzika Tyler ICU na vhaṅwe vhatsila vha u mona na ḽifhasi.

U wina uhu ho ḓa nga tshifhinga tshavhuḓi kha Makhadzi sa izwi ovha a khou pembela minwaha yawe ya 28, zwe zwavha u pembela kavhili nga ha u bvelela hawe kha zwa zwa vhutsila na kha ene muṋe. Nga tshifhinga tsha vhuṱambo, o ḓi ṱukufhadza lwa vhudele musi a tshi ḽotsha lwa Tshivenḓa afho luvhanḓeni asa athu u ṱanganedza tshiphuga tshawe.

“Ndo takala vhukuma. Ndi muthu e nda thoma ndi tshi rengisa muzika wanga zwiṱaraṱani, namusi ndi fhano. Ndoro yanga yo wedza. Ndo fhelelwa nga maipfi, zwine nda nga amba ndi zwauri, ṅwana wa murema zwoṱhe zwia konadzea, hone iyi i touvha mpho ya khwine kha nṋe,” a amba.

Muimbi uyu hu pfala uri u koloda vha South African Revenue Services (SARS) masheleni a paḓaho R6.6 miḽiyoni, ine yo fhungudzwa uya kha R2.7 miḽiyoni nga ṅwedzi wa Nyendavhusiku ṅwaha wo fhiraho. Nga Musumbuluwo wa ḽau thoma Fulwana, kha nyambedzano na vha Podcast and Chill with MacG, Makhadzi o khwaṱhisedza uri izwo ndi ngoho asi mavharivhari fhedzi. O inga ngau amba zwauri o kombetshedzea u koloda masheleni uri a kone uya Los Angeles u dzhenelela vhuṱambo.

“Ndi khou ṱangana na zwinzhi, zwine asi tshiphiri. Ṅwedzi muṅwe na muṅwe, ndi salelwa ndi khou balelwa u ḓiphina nga tshelede ye nda shuma yone nga vhutsila hanga sa izwi ndi khou badela vha SARS. Kha nṋe uri ndi kone u ḓalela maṅwe mashango, ndi tou thoma nda koloda masheleni. Vhashumisani vhanga vha fanela u koloda masheleni vha tshi itela nṋe uri ndi kone u shumisa mabupho a nṱha sa izwi ndi muḓivhalea are na maimo,” a amba.

Makhadzi o wana milaedza ya umu fhululedza ubva kha vhathu vhanzhi, hu tshi katelwa na vha muhasho wa zwi mitambo, vhutsila na mvelele na miṅwe mimasipala. Muṅwe wa vhaṅwe hovha mulangavunḓu vha Limpopo, Dr Phophi Ramathuba vhane vha bva nae Hamashamba, vhe vha mu fhululedza zwihulu, vha tshi amba nga ha ipfi ḽawe ḽo khetheaho, mafulufulu awe na nḓila ine a mbvumbvusa vhathu u monna na lifhasi.

“Ri ḓi kukumusa nga Makhadzi na zwe a kona u swikelela hone ri fulufhela zwauri ri khaḓiḓo vhona zwinzhi khae. No shuma Makhadzi – nori ita vhathu sa vhadzulapo vha Limpopo na lushaka lwa Vhavenda ngau angaredza,” Vho Ramathuba vha amba.

 

Date:05 July 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 110

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT