ADVERTISEMENT:

 
 

Mapholisa a maḓini vha tshi bvisa masalela damuni ḽa Nandoni. Tshifanyiso tsho bveledzwa.

Ho wanala muangarambo na tshanḓa damuni ḽa Nandoni.

 

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

U engedzea ha tshivhalo tsha vhathu vhane vha lovha damuni ḽa Nandoni zwi tou engedza na nyofho kha vhadzulapo vha tshiṱiriki tsha Vhembe, zwihulu vhathu vha zwisi zwa tsini na damu iḽo. U bva ṅwaha wa gidimbili-na-ṱhanu damu iḽi ḽi tshi vulwa ho no lovha vhathu vha paḓaho fuiṋa vha tshi rea khovhe, vha tshi ka maḓi kana vha tshi bambela kha damu iḽo.

Miṅwedzi mivhili yo fhiraho, ho waniwa tshitumbu tsha munna kha thungo lwa kusi kwa Tshilungoma. Nga Mugivhela wa ḽa fumi-na-rathi, vhadzulapo vho ḓou shushea vha tshi wana muangarambo na tshanḓa zwa muthu tsini na damu nga mufhiri wa bada.

Murangaphanḓa wa muvhundu uyo Vho Khathutshelo Thomas Tshisikule vhari vho ṱanganedza ṱhingo vha tshi vhigelwa tshiwo itsho vha ḓou gidimela afho. Vhari tshiimo afho damuni tsho tou vusa nyofho kha vhadzulapo. “Ndi ngoho, ro wana muangarambo na tshanḓa tsini na damu. Ro ḓou vhigela mapholisa, vhe vhaḓa na mapholisa a maḓini vhe vha bvisa masalela ngomu damuni. Ri humbulela uri masalela aya ndi a murei wa khovhe wa vhupo uho we a ngalangala vhege yo fhiraho ane ovha a sa athu u wanala,” vha amba. Vho engedza ḽauri ndi kale vha tshi isa khuwelelo kha vhathu uri vha ṱutshele kule na damu iḽo, fhedzi vha kundela u pfiwa.

“Itshi asi tshiwo tsha u thoma kha ṅwaha uno. Minwedzi mivhili yo fhiraho hovha na tshiwo he murei wa khovhe a lovha damuni, Mashudu mavhuya tshitumbu tsha munna uyo tsha wanala. Ro humbela vhathau  vhane vha ṱhogomela vhupo uri vhade vha ambe na vhathu luthihi nga ṅwedzi nga ha nḓila dza u di ṱhogomela tsini na ngomu ha damu, fhedzi vha si swike. Ri ita khuwelelo kha vhathu uri vha ṱutshele kule na uya damuni iḽi sa izwi ḽi khombo kha vhathu,” vha engedza.

Muambeli wa mapholisa kha tshiṱiriki tsha Vhembe W/O Vuledzani Dathi vho khwaṱhisedza tshiwo itsho. “Ro vula mulandu wau ṱoḓisisa tsho ḽaho mufu. Muṅwe mudzulapo afho damuni o amba ḽauri vhadzulapo ndi kale vha kha fulo ḽau ṱoḓa munna ane avha mubvannḓa wa ḽa Zimbabwe, Vho Lucas Ncube, vhe vha ngalangala vho fhedzisela u vhoniwa damuni nga Ḽavhuraru ḽa fumi-na-raru Thafamuhwe vha tshi rea khovhe. Masalela e a waniwa damuni o iswa mutsharani wa muvhuso wa Tshilidzini, hune ṱhoḓisiso dzi khou bvela phanḓa,” vha amba.

 

Date:25 March 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 176

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT

 

Popular Articles