Munna o farelwa u gwa vhiḓa ḽa khaladzi awe fhala Shanzha, Nzhelele.

Tshiṱori nga Maanda Bele. Ṱhalutshedzo nga Khathutshelo Raliphaswa.

Tshiwo tsha u gwilulwa ha vhiḓa zwo sia zwo shusha vhadzulapo vha Nzhelele, Shanzha na Dopeni. Vha na nyofho yauri zwine zwovha zwi tshi itiwa dzi ḓoroboni zwau gwilulwa ha mavhiḓa zwo no swika fhano kha vhupo ha mahayani, hune mavhiḓani hovha hu tshi ṱhonifhiwa.

Nga Lavhuvhili ḽa vhege yo fhiraho, mapholisa vha Siloam vho fara munna wa minwaha ya furaru, Lidzebe Thabelo, nga murahu ha u wanala a tshi khou gwa vhiḓa ḽa khaladzi awe fhaḽa Shanzha. Tshiwo itsho ndi tshe tsha itea nga awara ya vhumalo madekwana.

Muambeli wa mapholisa vha tshiṱiriki tsha Vhembe Vho W/O Vuledzani Dathi vho khwaṱhisedza uri tshiwo itsho tsho itea, hone ndi zwithu zwe zwa limuwiwa nga makhulu a Thabelo, Vho Budeli Thinavhuyo, ngau vhona Thabelo a tshi khou ita zwithu zwine a zwingo ḓowelea.

“Nga Musumbuluwo, Thabelo o bva hayani hawe o fara piki na fosholo, a tshi amba zwauri u khou ya u shuma huṅwe he a vhidziwa hone. Fhedzi vho ḓou thoma u mu humbulela zwithu zwisi zwavhuḓi nga matsheloni a ḓuvha ḽitevhelaho o fara zwishumiswa izwo hafhu, “ Vho Dathi vha amba. Vho Thinavhuyo vho ḓou vhudza muḓulu wavho, Ea ḓou mu sala murahu u vhuya u swika a tshi swika mavhiḓani.

“Ngei mavhiḓani, makhulu awe na vhadzulapo vho wana Thabelo o ambara zwiambaro zwau shuma, e kati na u gwa vhiḓa ḽa khaladzi awe. Musi atshi vhudziseswa uri ndi ngani a khou ita izwo, o ḓou amba zwauri ene ovha a tshi khou ṱoḓa u vhea maluvha kha vhiḓa ḽa khaladzi awe fhedzi zwe zwa akhamadza vhathu ndiuri ovha asina maluvha khae. Zwe avha e nazwo hovha hu saga ḽisina tshithu nga ngomu. Mapholisa vho vhidziwa afho he tshiwo tsha itea hone, vha swika vha fara Thabelo na zwenezwo,” Hu amba Vho Dathi.

“Zwe Thabelo a ita zwo vhaisa lushaka, hone zwi vhoniwa sa lunyadzo kha vhafu khathihi na uvha mulandu muhulu,” Vho Dathi vha engedza.

Hu vhonala Thabelo ovha e kha maano au ṱoḓa u rengisa marambo a khaladzi awe, sa izwi ri ngasi thudzele kule maya maitele maswa au ṱanganyisa zwidzidzivhadzi na luphuse lwa marambo o kuyiwa vha daha.

Izwi ndi zwithu zwine zwo no ḓowelea fhethu hune ha fana na Atteridgeville, Pretoria, hune vhadzia u daha dzi mbanzhe vha dzi shumisa vho shela na luphuse lune lwa sala ho kuwiwa marambo a vhafu. Naho husina vhuṱanzi vhune ha fusha vhune ha ṱumanya Thabelo na zwiito izwo, vhadzulapo vha na nyofho yauri u tambudza zwidzidzivhadzi zwi ngavha zwo ṱuṱuwedza zwiito izwi.

Murangaphanḓa wa tshitshavha Vho Richard Mukhaninga vho ṱahisa zwauri Thabelo ndi muthu ane a ḓivhelwa u shumisa zwidzidzivhadzi kha muvhundu wonoyo. “Zwia vhaisa u vhona muswa e kha zwiito zwo rali hune a swika hune a tshinyadza vhulalo ha shaka lawe. Zwi ri sia ri na mbudziso yauri ri khou ya ngafhi sa lushaka. Hezwi zwi vhaisa roṱhe vhadzulapo na vha muṱa,” Mukhaninga vha amba.

Kha vidio ye ya leleḓa ya tshiwo, hu na mufumakadzi vhe vha pfa vha tshi khou pomoka Thabelo uri u khou shumisa zwidzidzivhadzi. Musi Thabelo a tshi vhudziswa arali a tshi daha mafola na zwidzidzivhadzi, zwe Thabelo a fhindula hovha zwauri ene ha na dzi ṱhama.

Mapholisa vha Siloam vha khou bvela phanḓa na ṱhoḓisiso dzavho nau vhona uri vhathu vhaa tsireledza vhudzula vhafu(Mavhidani).

Itshi asi tshiwo tsha u thoma u itea kha tshiṱiriki tsha Vhembe. Nga ṅwaha wa Khubvumedzi 2017, vhahwelelwa vhaṱanu, hu tshi katelwa na vhomaine vhavhili, vho ḓou fariwa malugana na zwiito zwa u tshinyadza mavhiḓa, u tswa miraḓo ya mivhili, vha rengisa. Izwo zwovha zwo itea Tahitavha-Sambandou na Folovhodwe.

Thabelo oḓi vhonadza khothe ya madzhisiṱiraṱa ya Ṱhohoyanḓou nga Lavhuraru ḽa ṱahe Tshimedzi. Fhedzi musi ri tshi ṅwala tshiṱori itshi hovha hu sa athu u ḓivhadzwa tsheo ya khothe.

Date:17 October 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology. He is passionate about current news and international affairs. He worked as part of the Zoutnet team as an intern in 2017. He is currently a freelance journalist specialising in news from the Vhembe district.

Read: 76