ADVERTISEMENT:

 
 

Vho Smuts Mufariseni Mphaya Masotsha, mualuwa vhe vha ngalangala vhege yo fhiraho vha tshi ya masimuni. Tshifanyiso tsho bveledzwa.

Mualuwa Vho Masotsha vho ngalangala dzi thavhani

 

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Ho no fhela vhege mualuwa Vho Smuts Mufariseni Mphaya Masotsha, vho bva hayani vha tshi ya masimuni u ṱoḓa zwifuwo zwavho thavhani ya vhupo vhune vha dzula hone. Vho Masotsha vha minwaha ya fumalo-mbili, vha bvaho Tshifudi Thondoni avha athu u vhuya ubva ḓuvha iḽo.

U ngalangala ha Vho Masotsha zwo sia vha muṱa na vhadzulapo vho dalelwa nga mbudziso u fhira phindulo, hone ḓuvha ḽiṅwe na ḽiṅwe vha engedzea nyofho dzauri naa hungavha ho itea mini kha mukalaha. Vha muṱa vho vhiga u ngalangala ha mukalaha musanda na mapholisani he ha takutshedza fulo ḽau ṱoḓana navho hune na zwino ahuna hune vha khou vhonala hone.

Muambeli wa muṱa, Vho Thinandavha Walter Mphaya, vhane vha dovha hafhu vhavha ṅwana wa mukalaha avho, vho amba zwauri mukalaha Vho Masotsha vho vuwa nga Ḽavhuna ḽa furaru Shundunthule, vha amba zwauri vha khou ya u lisa zwifuwo zwavho thavhani sa zwine vha dzulela u ita nga misi.

“Vhovha vho ambara tshikhipha tsha muvhala wa lutombo na vhurukhu ha muvhala wa lutambo. Ro vha lidzela kha ṱhingo yavho, vha ri vhudza zwauri vha Tshidzini Matshimbapfene, fhedzi ri tshi founa hafhu, ro ḓou wana ṱhingo yavho yo no valwa. Ubva henefho aronga tsha dovha hafhu rapfa tshithu ubva khavho. Ro lingedza u vha sedza hoṱhe, hune zwa zwino ro hanganea uri ndi ngafhi huṅwe hune ra nga vha sedza hone. Ḓuvha ḽe nda amba navho lwau fhedza ndi ḽa furaru-thihi Shundunthule nga Ḽavhuṱanu, lune zwa zwino ndo sala ndo hanganea,” vha amba.

“Rihumbulela zwauri vha ḓovha vho ṱangana na zwiṅwe nḓilani vha kundelwa u vhuya hayani. Ro lingedza u wana fhethu hune vha vha hone zwa zwino, fhedzi ngauri ṱhingo yavho yo valwa ari khou kona u zwi wana. Ro ya na thavhani ra vha ṱoḓa hoṱhe he ravha ri khou humbulela uri vha ḓovha vhe hone, ro ḓi ita nau huwelela dzina ḽavho, fhedzi ahuna phindulo ye ra wana. Nga Musumbuluwo wa ḽa raru Fulwi, mapholisa vho ḓou netshedza na bupho ḽiṱuku uri ḽi thuse u vha sedze hoṱhe, mashudu mavhi azwingo bveledza mitshelo yavhuḓi,” vha amba vho bilufhala he vha ita nau engedza zwauri sa muṱa vha khou thoma u laṱa fulufhelo ḽauri vha nga wana Vho Masotsha vha khaḓi tshila.

“Ri khou ṱoḓa vha tshi vhuya hayani, vha tshi tshila kana vho lovha. Fhedzi zwauri vha khaḓi tshila ndi zwine ra khou ḓi vhudzisa zwone sa muṱa. Ri tshi sedza na maḓuvha ane ono fhira vha sa wanali fhethu, ahuna fulufhelo ḽine ri tshe nalo ḽauri ri nga vha wana vha tshe muthu a tshilaho. Fhedzi naho zworalo, ri nga takalela u wana maselala avho uri ri kone uvha na mbulunga yavho ya tshidela. Ri dovha hafhu ra humbela uri muthu ane anga ri thusa ngau ḓivha nga ha u ngalangala ha Vho Masotsha a ri kwame sa muṱa,” vha amba.

Mivhunduni ya Tshifudi na Tshaulu khathihi na zwisi zwa tsini hu ḓivhelwa uri vhathu vha a ngalangala. Vhunzhi ha vhathu avho vhane vha ngalangala vha wanala vho lovha, ngeno vhaṅwe vha tshi wanala vha kha ḓi tshila. Hune vhunzhi ha mabulayo kha avho vhane vha wanala vho lovha ndi ane a ṱumanya nau itwa zwithavhelo ha vhathu avho.

Muambeli wa mapholisa Vhembe W/O Vuledzani Dathi vho khwaṱhisedza zwauri ho vulwa mulandu wau ngalangala ha Vho Masotsha hone hovha ho netshedzwa na bupho ḽe ḽa thusa khau ṱoḓa Vho Masotsha dzi thavhani he vhasi wanale.

Vhane vhavha na zwidodombedzwa zwine zwa nga thusa mulandu uyu vha nga kwama vha muṱa kha 079 545 3472 kana kha 076 566 7236.

 

Date:07 June 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 140

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT