Neville u khou ṱoḓa u thusa vhanwe u lwa na vhulwadze ha Cancer

Tshiṱori nga Maanḓa Bele. Ṱhalutshedzo nga Khathutshelo Raliphaswa.

E na miṅwedzi ya ṱahe fhedzi, Neville Philemon Mufhadi ane abva Hamusekwa Ngundu fhala Nzhelele o ḓou wana zwauri u na vhulwadze ha medullablastoma, vhune havha vhulwadze ha u bva tshilonda tshihulu kha maluvhi. Zwa zwino u na minwaha ya fumbili, hune Neville o shandukisa nndwa yawe na cancer uri huvhe fulo ḽau Pfumbudza vhathu nga ha vhulwadze uhu nau tikedza vhane vha tshila na vhulwadze uhu.

Lwendo lwawe lwo thoma nga ṅwaha wa gidimbili fumi-raru, musi e mugudiswa wa murole wa vhuṋa, he a valelwa vhuongeloni ha Polokwane musi a tshi khou ṅwala mulingo wawe wau fhedza. “Ndovha na mutsiko muhulu ngauri ndovha ndi vhuongeloni nda kundelwa u ṅwala mulingo wanga, zwe zwa ita uri ndi dovholole murole uyo wa vhuṋa,” a amba.

Nga ṅwaha wa 2014, Neville  oḓou itiwa miaro mivhili ye ya shandukisa vhutshilo hawe:muaro wau thoma hovha wa kokodza luḓi kha maluvhi awe, muaro wa vhuvhili havha u bvisa he tshila tshilonda maluvhini. Zwi tshi tevhela miaro iyo, o rathela kha maitele haya ane a vhidziwa Chemotherapy na radiation therapy, zwe zwa sia e na dzi khaedu muvhilini hu tshi katelwa na tshanduko ya nyaluwo ya mavhudzi khae.

Hovha na mutsiko wa muvhili khathihi na vhupfiwa. “Nga murahu ha hezwi zwoṱhe, ndo thoma u ḓi vhenga ngauri ndovha ndi tshi khou kundelwa u ṱanganedza nyimele yanga,” a amba. U humela tshikoloni zwo konḓa khae, sa izwi ovha a tshi koleliwa nga vhaṅwe vhagudiswa tshikoloni. “Ndovha ndi tshi dzulela u ambara miṅadzi, fhedzi vhaṅwe vhana vhovha vha tshi mmbudza nga madzina hone vha sa tendi u tamba na nne, vha tshi lila kana u amba zwauri ndi ḓo vha ṋea vhulwadze vhune ndovha ndi tshi khou lwa naho,” a engedza.

Naho o ṱangana na dzi khaedu, Neville o wana maanḓa kha lutendo lwawe, vha muṱa hayani, dzi ṱhama, khathihi na tshitshavha tsha hune a dzula hone. “Ndi livhuwa mudzimu ngau nnea maanḓa nau ntsireledza kha zwoṱhe. Ndo kona u zwi vhona uri zwovha zwi puḽane dza mudzimu, hone ndi takalela nau hulisa lwendo wanga nau kunda hanga,” a amba.

U kondelela ha Neville zwo mu thusa, hone zwa zwino o phasa murole wa vhufumi na vhuvhili. Zwa zwino ndi mutshudeni ane a khou gudela zwa vhunese kha gudedzi ḽa Royal MPILO College. “Nga murahu hau kunda cancer, ndo ḓou ḓi vhudza uri ndi ḓo thusa vhanwe vhane vha khou ṱangana na zwe nṋe ndo pfukha khazwo,” a amba.

Nga ḽa rathi Shundunthule uno ṅwaha, Neville o tumbula lwa tshiofisi dzangano ḽawe ḽine a ḽi vhidza The Giving of Hope, dzangano ḽine ḽa Pfumbudza vhathu nga ha vhulwadze ha cancer nau tikedza vhathu vhatshilaho na vhulwadze ha cancer, zwihulu kha mivhundu ine vhathu vha na ṱhahelelo ya nḓivho nga ha vhulwadze uhu. “Ndo vhumba dzangano iḽi ndo vhona zwauri hu tshena ṱhahelelo ya nḓivho nga ha vhulwadze uhu nauri vhathu vhanzhi vha ṱangana na vhuleme musi vha tshi khou lwa na hovhu vhulwadze. Tshipikwa tshihulu ndiuri huvhe na u pfumbudza a nga ha malwadze au fhambana mivhunduni” a amba.

Kha vhurangaphanda ha dzangano ḽawe hu na mmane wawe Vho Ndivhuwo Bridge Mofati, na mme awe Vho Portia Tshimangadzo Mufhadi, vhane vha khou mu tikedza kha lwendo lwawe. Zwa zwino hafha kha dzangano ḽawe hu na vhathu vhane vha shuma vha songo lavhelela malamba vhane vha swika fumi.

Date:10 October 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology. He is passionate about current news and international affairs. He worked as part of the Zoutnet team as an intern in 2017. He is currently a freelance journalist specialising in news from the Vhembe district.

Read: 95