Thendo Netshishivhe, mudzulapo wa muvhundu wa Vhufuli nnḓa nyana ha Ṱhohoyandou, ovha o farwa lwendo lwe avha a khou takadza vhomakhulu awe vhavhili. Thendo o fara lwendo lwa maḓuvha mararu uyangei khala Kwazulu Ntala khala, Durban na vhomakhulu avho vhavhili he vhadalela la Durban lwau thoma vhutshiloni havho.

U anda ha u dzhiiwa nga khani na u rengiswa ha vhana zwo dovha hafhu u vuwa hafhu. Izwi zwi tevhela u anḓadzwa ha ḽitambwa, “Ro Tshinya Mini” ḽe ḽa ṅwalwa nga muṅwe wa vhanwali vha vhupo ha tshiṱiriki tsha Vhembe.

Hu na khuḓano nga ha vhuhosi kha kusi kwa Phiphidi vhukati ha muṱa wa musanda na muṅwe wa vharangaphanḓa vha lushaka lwa haTshivhase, Mailausumbwa Vho Kennedy Tshivhase. Nga Mugivhela ḽa wa fumbili-sumbe Lambamai, Vho Tshivhase vho furalela ndaela ibvaho khothe khathulo vho bvela phanḓa nau vhea Vhamusanda tshiduloni kha kusi kwa Phiphidi.

Nga murahu ha lwendo lwa minwaha i padaho fuiṋa-mbili, muṅwe wa madzhakanḓila kha sia ḽa pfunzo kha tshiṱiriki tsha Vhembe, Dr Gerson Nthambeleni Rambiyanma vho notha. Dr Rambiyana vho notha ṅwedzi wo fhiraho.

Munna wa minwaha ya furaru-raru, we avha a khou zwimiwa nga mapholisa nga murahu hau ṱhavha mufunwa wawe a lovha, Rinah Malange, o ḓi isa mapholisani a tshiṱitshi tsha Tshilwavhusiku nga mathabama a Lavhuraru ḽino. Rinah ovha e na minwaha ya furaru.

Mufumakadzi wa miṅwaha ya furaru, Fortune Ramkhododo, o farwa nga Lavhuna (25 Lambamai) ḽa vhege yo fhiraho zwi tshi tevhela u wanala ha lushie lwo laṱwa ngomu ha mulonga wa bunga . Tshiwo itsi tsho itea kha kusi kwa Tshikuwi khala Nzhelele.

Tshikolo tshine tsha wanala kha vhupo ha Nzhelele vha khou sasaladzwa zwi tshi tevhela u shumisa tshigwada tsha vhathu vhane vha ambara zwiambaro zwa mivhala ya tshisole uri vhaḓe uvha “gudisa mikhwa” kha vhagudiswa vhane vha sika dzi khuḓano na pfudzungule tshikoloni itsho. Uya nga muvhigo wa zwe zwa itea ubva kha vhagudiswa, vhari vho ṱhaselwa, vhaṅwe vhavho husina zwe vha tshinya kana u khakha.

Dzina ḽa “Mubishopho Khorommbi” ḽi khou leleḓa kha zwilelu zwa vhudavhidzani ha vhushaka u fana na TikTok, izwi ndi nga murahu hau anḓadza thabelo ya maanḓa manzhi na vhatevheli vhavho, thabelo iyo ipfi ‘Thabelo ya Mato’.

Mvuseledzo ya muzika wa sialala wa Tshivenda asi muḽoro fhedzi kha vhaṅwe vha vhoramuzika. Izwi ndi nga murahu hau vhona gaḓa ḽa vhoramuzika vhe vha ḓa kha muṱangano wa nga hau vusuludza muzika wa sialala wa Tshivenda, we wa farelwa Ṱhohoyanḓou. Vhoramuzika avha vha tenda zwauri muzika uḓo vuwa nga huhulu.

Mugudiswa vha murole wa vhufumi-na-thihi a bvaho kha tshikolo tsha Vhulaudzi ngei Tshitavha, Phethani Mabala, o vhuya na mendele wa siḽivhere ubva kha miṱaṱisano ya u gidima ha vhugwena ha vhagudiswa vha zwikolo. Muṱaṱisano uyo wo farelwa vunḓuni ḽa Western Cape mathomoni a ṅwedzi uyu.

U valwa ha shikolo tsha nṱha tsha Magoni zwo sia vhathu vhanzhi kha vhupo uho vhe na mbilaelo, zwihulu kha zwikolo zwa vhupo ha tsini u fana na tshikolo tsha nṱha tsha Sinthumule, vhane vha khou ṱangana na khaedu ya u ḓala ha phera dzau gudela zwine zwa sia zwi khou kwama kushumele kwa vhagudiswa nga nḓila isi yavhuḓi. Innwe ya dzi mbilaelo ndi dzine dza khou ṱahiswa nga vhabebi vhane vhari vhana vhavho avha khou kona u guda zwavhuḓi musi phera idzo dzo ḓala lwo kalulaho.

Vhugevhenga hau ṱangulwa ha mabindu vhu khou vhonala vhu khou anda kha mavhengele tserekano a Elim, izwi ndi nga murahu ha musi mavemu vha tshi tshea ṱhanga ya mavhengele tserekano ya Elim vha dzhena kha ḽiṅwe ḽa mavhengele mahulwane afho, Pep Cell. Izwi zwo bvelela nga Lavhuṱanu ḽa fumi-ṱahe Lambamai.

Kiḽiniki ntswa ya musalauno yo vulwa Thengwe Thondoni, kha vhupo ha Mutale. Kiliniki iyo yo vulwa nga Musumbuluwo wa ḽa fumi-ṱhanu Lambamai. Kiḽiniki iyi ntswa iḓo vhuyedza iḽa kiḽiniki ya kale ye ya fhaṱwa nga minwaha ya gidiḓaṱahe fuiṋa, ye yavha isa shumi zwa zwino sa izwi yovha yo no fhelelwa nga tshifhinga tshau shumiswa. Kiḽiniki iyi iḓo shuma u ḓisela zwisi zwa tsini zwa fumi-mbili nḓisedzo ya zwa mutalo. Zwisi izwi hu katelwa Bashasha, Makhwilidza, na Maheni u tou bula zwiṱuku kha zwinzhi. Zwisi izwi ndi zwine zwa wela fhasi ha vhurangaphanḓa ha Thovhele Vudzidzhena Nethengwe.