Munna o ṱhavha mufunwa wawe - nga murahu a humela umu vhulaha.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Kha tshiṅwe tsha zwiwo zwau tambudzana ha mbeu, munna e avha o sinyuwa vhukuma o ṱhavha mufunwa wawe nga tshihali, nga u vhona uri u ḓo farwa, munna uyo o ḓou humela muḓini wa mufunwa wawe aya u mu ṱhavha hafhu lwa thituhu.

Tshiwo itshi tsha masinḓambilu tsho bvelela nga Mugivhela wa ḽau thoma ḽa Fulwi ngei Bunzhe nnḓa ha Ṱhohoyandou nga mathabama a awara ya vhuṱanu. Musidzanyana uyo e a ṱhavhiwa a lovha nga mufunwa wawe ndi musidzanyana wa minwaha ya furaru ane a ḓivhea nga ḽa Konanani Malabi. Mukomana na Konanani, Rendani Mugwedi, o amba zwauri khuḓano yo thoma nga matsheloni a Mugivhele uyo, musi vho dzula tshipotoni tsha kusi kwa tsini kwa Makononi.

“Hovha hu nga awara ya vhuna nga matsheloni, ri songo lavhelela, mufunwa wa murathu wanga a ḓou thoma umu pomoka zwauri ukhoita zwaufunana na munwe munna wa nnḓa ha vhushaka ha avho vhavhili. A inga ngauri munna ane a khou funana nae ovha o ḓa nga moḓoro ngeno hayani. Ho ḓou vuwa khuḓano khulu na tsemano vhukati havho vhavhili, ndi he a fhedza o mu ṱhavha kha ṱhoho nga bodelo ḽa halwa ḽo kwasheaho. Ro ḓou mugidimisela Konanani kiḽiniki ya tsini ya Block G uri a wane thuso,” a ṱalutshedza.

Vhori vha tshi swika kiḽiniki, vha fhiriselwa vhuongeloni, fhedzi vha kundelwa u wana masheleni au badela tshiendedzi tsha u vha isa vhuongeloni. “Ro ḓou humela hayani sa izwi zwo bala uri ri ye vhuongeloni. Rori zwezwi ri hayani, mupondi wa Konanani a vhuya hafhu a humbela pfarelo, fhedzi Konanani a hana umu farela. Sa zwe ravha ro langana u ita, ro ḓou namela thekhisi ubva hayani uya vhuongeloni, fhedzi Konanani ari u humbela u iswa mapholisani uri a vule mulandu wau ṱhaselwa nau rwiwa,” ndi musi a khou bvela phanḓa nau ṱalutshedza.

Vhori vha tshi swika mapholisani, Konanani a iswa vhuongeloni, ngeno mukomana wawe o humiselwa hayani. “Ro ḓi dzulela uvha ri khou davhidzana nṋe nae, a mmbudza zwauri mufunwa wawe ovha a khou mu shushedza uri u ḓo mu vhulaha arali a vula mulandu mapholisani. Uri ndi ngani mapholisa vho vhuisa Konanani hayani ngeno vha sa athu u fara mupondi ndi zwe nda sala ndi tshi ḓi vhudzisa luvhili na luraru. Konanani o fhedza o vhulawa kha zwoṱhe zwe zwavha zwi khou itea. Ndo ṱanganedza ṱhingo ubva kha mme anga vha tshi mmbudza nga ha tshiwo, ndori u swika he tshiwo tsha itea hone, nda mu wana o lala kha tivha ḽa malofha,” a amba.

Mugwedi o amba zwauri vhafunani avho vhavhili vhovha vha tshi dzula vhoṱhe lwa minwaha miraru vha sa athu uvha na khuḓano ye ya vha fhambanisa. “Vhushaka havho hovha ho no ḓala dzi nndwa na usa pfesesana lune Konanani ovha o no humela hayani. Zwo touvha tshimangadzo kha nne musi vha tshi vhuyelelana sa izwi hovha nṋe e amu thusa u pfuluwa muḓini wavho. Lufu lwa murathu wanga lwo mmbaisa vhukuma. Rovha ri songa lavhela uri a nga lovha nga nḓila iyi ya tshiṱuhu ngaurali,” a amba.

O engedza zwauri Konanani ovha e na vhana vhavhili vhaṱuku, vhane zwa zwino vha ṱhoga muunḓi. O amba zwauri: “Ovha a tshi shuma hone hovha hu ene muunḓi wavho. Nga iṅwe nḓila ri hwesa mapholisa mulandu sa izwi hu vhone vhe vha mu humisela hayani vha sa athu u fara mupondi. Ngavhe vha mufare, tshiwo itshi tshovha tshi tshi ḓovha tshi songo itea. Zwa zwino ri fanela u lugisela mbulungo yawe, ine yo ḓa ri songo lavhelela. Ri khou humbela thuso kha vhathu uri vhane vha nga kona vha ri thuse kha nzudzanyo dza mbulungo. Zwine ra fulufhela zwone ndiuri mupondi a farwe a valelwe dzhele.”

Muambeli wa mapholisa a Limpopo Bridgadier Hlulani Mashaba vho khwaṱhisedza tshiwo he vhari mulandu wa bulayo wo vulwa. Mupondi, Christopher Ndivhuho Mutshinyalo (40), o farwa nga ḓuvha ḽe tshiwo tsha itea hone o ḓi vhonadza khothe ya madzhisiṱiraṱa wa Thohoyandou nga Musumbuluwo wa ḽa raru Fulwi. U khou hweswa mulandu wau vhulaha nau ṱhasela. Mulandu wawe wo fhiriselwa phanḓa uya kha ḽa fumbili-ṱahe Fulwana uri ṱhoḓisiso dzi bvele phanḓa.

Nga tshifhinga tsha u ḓi vhonadza khothe, Muvhuso wo amba zwauri u ḓo hanedzana na khumbelo ya beiḽi. Mutshinyalo o ḓou amba zwauri ha nga ḓo ita khumbelo ya beiḽi.

Date:07 June 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 255