Ahuna khombo ine ya fhira mufumakadzi o sinyuwaho

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Sa zwine luisimane lwa amba “Hell hath no fury like a woman scorned.” Kha vhupo ha Vhembe, vhaṅwe vhathu vha tenda uri izwo ndi ngoho, hone vhori u vhona zwe zwa itea nga Lavhuṱanu ḽa vhege yo fhiraho ngei Hamutsha Tshiluvhi musi mufumakadzi a tshi fhisa nnḓu, vha tenda zwauri muthu wa mufumakadzi ha faneli u sinyuswa na luthihi.

Mulilo uyo we wa tshinyadza nnḓu na zwishumiswa zwoṱhe ngomu nḓuni wo thoma nga awara dza maḓautsha. Mashudu mavhuya ahuna muthu e a huvhala, sa izwi vhathu vhoṱhe vho kona u shavha vha tshi phulusa matshilo avho. Tshinyalelo afho nḓuni i khou anganyelwa u ḓura masheleni anganyelwaho uvha zwigidi zwa maḓana a rathi zwa dzi rannda.

Nga murahu ha tshifhinga nyana ho ṱaha mulilo, mavharimari o ḓou phaḓaladzwa auri u thoma ha mulilo uyo hovha husi vhukhakhi. Muṅwe wa vhathu vhane vha tenda zwauri mulilo uyo yovha usi vhukhakhi ndi mune wa muḓini uyo, Vho- Thivhulawi Mangaladzi, vhe vhavha vhe siho hayani musi mulilo uyo u tshi ṱaha.

“Zwe nda wana ndi zwauri murwa wanga ovha o vhuya na musidzana ane a seisana nae vha dzula vhoṱhe lwa maḓuvha a tshivhalo asa athu u mu sia hayani a humela mushumoni. Ndovha ndi sa tendelani nazwo sa izwi vhabebi vhawe vhovha vha sa ḓivhi zwauri u khou dzula na rine. Ndo ḓou amba zwauri ndi khwine a humele hayani uri ri kone u dzudzanya zwoṱhe nga nḓila yo fanelaho. Ndi humbula uri afho ndi hone he a sinyuwa hone,” vha amba.

Vho -Mangaladzi vhari murwa wavho muṱuku o amba zwauri o pfa hu tshi tambiswa bogisi ḽa thanda dza mentshisi ubva kha iṅwe ya phera afho nḓuni, he ha kona ha u tevhela u ṱaha ha mulilo. “Murwa wanga o lingedza u imisa mulilo uyo fhedzi a kundelwa sa izwo wovha wo no hulela. O kona u phulusa vhutshilo hawe na makhulu awe, vhe vhavha vhe nga ngomu nḓuni nga tshifhinga itsho. Vhadzulatsini vho lingedza u thusa nga nḓila dzine vhovha vha khou kona ngadzo fhedzi vho kundelwa u thivhela mulilo. Zwa zwino ndo sala ndo hanganea hone athi khou ḓivha uri ndi fanela u ita mini musi ro bvelelwa nga tshiwo itshi,” vha amba.

Vho -Mangaladzi vhari vha tenda zwauri musidzana uyo ane a seisana na murwa wavho ndi ene we a thoma mulilo uyo sa izwi ovha o dzhia thundu dzawe na zwishumiswa zwawe musi mulilo u sa athu u thoma. “Ahuna tshithu tshe ra kona u tshi phulusa. Mme anga zwa zwino vho tou salelwa nga zwiambaro zwe vhavha vho ambara nga tshifhinga tshau ṱaha ha mulilo, na murwa wanga. Zwa zwino athi ḓivhi nauri ndi thoma ngafhi,” vha engedza.

Murangaphanḓa wa muvhundu uyo Cllr Taki Ravele vho dalela muṱa uyo wo welwaho  ngatshiwo uri vha vha thuse nga ṱhoḓea dza ḓuvha ḽiṅwe na ḽiṅwe u fana na zwiambaro na zwiḽiwa. “Izwi ndi tshinyalelo, hone ndi ḓo amba na vha Coghsta uri vha thuse u fhaṱela muṱa uyu nnḓu sa nyimele yatshihadu” vha amba.

Muambeli wa mapholisa Limpopo Brigadier Hlulani Mashaba vho khwaṱhisedza tshiwo he vha amba zwauri ho vulwa mulandu wau fhisa muthu o ḓi imisela. “Muṅwe na muṅwe are na zwine zwa nga thusa kha u tandulula mulandu uyu anga kwama muofisiri vha ṱhoḓisiso, Sgt Rinah Tshimangadzo Ndou kha nomboro dza 082 319 9622 kana vha rwela luṱingo kha nomboro dzau thivhela vhugevhenga dza 08600 10111,” vha amba.

Date:24 June 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 97