Vhabebi vha khou shushedza u vala tshikolo tsha Maledza

Tshiṱori nga Thembi Siaga/GroundUp. Ṱhalutshedzo nga Khathutshelo Raliphaswa.

Vhabebi vha vhagudiswa vha tshikolo tsha fhasi tsha Maledza fhaḽa Hamalamulele ndi kale vha tshi khou ita khuwelelo kha vha muhasho wa pfunzo fhano Limpopo uri vha lugise tshikolo itsho tshine tsha khou tshinyalelwa zwihulu. Vhari ubva nga 2004 vhovha vha tshi khou ita khumbelo uri tshikolo tshi lugiswe. Zwa zwino vhabebi vhari vha khou ṱoḓa u vala tshikolo itsho

Hovha hu pulaniwa uri hu ḓovha na misumbedzo nga ḽa fumbili-thihi Tshimedzi fhedzi ha imiswa u bvela phanḓa na misumbedzo iyo, huu itela uri vhagudiswa vha kone u lugisela milingo yavho ya mafhelo a ṅwaha ya Ḽara. Naho zworalo, vhabebi na vha khorombusi vhari arali zwi tshi nga vha kombetshedza, vha ḓo vala tshikolo itsho nau kombetshedza vha muhasho uri vha dzhenelele.

Tshikolo itsho tshine tshavha na vhagudiswa vha 402 ubva kha murole wa R u swika murole wa vhusumbe, tsho fhaṱwa nga ṅwaha wa 1967 nga vhabebi, vha tshi shumisa mavu vho fhaṱa phera nṋa. Ndi he nga murahu vha muhasho wa pfunzo vho ḓou thusa ngau engedza dziṅwe Phera dzau gudela. Itshi ndi tshone tshikolo tshi tshoṱhe tsha fhasi kha vhupo uho. Ndi tshikolo tshine tshavha na vhadededzi vha 12 na vhagudiswa vha paḓaho 400.

Nga ṅwaha wa 2004, miraḓo ya vhulanguli ha tshikolo (SMT) na vha khorombusi vho ḓou thoma u ita khumbelo dzauri vha muhasho wa pfunzo vhavha fhaṱele phera ntswa sa izwi idzo dzine dza shumiswa zwino dzi siho kha vhuimo havhuḓi.

Ubva zwenezwo, vhovha vha tshi khou dzulela u humbela vha muhasho uri vha lugise themamveledziso dza tshikolo itsho kana vha fhaṱe phera ntswa na mabunga maswa a khwine. Vho ita nau sumbedza zwifanyiso zwa afho ho tshinyadzeaho hone ubva nga 2010 vhovha vha tshi khou fulufhedzisa uri vha ḓo lugisa.

Vho dovha hafhu vha humbela thuso ubva kha vha muhasho wa mishumo ya tshitshavha na kha masipala wapo wa Thulamela.

Mimuya na dzi mvula zwo ḓou tshinyadza phera dza malo nga Ḽara 2018. Vha muhasho vha ḓi zwi dzhiela nṱha uri ho tshinyadzea nga Luhuhi 2020 vha vhea tshikolo itsho kha mutevhe wa zwikolo zwine zwa fanela u wana dzi phera khwalwa, he vha fhedza vho wana nṋa.

Nga ṅwedzi wa Ṱhafamuhwe 2022, vha SMT na vha SGB vho dovha hafhu u humbela vha muhasho wa tshumelo dza tshitshavha uri vha kwashe zwifhaṱo zwa kale. Nga Fulwi 2022, zwiṅwe zwa zwifhaṱo zwo ḓou kwashiwa. Fhedzi phera ntswa dzau gudela, holo na mabunga nyengedzedzwa na zwino azwiathu u fhaṱiwa.

Zwa zwino, tshikolo tshi na phera nṋa dzine dza shumisiwa, fhedzi hu na ṱhanga dzo tshinyadzeaho. Phera tharu ndi dzine dza shumiswa sa phera ya zwa dzi khomphiyutha, phera ya vhadededzi, na ofisi ya ṱhohoyatshikolo. Phera idzo dzoṱhe dzi na u kwashea kha dzi mbondo. Hu na dzi buḽoko nṋa dza mabunga, hune buḽoko nthihi i na mabunga maṱanu.

Vhabebi ndi vhe vha ṱahisa mbilaelo dzavho uri vhana vhavho vha khomboni sa izwi vhovha vha tshi khou dzhena kha phera dzo tshinyadzwaho. “Zwi vhonala hu tshinga zwililo zwashu azwi khou pfiwa nga ha u ḓalesa ha vhana kha phera dzau gudela na u tshinyadzwa ha zwishumiswa u fana na desike dzau ṅwalela, na dziṅwe dzi khaedu,” hu amba mubebi vho kwameaho Vho Tinyiko Chauke.

Mudededzi afho tshikoloni vho vhudza vha Limpopo Mirror/GroundUp zwauri phera yau gudela ya murole wa vhuṋa hu na vhagudiswa vha paḓaho 69 hune phera iyo ndi ṱhukhu kha vhagudiswa avho.

Vho David Mathebula, mudzulatshidulo vha khorombusi vho amba zwauri: “Ro no isa khumbelo dzire na tshivhalo, fhedzi ahuna zwine zwo no itiwaho u swika zwino. Tshikolo itshi tshi kha vhuimo vhusi havhuḓi naluthihi hune na ṱhanga dze ra lugisa dzo dovha hafhu dza tshinyadzwa nga mimuya mihulu na mvula nga ṅwaha wa 2018,” vha amba.

Musi vha tshi vhudziswa nga ha zwine vha muhasho wa pfunzo vha ṱoḓa u ita, muambeli wa muhasho wa pfunzo fhano Limpopo, Vho Mosebjane Kgaffe vho amba zwauri tshikolo itsho tsho vhewa phanḓa kha mutevhe wa zwikolo zwine zwa ḓo khwinifhadzelwa themamveledziso kha ṅwaha wa muvhalelano uḓaho.

Avhango amba uri ndi ngani hu na u lenga, zwe vha tou amba ndi zwauri themamveledziso dza tshikolo ndi dzine dza fanela u lavheleswa zwihulu nga vha tshiṱiriki nau sedza mugaganya gwama ure hone. “Tshikolo tsho vheiwa kha mutevhe wa dzi themamveledziso, hone ho no vhetshelwa na vho rakonṱiraka vhane vha ḓo shuma hu saathu u fhela ṅwaha wa muvhalelano,” hu amba Vho Kgaffe.

Date:06 November 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 14