Ṅwana wa minwaha miraru o wana mme awe vho vhulawa nḓuni

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Musi ṅwana wa minwaha miraru atshi vhudza mmemuhulu wawe uri mme awe vho vhulawa, ahuna muthu na muthihi we a tenda zwe avha a khou amba. Ori u amba izwi a vhudziwa uri a songo tamba nga lufu sa izwi hu mafhungo mahulwane. Fhedzi nga murahu ha tshifhinga, vho ḓou wana mme a ṅwana uyo vho eḓela kha tivha ḽa malofha vho vhulawa.

Tshiwo itshi tsho bvelela nga Musumbuluwo wa ḽa fumi-ṱhanu, nga matsheloni a awara ya vhufumi nga matsheloni kha kusi kwa Tshivaloni, hune havha khiḽomitha dza fumi-ṱhanu kule na Tshipise. Vho Nkhetheni Mudau (36) hu khou humbulelwa uri vho vhulawa nga mufunwa wavho wa kale nga tshihalifhiraho  munna uyo a sa athu u shavha fhethu he tshiwo tsha bvelela hone. Hu na khonadzeo dzauri ṅwana uyu o vhona bulayo ḽi tshi itea kana mupondi vho tou mu vhudza uri mme awe vho vhulawa vha lovha.

Mukomana wa mupondiwa, Vho Tshengelo Munyai, vhane vha dzula tsini na muḓi wa mupondiwa, vhari vhovha vhe hayani musi ṅwana uyo wa minwaha miraru a tshi swika khavho a vha ṱalutshedza zwauri mme awe vho lovha. “A tshi amba izwo ndo toupfa unga u khou tamba zwe nda ita na u mu kaidza nga hazwo. Ho touvha nga murahu ha tshifhnga he nda ḓelwa nga muhumbulo wauri ndi ye u ṱola hayani ha mme awe, ndi he nda wana murathu wanga o eḓela kha tivha ḽa malofha. Nga thuso i bvaho kha vhahura, ro ḓou kwamana na mapholisa vhe vha swika na vha tshumelo ya shishi. Na zwino athi athu u kholwa uri o ri sia fhano shangoni,” vha amba.

Mukomana avho vho engedza zwauri  vhafunwa avho vhovha na khuḓano, hone avho vha munna vhovha vho no pfuluwa muḓini uyo. “Rovha ri tshi vhona unga khuḓano dzavho dzo tandululwa sa izwi vha munna vhovha vho no wana vhudzulo hunwe, fhedzi zwe zwa ri mangadza ndi u wanulusa zwauri munna uyo ovha a tshi ḓa muḓini afho hone ovha e na khii dza nnḓu,” vha amba.

Vho Munyai vho ṱahisa zwauri vhana vha mupondiwa vharathi vho sala na vhulema ha uvha tsiwana sa izwi mubebi vhavho vho ṱuwa. Vho amba zwauri vha kha nzudzanyo dza mbulungo. Vho Nkhetheni vha ḓo vhulungiwa nga Mugivhela wa ḽa fumbili Lambamai mavhiḓani a muvhundu wavho.

Murangaphanḓa wapo Vho Thendo Nemukula vhari tshiwo itshi tshi touvha masinḓambilu kha vhathu vhanzhi. “Rovha ri roṱhe nga Mugivhela wo fhiraho tshipotoni tsha Nenweli Busy Corner kusini kwa Mbodi, he havha hu na ḓikita ḽa muzika. Vhovha vha tshi sumbedza vho takala vhukuma. Ri khou thusa vha muṱa nga nzudzanyo dza mbulungo,” vha amba.

Mambeli wa mapholisa a Limpopo Brigadier Vho Hlulani Mashaba vho khwaṱhisedza tshiwo, he vhari ho vuliwa mulandu wa bulayo. Muhwelelwa u khou ḓivhea, fhedzi ha athu u farwa zwa zwino, fhedzi ri khou zwimana nae.

Ane avha na vhuṱanzi vhune ha nga thusa kha mulandu uyu kana vhane vha ḓivha hune muhwelelwa avha hone vha khou humbelwa uri vha founele muofisiri wa ṱhoḓisiso, Sgt Makuya kha 082 414 2481, kana vha shumise nomboro dzau thivhela vhugevhenga dza lushaka dza 08600 10111. Vha nga dovha hafhu vha isa muvhigo kha tshiṱitshi tsha mapholisa tsha tsini navho kana vha shumisa MySAPS App.

Date:19 April 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 196