Dasco Mahn o guda kha vhomakone

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

Ramuzika wa muzika wa Tshivenda na reggae Dasco Mahn o vhuya nga huhulu hone nga muṅwe mulenzhe. Luimbo lwawe lwe a fhedzisela u lu anḓadza, "Volume 2 Afrika" lwovha nga ṅwaha wa 2022, he a ḓou dzhia tshifhinga tshau awela kha zwau kanḓisa e nḓuni dzau kanḓisa muzika, fhedzi ovha a songo ima khau mbvumbvusa vhathu nga muzika. Ramuzika uyu ane abva Vondwe, nnḓa nyana ha Ṱhohoyanḓou, ane madzina awe nga vhuḓalo ndi Mbulaheni Leonard Mulaudzi, o anḓadza luimbo lwawe, "Thi Mufuni Zwone", nga ṅwedzi wa Ṱhafamuhwe naṅwaha fhedzi nga khaedu dza masheleni a kundelwa u lu rwela ṱari lwa tshiofisi.

Nga Mugivhela wa ḽa fumi-raru Fulwana, o ḓou vhona tshikhala musi oya uvha na nyambedzano kha radio ya lushaka ya Phalaphala FM, he a ḓou rwela luimbo lwawe ṱari lwa tshiofisi. Dasco o ḓou tamba luimbo lwawe na dziṅwe nyimbo dzine dza ḓovha dzi hone kha aḽibamu yo fhelelaho ine ya ḓo anḓadzwa husikale, e na ṱhama dzawe.

Zwauri Dasco Mahn o sikelwa uvha ramuzika wa maṱhakheni asi tshimangadzo. O bebelwa muṱani wa muzika hune muzika wovha u zwiḽiwa zwa ḓuvha ḽiṅwe na ḽiṅwe. Hango tou ya kule uri a ḓivhe nga ha muzika, oḓi tou u guda kha vhabebi na vhagudisi vhawe tshikoloni.

“Khotsi anga, Vho Gerson Ratshilingwana Mulaudzi, ndi mulidzi wa kaṱara na mbila makone, hone vha dzulela u zwi tamba misi yoṱhe. Zwezwi ndi muṱuku musi vho bva hayani, ndovha ndi tshi ḓou tamba nga kaṱara yavho u vhuya u swika vha tshi vhuya hayani,” a amba.

Mme awe, musadziavhane Vho Mukatshelwa Mudangawe Luruli Mulaudzi, vhovha vhe mutshini wa malende makone. “Ndo guda zwinzhi ubva kha vhabebi vhanga, hone ndi ḓo dzulela u zwi livhuwa misi yoṱhe. Ndi vhone vhathu vhane vhovha vha tshi nṱuṱuwedza, hone na namusi vha tshe ṱhuṱhuwedzo yanga. Ndi zwine ndavha zwone namusi nga nṱhani ha vhabebi vhanga,” a amba.

Dasco o amba zwauri ṅwaha wavhuḓi phanḓa ua vhonala hone zwoṱhe zwi khou tshimbila zwavhuḓi. “Pulane dzanga dzi khou tshimbila nga ngona nga zwiṱuku nga zwiṱuku. Ndo ḓi vhudza zwauri ndi ḓo anḓadza luimbo luthihi sa tshipiḓa tsha mushumo wanga wa u anḓadza aḽibamu nga vhuḓalo. Zwa zwino sa izwi luimbo ndo no lwu anḓadza hone na vhatevheli vho lu ṱanganedza zwavhuḓi, aḽibamu yo fhelelaho i ḓo tevhela,” a amba.

Date:24 July 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 149