Vhadzulapo vha Phiphidi lwe vha fhisa vhengele ḽa vhafunzi

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Vhadzulapo vha Phiphidi vho sinyuwa lwe vha swika kha u fhisa vhengele ḽa vhafunzi kha kusi uko. Tshiwo itsho tsho bvelela nga Ḽavhuvhili ḽa fumbili-rathi Ṱhafamuhwe nga mathabama a iri ya vhuṱanu.

Kha kusi uku ho ḓala vhugevhenga ho fhambanaho u bva kha u ṱangulwa, u dzhielwa zwiendedzi nga khani, u swika kha mabulayo. Mavemu vha ṱhasela vhapondiwa vhusiku vhe mahayani avho. Mutevhe wa vhathu vhane vho no ṱhaselwa ndi une wa vhilaedza kha vhadzulapo, hone vhari vhapondi vha sumbedza vhe vhathu vhane vha vha khou ḓivha vhapondiwa vhavho zwavhuḓi. Ho no farwa miṱangano minzhi ya vhadzulapo sa nḓila yau lingedza u tandulula thaidzo iyo, fhedzi ahuna thandululo kha miṱangano iyo ngauri vhugevhenga vhu khou nana kha muvhundu uyo.

Uya nga vhuṱanzi he ha swikiswa nga vhadzulapo vhari u sinyuwa uhu ha vhadzulapo lwe vha swika kha u fhisa vhengele ilo ndi tshiwo tshe tsha bvelela vhege yo fhiraho, he mavemu vha ṱangula mudededzi vho nothaho tshiendedzi tshavho, masheleni, na ṱhingokhwalwa tharu nga murahu ha u vha rwa nga tshihali kha ṱhoho. Mavemu ayo vho ḓou vhofha mudededzi avho vha sa athu u shavha. Mudzulapo we asi ṱoḓe u bulwa dzine u bvisela khagala zwauri vhengele iḽo ḽe ḽa fhiswa ḽa vhafunzi Vho Asihashu Munzhedzi ndi ḽine ḽa vhonala hu hone hune mavemu vha ṱangana hone u vhamba maano au gevhenga vhathu.

Vho Rudzani Jonathan Mathemusa, vhane vhavha muṅwaleli wa khoro ya musanda wa Phiphidi, vho khwaṱhisedza uri na ngoho vhugevhenga kusini kwavho ku khou engedzea. “Kha muvhundu washu, ri ṱangana na vhugevhenga ḓuvha ḽivwe na ḽiṅwe. Ndo pfa nga ha u fhiswa ha vhengele, fhedzi zwa zwino athina vhuṱanzi nga vhuḓalo. Sa vhurangaphanḓa, ri khou lingedza u sedzulusa nga ha zwe zwa bvelela zwe zwa swikisa vhadzulapo kha u fhisa vhengele iḽo. Ri ḓo fanela u fara muṱangano na mune wa vhengele hu ne ra ḓo wana sia ḽavho kha zwe zwa bvelela. Kha muṱangano uyu ri ḓo dovha hafhu ra amba na nga ha khaedu dzine vhathu vha khou ṱangana nadzo,” vha amba.

Vhafunzi Vho Munzhedzi vho hanedza uvha na vhuṱumanyi na vhugevhenga vhune ha bvelela hone zwo vha akhamadza u ṱumanywa na vhugevhenga. “Ndovha ndi hayani musi gogo ḽa vhathu vha tshi swika vhengeleni nga mathabama. Vho amba zwauri vha khou ṱoḓa munna ane a vhidzwa Mulisa Kholophe. Munna uyu ndi mu ḓivha ngauri ndi murengi ane o ḓowelea vhengeleni ḽanga, fhedzi ovha e siho nga iḽo ḓuvha. Vho ḓou thoma u tshinyadza vha fhisa vhengele ḽanga. Athi ḓivhi tshithu nga ha vhugevhenga, ndi muḓinda wa mudzimu ane a khou lingedza u ṱutshelisa vhathu na vhugevhenga,” vha amba.

Vhafunzi vhari vha humbulela uri vhaṅwe vharengisi ndi vhone vhane vho rumela gogo ḽa vhathu u ḓa u fhisa vhengele ḽavho. Tshinyalelo kha u fhiswa uhu i anganyelwa kha masheleni a zwigidi zwa ḓana ḽithihi. Vhari vho vhiga tshiwo itshi tshiṱitshini tsha mapholisa tsha tsini.

Date:01 April 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 186