ADVERTISEMENT:

 
 

Mulangavunḓu wau thoma wa mufumakadzi wa vunḓu ḽa Limpopo, Dr Phophi Constance Ramathuba, vhe vha aniswa sa mulangavunḓu nga Lavhuṱanu ḽa fumi-iṋa Fulwi. Tshifanyiso: Elmon Tshikhudo.

Dokotela vha bvaho Hamashamba ndi mulangavundu wau thoma wa mufumakadzi wa Limpopo

 

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Zwi tshi tevhela u khethwa ha Dokotela Vho -Phophi Consatance Ramathuba sa mulangavunḓu wa Limpopo wau tou thoma wa mufumakadzi, milaedza ya u vha fhululedza yo rumelwa ubva fhethu ho fhambanaho, zwihulu ubva hayani havho hune vha bva hone, Hamashamba kha vhupo ha Vhembe. Vho- Ramathuba vho khethwa sa mulangavunḓu kha dzulo ḽa vhusumbe ḽa vhusimamilayo ha Limpopo ngei Lebowakgomo nga Lavhuṱanu ḽa fumi-iṋa Fulwi. Vho -Ramathuba ndi mulangavunḓu wa vhuṱanu, vha tshi tevhela mulangavunḓu wa kale Vho -Stan Chupu Mathabatha, vhe vha langa vunḓu lwa mivhuso mivhili.

U khethwa havho zwo vhonwa sa u bvelela kha vunḓu ḽa Limpopo sa izwi hu sa athu vhuya havha na mulangavunḓu wa mufumakadzi ubva tshe havha na muvhuso wa dimokirasi minwaha ya furaru yo fhiraho. Naho vhaṅwe vho sasaladza u khethwa ha Vho -Ramathuba, hayani havho vho pembelwa vha sa imi, nga milaedza na zwirendo zwa khuliso nau khoḓwa.

Mulaedza wavho wau fhululedzwa wau thoma wo bva kha nnḓu ya vhurangaphanḓa ha lushaka lwa Vhavenda, vhe vha rumela muambeli wavho, Thovhele Nthumeni Masia, vhe vha amba zwauri u khethwa havho zwi sumbedza uri mishumo yavho yau rangaphanḓa i khou vhonala nau sumbedzisa uri hu na u lingana ha vhafumakadzi na vhanna kha maiimo au rangaphanḓa kha vunḓu ḽa Limpopo. “Ndi mbonela phanḓa yashu ine ya ḓo thusa Vho -Ramathuba khau tandulula khaedu dzine dza fana nau humbulela murahu, uvha vunḓu ḽisina mveledziso, na vhushai,” vha amba.

Vha tshiimiswa tsha Dr Tshenuwani Farisani Foundation vhovha vhaṅwe vha vhathu vhe vha vha fhululedza. Mutumbuli wa tshiimiswa itshi, Vho -Dokotela Tshenuwani Farisani, vhane vha shuma navho kha South African Communst Party, vho humbela mulangavunḓu muswa uri vha tou shuma nga maanḓa a kavhili kha aḽa e vha a shumisa sa MEC wa zwa mutakalo. “Sa tshiimiswa, ri ḓo vha tikedza kha ulwa na vhushai, musi vha tshi ṱhonifha nau isa tshumelo kha vhashayi vhane avhana maḓi, dzi nnḓu, dzi bada, na dziṅwe tshumelo,” vha amba.

Dr Ramathuba vho bebwa nga ṅwaha wa gidiḓaṱahe fusumbe-raru kha muvhundu wa Hamashamba, husi asi kule na Ṱhohoyanḓou. Vho ḓou fhedza pfunzo dzavho dza mirole ya nṱha tshikoloni tsha nṱha tsha Mbilwi he vha ḓou ya u gudela vhudokotela khaYunivesithi ya Sefako Makgotho Health Science, ine kale yovha i tshi ḓivhiwa nga MEDUNSA, he vha ṱhaphudza pfunzo dzavho dza vhudokotela na bachelor ya zwau ita muaro. Vha dovha hafhu vhavha muraḓo wa ḽihoro ḽa African National Congress, vho aniswa kha vhusimamilayo ha vunḓu nga ṅwedzi wa Shundunthule nga ṅwaha wa gidimbili fumi-ṱhanu he vha khethwa sa MEC wa zwa mutakalo nga mulangavunḓu wa tshifhinga itsho, Vho Stan Chupu Mathabatha. Vho- Ramathuba vho ḓou shuma sa MEC wa zwa mutakalo fhano Limpopo ubva nga Shundunthule gidimbili fumi-na-ṱhanu u swika nga Fulwi gidimbili fumbili-iṋa, musi vha tshi aniswa sa mulangavunḓu muswa wa mufumakadzi wa u tou thoma wa Limpopo.

 

Date:24 June 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 125

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT