Mushumo wa tshiporo tsha ubva Pretori u swika Ṱhohoyanḓou uḓo fhungudza dzi khombo badani

Tshiṱori nga Bernard Chiguvare. Ṱhalutshedzo nga Khathutshelo Raliphaswa.

Arali tshigwada tsha vharangaphanḓa vha sialala na vhafunzi vhovha vha tshi nga kona u tshimbidza zwithu nga nḓila yavho, ṱireni ya Shosholoza Meyl yovha i tshi ḓo enda ubva Pretoria u swika Ṱhohoyanḓou. Vha tenda zwauri zwi nga fhungudza u tsitsekana magondoni nau engedza zwikhala zwa mishumo.

Muhumbulo wauri tshiporo tshi tshimbile uya Thulamela ndi we wa ḓou ḓiswa ṱafulani nga tshifhinga tsha muṱangano we wa farwa nga Ḽavhuvhili ḽa Fumi-sumbe Khubvumedzi, masipala wapo wa Makhado. Muṱangano uyo wovha wo dzudzanyiwa nga vhafunzi vha foramu ya vhupo na tsini hone ha dzhenelela vharangaphanḓa vha sialala vhahulwane, vhaimeleli vha zhendedzi ḽa Passenger Rail Agency of South Afrca (PRASA), na vhaimeleli vha mimasipala yapo ubvakha tshiṱiriki tsha Vhembe Makhado na Thulamela.

“Ro no zwi vhona uri hu na zwivhilela zwire na tshivhalo hune ha itea dzi khombo kha gondo ḽihulwane ḽa N1. Nga u ḓisa muhumbulo wauri huvhe na tshiporo tshiswa tshine tsha fhira nga kha vhupo vhu fanaho na Granite, Mailaskop, Elim, Levubu, Vuwani, na Hamalamulele, hune tsha fhelela fhaḽa Thavhani Mall khaḽa Ṱhohoyanḓou, ri tenda zwauri zwi ḓo fhungudza u tsitsekana magondoni nau fhungudza dzi khombo magondoni, zwihulu nga tshifhinga tsha maḓuvha a vhuawelo,” hu amba Vhamusanda Vho Ntsundeni Sampson Sinthumule, Vhamusanda vha Madombidzha.

Vhamusanda Vho Sinthumule vho ṱahisa zwauri vha a vhilaedzwa nga u shaea ha mveledziso vhuponi ha mi masipala ya Makhado na Thulamela. Vha tenda zwauri muhumbulo uyu unga vhuyedza vhathu vha mivhundu minzhi ya vhupo ya tshiṱiriki tsha Vhembe.

“Tshiporo tshiswa tshi ḓo thusa khau sikiwa ha mishumo mahayani na dzi ḓoroboni. Vhadzulapo vha nga wana zwikhala zwa mishumo sa vhalindi vha tsireledzo, vhau rengisa zwibveledzwa zwau fhambana na zwinwevho, hone vhaṅwe vha nga wana zwikhala zwa mishumo khau endedza zwithundu na zwibvelezwa. Vhareili vha dzi thekhisis dzine dza shumiswa nga nnyi na nnyi vha nga vhuyelwa khau endedza vhathu uya nau vhuya kha nyendo dzavho,” Vho Sinthumule vha amba.

Vhamusando Vho Sinthumule vho tenda zwauri uri mushumo uyu u takutshedze zwi ḓo dzhia tshifhinga. Vhari zwine zwa khou tevhela ndiuri hu ṱolwe fhethu hune ha khou lavheleswa uri tshiporo itsho tshine tsha khou ṱoḓa u fhatiwa tshi nga fhaṱiwa hone.

Date:30 September 2024

By: Bernard Chiguvare

Bernard Chiguvare is a Zimbabwean-born journalist. He writes mainly for the online publication, Groundup.

Read: 14