Vhadzhakanḓila kha muzika Adziambei Band vho anḓadza aḽibamu ntswa

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Vhatevheli na vhatakaleli vha muzika wa Tshivenda vha ḓo thoma nwaha wavho zwavhuḓi, izwi ndi ngauri vha tshigwada tsha Adziambei Band vho anḓadza aḽibamu yavho ntswa ine ya vhidzwa Mihwalo Vol 19. Aḽibamu iyo yo anḓadzwa nga Ḽavhuṱanu, ḽa fumi-na-ṱahe Phando.

Kha minwaha ya fuina vhe kha nḓowetshumo ya muzika, vho no anḓadza aḽibamu dza muzika wa Tshivenda dzine khadzo huvha hu na milaedza yau funza, u ḓivhadza, nau takusa mvelele na sialala ya Tshivenda. Aḽibamu iyi ya zwino, ine ya tevhela ye ya anḓadzwa murahu ya shuma zwavhuḓi ya Gwengelele Vol 18, i na nyimbo dzi swikaho dza malo, dzine nṋa ndi dza u lidzwa fhedzi. Dzinwe dza dzi nyimbo kha aḽibamu iyi ndi luimbo lwa Mihwalo, Ritshimbila na Yeso, Skhumba na Ndi tshi Lovha.

Mutumbuli wa tshigwada itshi Vho Maele Sirwali vho ṱalutshedza uri ṱhoho ya aḽibamu iyi ndi ine ya amba nga ha zwine zwa khou bvelela kha shango ḽashu, zwihulu kha vhupo ha Vhembe. “Ahuna mulalo hafha. Mabulayo a vhigiwa ḓuvha ḽiṅwe na ḽiṅwe, hone ahuna zwine zwa khou itwa u fhelisa zwiito izwo. Vhathu vha vhulahana sa zwifuwo husina u pfelana vhuṱungu,” vha amba.

Vhari sa tshigwada tsha muzika, vha dzulela u shumisa nḓila dzavho dzo fhambanaho na vhanwe u bva tshe vha thoma nga ṅwaha wa 1983, hone vha ḓo dzulela u bvela phanḓa nga nḓila iyo nau shumisa zwishumiswa zwa muzika zwa musalauno u itela u tshimbila na nḓila dzine dza shumisa namusi. “ Ro sika muzika une wa takalelwa nga vhoṱhe, vhaṱuku na vhahulwane. Ri na fulufhelo ḽauri aḽibamu yashu ya Muhwalo Vol 19 ido shuma vhukuma u fana na dzinwe aḽibamu dze ra vhuya ra dzi anḓadza u fana na ya Midzimu Ya Madimoni, Vho Enzhelina na Shango Lo Takala, u tou bula ṱhukhu kha nnzhi,” vha amba.

Aḽibamu iyi yo kandiswa nḓuni dza Burning Shack hone ya ṱanzwa nga Mulalo Mukwevho. Iḓo wanala kha zwileludzi zwa musika zwi fanaho na YouTube, Amazon, Spotfy, iTunes, Aple Music, Tidal, Deezer, Pamdora na Boomplay.

Date:23 January 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 257