Mulandu wa Gadisi wo fhiriselwa phanḓa uri hu neiwe ḓuvha ḽa tsengo.

Tshiṱori nga Victor Mukwevho. Ṱhalutshedzo nga Khathutshelo Raliphaswa.

Maine ane a dzulela uvha milomoni ya vhathu a dovha hafhu avha mushumi wa zwa mabulannga, Azwidohwi Fidelis Gadisi a bvaho Khubvi o hanelwa khumbelo ya beiḽi nga vha khothe ya madzhisiṱiraṱa ya Ṱhohoyanḓou nga Musumbuluwo nga masiari.

Gadisi ndi ane a khou hwelelwa uri o rwa mufumakadzi wawe, Nyelisani Phathutshedzo Masakona (32), a lovha nga ḽa fumbili-sumbe Fulwana ṅwaha uno. Nga murahu hau ita tshiwo itsho tsha masinḓambilu, ndi he Gadisi a ya uḓi vhiga  mapholisani a Thohoyandou.

Musi a tshi ḓi vhonadza khothe uri a ite khumbelo ya beiḽi lwa u tou thoma nga ḽa ṱhanu Khubvumedzi, Gadisi o amba zwauri ene u tou ḓi shuma kha yeyi nḓowetshumo ya zwa mabulannga na u vha maine. Nga kha muimeleli wawe wa Legal Aid, vho amba zwauri ono thola vhathu uri vha shume kha mishumo ine aishuma zwawe hone u khou fanela u ya hayani u ṱhogomela vhana vhawe vhaṋa, vhane khavho mutuku kha vhothe ndi wa minwaha miṋa fhedzi.

Muimeleli wa Gadisi vho vhudza khothe zwauri Gadisi, ane a shuma sa maine, u thusa vhathu vhanzhi nga mishonga yawe. Gadisi o amba zwauri hu na vhathu vhanzhi vhane vha khou ṱangana na dzi khaedu dzine  ene e eṱhe ane anga thusa kha khaedu idzo. O dovha hafhu a amba zwauri muya wawe wau fhodza u khou mu tambudza musi e dzhele, zwine zwa ita uri tshiṅwe tshifhinga a sokou wa, zwine a tenda zwauri ndi tsumbo yauri vhadzimu vhawe vho sinyuwa sa izwi a sa khou thusa vhathu nga kha maanḓa awe au fhodza nau thusa vhathu.

Muvhuso wo hanedza khumbelo ya beiḽi ya Gadisi, zwine zwa touvha khagala zwauri asi muthu ane ado vhofhololwa zwa zwino. Vha tshi ṋea vhuṱanzi vho imelela muvhuso, Capt Rasilingwane Edward Mawela, vhane vhavha commander wa yunithi ya milandu na dzi khakhathi kha tshiṱiriki tsha Vhembe, vho ṱahisa Gadisi sa muthu ane avha khombo hone ha faneli u neiwa beiḽi. Vho gwa zwauri arali Gadisi a vhofhololwa, a nga shushedza dzi ṱhanzi athithisa mulayo wa zwa mulayo. Vho Mawela vho amba zwauri Gadisi ovha o no farelwa milandu miraru murahu he a vhonwa mulandu kha milandu miraru yau ṱhasela oḓi imisela u huvhadza (GBH).

Musi vha tshi vhudziswa nga vha muvhuso arali vhono vhuya vha vha na nyambedzano na dzi ṱhanzi dze dza zwi vhona Gadisi a tshi rwa mufumakadzi wawe, Vho Mawela vho amba zwauri vhana avho vhana vhovha vhe hone afho tshiwo tshi tshi itea.

“Vhana vhawe vho amba zwauri nga murahu ha u rwa mufumakadzi, Gadisi o ḓou khiela lufhera a mbo ṱuwa. Vho amba zwauri mme avho vho lingedza u vhidzelela vha tshi ṱoḓa thuso, fhedzi zwe vhutoto sa izwi lufhera lwovha lwo khielwa. Musi a tshi vhuya, o dou edela kha mubete uthihi , zwine ṱhanwe vhovha vho no lovha,” vha amba.

Vho Mawela vho engedza zwauri vho vha na nyambedzano na vhana vha Vho Gadisi, vhane zwa zwino vha khou dzula na murathu wa mme avho Damani hanefho Khubvi.

“Vhana vha khou ofha uri ṱhanwe na khotsi avho vha nga vha vhulaha sa izwi mme vhasi tsheho shangoni. Vhadzulatsini vho pfa mufumakadzi wawe a tshi lila nga tshifhinga tsha musi atshi ṱhaselwa hone navho vha na nyofho uri arali a vhofhololwa anga vha ṱhasela zwa izwi e muthu ane u na dzi khakhathi,” vha amba.

Vho Mawela vho ṱahisa na zwauri Gadisi ovha na tshivhindi tshau shushedza vhoramafhungo musi e khothoni.

Madzhisiṱiraṱa Vho Carol Ramahuma vho wana zwauri muhwelelwa o kundelwa u ṱahisa makumedzwa a khwine ane anga tendela uri a neiwe beiḽi. Vho hana khumbelo ya beiḽi, hone mulandu ndi une wo fhiriselwa phanḓa uya kha ḽa furaru Tshimedzi ngei khothe khulwane hune ha ḓo ḓivhadzwa datumu ya tsengo.

Date:20 September 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 24