Muofhe o kunda zwoṱhe nga u thoma zwa vhulimi

Ṱhalutshedzo nga Khathutshelo Raliphaswa.

Naho hu na ṱhahelelo ya mishumo u mona na Afrika Tshipembe zwihulu kha vhaswa, vhaṅwe vha vhaswa vhane vha dzula kha vhupo ha mahayani vha khou shela mulenzhe khau alusa ikonomi nga uḓi sikela mishumo. Izwi zwo vhonala kha Muofhe Matsheketsheke wa minwaha ya fumbili-sumbe ane a bva kha kusi kwa Hagumbu kha vhupo ha Niani, nnḓa nyana ha Musina.

Muofhe, ane ndi mutshudeni wa gudedzi ḽa Yunivesithi ya Afrika Tshipembe (UNISA) hone a khou gudela zwa masheleni, u khou ḓi sikela dzina kha buḓo ḽine ho ḓala vhathu vha vhanna ḽa vhulimi. O aluwa atshi thusa vhabebi vhaṅwe, vhane vhovha vha tshi dzulela u ṱavha miroho hayani uri vha ḓi unḓa hayani.

“Ndovha ndi tshi shuma masimuni ḓuvha ḽiṅwe na ḽiṅwe musi ndi tshi vhuya tshikoloni, hone ndovha ndi tshi ḓiphina ngazwo, ndi sa ḓivhi uri ndi u tutuwa ha dzangalelo ḽanga kha zwa uvha rabulasi. Zwa zwino ndi na bulasi kana mavu ane ndi hekhithara ṱhanu hune nda ṱavha zwibveledzwa zwi ngaho mandande, khavhishi, mafhuri, phiriphiri, dzi ṋawa dala, na miṅwe miroho yau fhambana,” a amba.

Zwine zwa ṱuṱuwedza Muofhe ndi zwauri hango thoma a lindela ndambedzo ubva kha vhathu kana zwiimiswa uri a kone u wedza ndoro yawe. “Naho huuri vhulimi vhua ḓura kha sia ḽa masheleni, nṋe athi athu u vhuya nda wana ndambadzo huṅwe fhethu. Ndo thoma nga zwiṱuku ndi tshi rengisa zwibveledzwa zwanga hayani, ndi tshi khou vhulunga masheleni uri ndi kone ua shumisa kha zwa vhulimi. Ṋamusi, ndi rengisa zwibveledzwa zwanga kha mimakete ine ya wanala na fhethu kule u fana na Johannesburg na kha vhaṅwe u mona na vunḓu ḽashu ḽa Limpopo. Nda rengisela Durban na Cape Town. Ndi dovha hafhu ndavha na vhathu vhane vha tou ḓa vha tshi renga vha rengisela mimakete ya tshitshavha na maṅwe mavhengele,” a amba.

Nga kha mushumo wawe wa Muofhe Farming and Projects, Muofhe ono sikela vhathu vhararu mishumo ya tshoṱhe vhane vha wanala kha vhupo uho vhane vhovha vha sa shumi. U dovha hafhu a thola vhathu vhane vha swika hanefha vhukati ha fumbili na fuṱhanu nga zwifhinga zwau kana zwiṅwe zwibveledzwa ubva  tsimu.

Oḓi amba zwauri a zwingo leluwa u tshimbidza bindu ḽa vhulimi isina ndambadzo naluthihi. “Ndi ṱoḓa maṱiraka au endedza zwibveledzwa zwanga uya kha mimakete yofhambanaho, hone ndi ṱoḓa na maḓi au sheledza zwibveledzwa zwanga. Fhedzi u lila azwi thusi tshithu kana u ḓisa tshanduko. U shuma wo ḓi funga na uḓi imisela zwi nṱuṱuwedza uri ndi shume nga maanḓa ḓuvha ḽiṅwe na ḽiṅwe. Ndi ita khuwelelo na kha vhaṅwe vhaswa uri vha ḓi imise vha ḓi sikele mishumo vhone vhane ngau thoma zwiṱuku zwine vha nga kona, zwine zwa ḓo aluwa nga murahu ha tshifhinga,” a amba.

Mushumisani wa Muofhe kha zwa mabindu, Zwanga Dombo, o amba zwauri ua takalela u shuma na Muofhe sa izwi e muthu muswa ane una ṱhuṱhuwedzo hone ha tendi khau kundelwa. “Muofhe o thoma zwoṱhe ubva fhasi, hone zwezwi musi zwifhinga zwi tshi khou aluwa, zwithu zwi khouvha zwa khwine ḓuvha ḽiṅwe na ḽiṅwe. U touvha ṱhuṱhuwedzo nga eṱhe kha vhaṅwe vhana vha vharema uri muthu ua kona u wedza ndoro dzawe arali atshi tenda miḽoro yawe,” vha amba.

Date:24 October 2024

By:

Read: 61