Papa Thile vho khethwa luvhili kha dzi SATMA nanwaha

Ṱhalutshedzo nga Khathutshelo Raliphaswa.

Muimbi wa vhurendi, nganea, na ramabindu Papa Thile vhari uvha nkhetheni kha zwiteṅwa zwivhili zwa pfufho dza South African Traditional Music Awards (SATMA) zwi tou khwaṱhisedza uri mishumo yavho i khou vhonala nau dzhielwa nṱha ha mishumo yavho kha nḓowetshumo ya muzika.

Papa Thile, vhane dzina ḽavho ndi Thilemelwi Arnold Nyamande vha bvaho fhaḽa Makonde, vho no anḓadza aḽibamu dzine dza swika dza sumbe fhasi ha dzina ḽavho. Vho nagwa kha zwiteṅwa zwivhili zwine ndi ramuzika wa khwine wa Tshivenḓa khathihi na ramuzika wa vhurendi ha sialala. Zwoṱhe zwiteṅwa izwo ndi zwine zwa bva kha aḽibamu yavho ya vhusumbe ya, Gondo (Ḽa Vhanzhi).

“Hezwi zwi amba zwinzhi kha nṋe sa ramuzika kana mutsila. Ndovha ndi songo lavhelela u khethiwa kha zwiteṅwa zwivhili nga tshifhinga tshithihi. Zwo takula muya wanga sa izwi ndovha ndi tshi dzulela uvha na lutamo lwau pfufhiwa pfufho dza SATMA, hone ndi na fulufhelo ḽauri nanwaha ndi ḓo vhuya na tshiphuga kana zwiphuga. U khethiwa ndi tsumbo yauri mbondo dza zwithivheli dzo kwashea. Ahuna ane anga dovha a nthivha zwino. Ndo thoma uvha murendi ndi tshe mutukana ndi tshe kha gireidi dza tshikolo tsha fhasi. Hovha husaatu uvha na u khethiwa kha mishumo yanga,” vha amba.

Papa Thile vhari vhurendi havho ho shela mulenzhe kha u alusa luambo lwa Tshivenḓa. “Ndi shumisa luambo lwo kunaho, hone dzi pfufho dzi ḓo ita uri ndi kone u vhonala khwine kha shango. Zwa zwino athi tsha takalelwa Venda fhedzi, ndi vhaliwa kha vharendi vhararu vha khwine fhano Afrika Tshipembe. Ndi humbela uri vhathu vha nvouthele, nga thikhedzo yavho, ndi azwi ḓivha uri ndi ḓo vhuya na zwiṅwe hayani,” vha amba.

Lufuno lwa Papa Thile kha muzika lwo simuwa vha tshe muṱuku hune vhovha vha tshi vuwa vha thoma u ita phosho ngau shumisa dzi thini na kaṱara. Nga ṅwaha wa 2001 mme avho, Vho Takalani, vhane vhovha vhe muimbi kerekeni hone vha tshi tshina kerekeni, vho ḓou vha rengela kaṱara ḽa khwine.

Vho ḓouvha muraḓo wa bennde ya kerekeni ya tsini ubva nga ṅwaha wa 2006 u swika nga ṅwaha wa 2009 he vha thoma u kandisa muzika nga ṅwaha wa 2010. Aḽibamu yavho yau thoma, Vho Lila Mmawe, ndi ye ya anḓadzwa nga ṅwaha wa 2014 hone ya khethiwa kha zwiteṅwa zwiṱanu nga 2015 kha pfufho dza Tshivenda Music Awards (TSHIMA).

Aḽibamu yavho ya vhuṋa, Malamba, ndi ye vha kunda ngayo kha tshiteṅwa tsha aḽibamu ya ṅwaha nga 2020 kha dzone pfufho dza Tshivenḓa Music Awards (TSHIMA)

Vha nga vouthela Papa Thile kha tshiteṅwa tsha ramuzika wa khwine wa vhurendi wa sialala, vha rumela ‘012SATMA19’ kha nomboro dza 32436. Na kha tshiteṅwa tsha ramuzika wa Tshivenḓa ngau rumela ‘068SATMA19’ kha nomboro dza 32436.

Date:23 October 2024

By:

Read: 12