Aḽibamu ya Tarivinga Maedza i khou pembela lufuno.

Tshiṱori nga Kaizer Nengovhela. Ṱhalutshedzo nga Khathutshelo Raliphaswa.

Ramuzika wa mafulufulu Tarivinga Maedza o fhedza u kanḓisa aḽibamu yawe ya rhumba/tshingondo ine ya vhidziwa Hatikanganwe, ine yo ḓala nga nyimbo dza lufuno.

Uya nga Maedza, aḽibamu yawe ndi ine ya khou shuma zwavhuḓi kha dzi thengiso, naho isi ine ya aluswa kana u anḓadzwa vhunzhi ha zwifhinga. O engedza zwauri ndi nyimbo ndi dzine dzo ḓowelea kha muzika wa tshingondo hone dzi khou tambiwa nga vhunzhi kha zwiṱitshi zwa dzi radio hu tshi katelwa radio dza vhupo ha hayani, dza dzingu khathihi na dza lushaka.

Aḽibamu iyi ntswa i na nyimbo dza malo, hune ari dziṅwe ndi dzine vhafuni vhatevheli vhawe vha ḓo dzi takalela, hu tshi katelwa nyimbo dzi fanaho na 'Never Give Up, Manzwi, na Rudo Gara'.

“Tshiṅwe tshithu tshine nda tshi funesa nga tshingondo ndi zwauri asi muzika une wa swika khauri vhathu vhari ndi wa kale,” a amba. O engedza zwauri aḽibamu ntswa ndi ine yo hwala nyimbo dza khwine kha dza aḽibamu ya murahu. “Ndi livhuwa zwihulu kha vhafuni vhatevheli vha muzika wanga vhane vha dzulela u ntikedza ngau renga dzi aḽibamu dzanga. Nda dovha hafhu nda livhuwa zwiṱitshi zwoṱhe zwa dzi radio vhane vha dzulela u tamba nyimbo dzanga misi yoṱhe,” a amba.

Naho a tshi ḓi takalela u bvelela ha buḓo ḽawe, Maedza o amba zwauri ha nga ḓo awela muzika wa tshingondo usa athu u lavheleswa nga nga nḓila ine yo tea muzika wa tshingondo. “Vhaṅwe vhathu vha khaḓi vhona muzika wa tshingondo sa muzika wa fhasi, fhedzi ndi ḓo lwa nga nḓila dzoṱhe uri vhathu vha kone u vhona zwauri muzika wa tshingondo ndi mme a tshaka ya mizika yoṱhe nga u angaredza,” a amba.

Nyimbo dzoṱhe dzi amba milaedza ine yo fhambana kha vhoṱhe vhaṱuku na vhahulwane. “Ndo no lingedza tshaka dzoṱhe dza mizika kha miṅwaha yo fhiraho hone nda lidza na vho ramuzika vha khwine u mona na shango ḽashu. Nga tshenzhemo tshine ndi natsho, ndi tenda zwauri ndi nga takula muzika wa tshingondo ubva hune wavha hone zwa zwino u ya nṱha. Arali vha thetshelesa heyi aḽibamu, vha nga kona u zwi pfa uri ndi aḽibamu ine yo sikiwa nga nḓila ya khwine hone yo bveledza nyimbo dza khwine,” a engedza.

Zwe a amba ndi zwauri o nyamisea ngau vhona uri muzika wa tshingondo au swikeleli hafho hune havha ho tea kha nḓowetshumo ya muzika fhano Afrika Tshipembe. A amba zwauri arali vhathu kana vho ramuzika vha tou farana vhavha tshithu tshithihi, na muvhuso aunga vha dzhieli nṱha.

Date:17 October 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 54