Mufumakadzi vho ponya u tzhipiwa ngei Haluvhimbi

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

Kha zwine vhanwe vhari ndi uvha na mbilu ndenya, mufumakadzi wa minwaha ya furaru-thihi o ḓou ponya u tzhipiwa nga munna wa minwaha ya fumbili-malo ngau lwedzana nae u vhuya u swika a tshi mu luma lulimi sa izwi ovha a tshi khou lingedza u mu tzhipa.

Tshiwo itsho tshobvelela Haluvhimbi, hune havha nnḓa nyana ha ḓorobo ya Ṱhohoyandou, nga Lavhuvhili ḽa fumbili-iṋa Khubvumedzi nga awara dza madekwana nga awara ya vhufumi na thihi. Mufumakadzi avho vhane avhango ṱaluswa, vho amba zwauri vhovha vha tshi khou bva sosani ḽa tsini na hayani havho u ḓiphina na vhanwe. Ndi he vhari vhe nḓilani yau vhuya hayani vha pfa muhwelelwa uyo a tshi tshimbila nga murahu havho.

“Musi ndi sa a athu u tou ṱalukanya zwavhuḓi zwine zwovha zwi tshi khou itea, munna uyo o ḓou u pfara nga mukulo a thoma u nshishimedza. Ndo ḓou lingedza u lwa nae, fhedzi nda pfa ndi khou lwa na zwine zwa khou nkunda. Hu saathu u fhela na mithethe mingana ndavha ndo no wela fhasi buseni, “ vha amba.

Mufumakadzi avho vho ḓou limuwa zwauri vha khomboni hone vha nga vhulaya. Vho ḓou ḓi ita unga vho laṱela fulufhelo kana u fhela maanḓa kha nndwa iyo he vha vhudza muhumbulelwa uri nga ite zwine a ṱoḓa fhedzi asi vha huvhadze. Ndi hanefho he mupondi avha ono thoma u ṱoḓa u bvula zwiambaro uri a vha tzhipe hone a tshi khou lingedza u vha bvula zwiambaro.

“O thoma nga nkhisa nau ṱoḓa u nrembulusa. Ndi he nda wana maanḓa anga murahu, nda mu luma mulimo ndo fara kha vhudzimu hawe. O ḓou fhela maanḓa na zwenezwo, nda kona u shavha afho tsini nae. O ḓou shavhela masimuni a ngalangala,” vha amba.

Mupondiwa vho ḓou gidimela kha miḓi ya tsini u wana thuso. Ndi he vha fhelekedzwa nga vhanwe vhadzulapo u humela ha tshiwo tsha itea hone, he vha wana tshipiḓa tsha lulimi lwa mupondi na ṱhingokhwalwa ya mupondiwa yo siiwa hanefho.

“Hezwo zwoṱhe zwo mmbaisa muyani. Ndo sala na mafuvhalo, hone ndi dzulela u nukhedza lwefha lwa malofha. Tshifhinga tshoṱhe musi ndi tshi nwa maḓi, ndi pfa unga hu na malofha ngomu maḓini. Athi kholwi uri ndi nga bva ndo hangwa zwe zwa itea, fhedzi kha zwoṱhe, ndi livhuwa mudzimu ndo kona u phulusa vhutshilo hanga,” vha amba.

Murangaphanḓa wa muvhundu uyo, Vho Emmanuel Ndou, vhane ndi tshanḓa tsha mudzulatshidulo wa davhi ḽa SANCO afho Haluvhimbi, vho amba zwauri zwiwo zwau rali a zwingo ḓowelea kha muvhundu uyu. Vho ṱahisa mufumakadzi vha mupondiwa sa muhaga ngei vha kona u ḓi lwela kha mupondi wavho.

“Naho ri tshi khou takalela zwe mufumakadzi avha vha ita, ri dovha hafhu ra vhilaedzwa nga u anda ha vhugevhenga vhune ha khou itea kha vhupo hashu. Asi kale ho ṱangulwa thekhisi mbili dza iswa masimuni a tsini, he dza ḓou tshinyadzwa. Dzi bekhara nadzo dzi fhuriwa ḓuvha ḽiṅwe na ḽiṅwe. Zwine zwa vhilaedza ndi zwauri vhathu vhane vha bva nnḓa vha khou ḓa u ita vhutshinyi na vhugevhenga kha vhupo hashu. Vhupondi wau tzhipa ndi ane a bva Matangari hone asi mudzulapo wa Haluvhimbi. Hezwi zwoṱhe zwi sia zwo ṋea muvhundu washu dzina ḽine asi ḽavhuḓi na luthihi, fhedzi zworalo zwi dovha hafhu zwa ri ṋea ngudo yauri vhathu vhane vha ḓa u dzula fhano vha fanela u thoma vha ṱoliwa zwavhuḓi uri ri thivhele zwiwo zwa u fana na itshi khau itea,” vha amba.

Muambeli wa mapholisa kha tshitiriki tsha Vhembe W/O Vho Vuledzani Dathi vho khwaṱhisedza tshiwo. “Mupondi o kona u shavha he tshiwo tsha itea hone, fhedzi nga Lavhuṋa la fumbili – rathi Khubvumedzi, o ḓou fariwa o ya vhuongeloni ha Donald Fraser u wana thuso sa izwi ovha o lumiwa lulimi. O ḓou farelwa hanefho hone ndi ane a ḓivhiwa nga ḽa Mulalo Bika ‘Frazer’.

Mupondi o no ḓi vhonadza khothe ya madzhisiṱiraṱa ya Thohoyandou e siho ngomu khothe nga Lavhuṱanu ḽa vhege yo fhiraho sa izwi a tshe vhuongeloni o lindiwa nga mapholisa. Mulandu wawe wo fhiriselwa phanḓa kha ḽa -sumbe Tshimedzi.

Date:04 October 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 279