Ṅwana wa murendi Sheila Mathevula o lovha ho sala maḓuvha uri mirundu i swe.

Tshiṱori nga Thembi Siaga na Bernard Chiguvare. Ṱhalutshedzo nga Khathutshelo Raliphaswa.

“Zwa zwino ngavhe ndovha ndi khou pembela u vhuya ha vharwa vhanga vhavhli ubva mirunduni sa vhaṅwe vhabebi, fhedzi ndi khou fanela u lugisela mbulungo ya muthihi wavho, zwine zwa touvha vhuṱungu kavhili kha nṋe.” Ayo ndi maipfi a vhuṱungu e a ambiwa nga murendi Sheila Mathevula vha bvaho Habungeni zwi tshi tevhela u lovha ha ṅwana wavho wa minwaha ya fumi-rathi, Pfano Khomola e a lovha nga Mugivhela wa ḽa rathi Fulwana.

Pfano, e avha e mugudiswa wa murole wa vhufumi tshikoloni tsha Hluvuka, o lovha ho sala maḓuvha a rathi fhedzi uri murundu wa Bungeni u swe. Murundu uyo ndi muṅwe wa mirundu ya 631 kha vunḓu ḽa Limpopo ye ya tendelwa u fumbisa vhafumbiswa, hone vhafumbiswa vha paḓaho 900 vha fumba kha murunduni uyo. U lovha hawe zwi songo lavhelelwa zwo kombetshdza uri murundu uyo u swe nga Sondaha ya ḽa sumbe Fulwana ngeno huuri wovha wo vhetshelwa u swa nga Lavhuṱanu ḽa fumi-mbili Fulwana.

Mutukana uyo ovha o ṱanganedzwa murunduni wa Bungeni nga ḽa fumbili Fulwi. Mawanwa o bveledza zwauri Pfano o lila nga u sa ḓipfa zwavhuḓi, zwe zwa kombetshedza vhaunḓi uri vha mu ise vhuongeloni ha Majosi uri a ṱolwe.

Mme awe, Vho Sheila, vho amba zwauri vho wana ṱhingo ubva kha vhaunḓi vha murunduni musi vhe mushumoni. “Vhovha vha khou ṱoḓa thendelo yanga yauri vha mu ise vhuongeloni sa izw ovha a khou thoma nau humisa zwiḽiwa zwe a ḽa. Ndori ndi tshi swika kha vhaongi ndi tshi humbela u mu vhona, nda wana o no fhira fhano shangoni. Vhuṱungu he nda vhu pfa athi kholwi vhu tshi vhambedzwa na vhuṅwe hafha vhutshiloni,” vha amba.

Vho Sheila vho ṱahisa ṅwana wavho sa muthu we avha e na vhutsila ha zwithu, ṅwana o aluswaho zwavhuḓi, hone e na mikhwa. Vho amba zwauri avha ḓivhi uri vha ḓo thoma ngafhi u ṱanganedza u lovhelwa nga ṅwana wavho. “Ndovha ndo lugela u ṱanganedza vharwa vhanga vhavhili ubva murunduni, fhedzi zwa zwino ndo sala ndi khou lilela muṅwe wavho,” vha amba.

Tshiwo itshi tsha masinḓambilu, tshe tsha itea nga tshifhinga tshine tsha sia tshiga tshau alutshela kha ḽifhasi ḽa vhathu vhahulwane, tsho vhaisa vhadzulapo vha Habungeni. Hosi Vho Given Bungeni vho amba zwauri Pfano ovha o neiwa mishonga nga vhunzhi hone ovha ono thoma u ḓi pfa e khwine.

“Nga ḓuvha iḽo, o ḓou dovha hafhu a lila nga usa ḓipfa zwavhuḓi. Mufumbisi vho ḓou mu humisela kha dokotela vhe vha muthusa lwau thoma, vhe vha mu ṱola hafhu, fhedzi nga murahu ha tshifhinga vha amba zwauri o lovha. Ndo ita thendelano na vha muṱa uri ri ḓo shumisana kha nzudzanyo dza mbulungo ya Pfano,” Hosi vha zwa.

Muambeli wa mapholisa fhano kha tshiṱiriki tsha Vhembe W/O Vuledzani Dathi vho khwaṱhisedza tshiwo. “Ho vulwa mulandu wau ṱoḓulusa tshivhangi tsha lufu lwa Pfano Khomola,” Vho Dathi vha amba.

MEC wa zwa mavhusele, nzulelo dza vhathu na zwa sialala (CoGHSTA) Vho Basikopo Makamu vho amba zwauri u lovha ha ṅwana muthi ndi u lovha ha vhanzhi. Vho Makamu vho ṱahisa maipfi avho a ndiliso kha muṱa wo welwaho. “Rovha ri songo lavhelela uri hu ḓovha na mufumbiswa ane a lovha sa komiti wa mirundu ya u langa mirundu ya vunḓu, ine ya rangwa phanḓa nga Hosi Vho Shitlhangoma Chauke, sa izwi ro shuma ro ḓi funga uri husivhe na mpfu mirunduni u mona na vunḓu ḽashu,” hu amba Vho MEC Makamu.

Musi vha tshi vhudziswa nga ha maga ane a dzhiiwa u khwaṱhisedza tsireledzo ya vhafumbiswa, muhasho wo amba zwauri vhovha na mishumo yau pfumbudza mivhli nga ḽa raru na ḽa iṋa Fulwi ṅwaha uno he havha hu na vharangaphanḓa vha siala na vhafumbisi vha sialala.

Pfano Khomola o vhulungwa mavhidani a Majirija Xitaci nga Mugivhela wa ḽa fumi-raru Fulwana.

Date:22 July 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 134