Madimbo na Mabvete vha ḓo wana dzi sola na Wi-Fi zwa mahala

Ṱhalutshedzo nga Khathutshelo Raliphaswa.

Miḓi ine ya paḓa maḓana a sumbe kha vhupo ha Madimbo na Mabvete vha ḓo vhuyela nga maitele a mafulufulu a microgrid solar-energy kha miṅwedzi miraru one ya khou ḓa. Izwi zwo bviselwa khagala nga minisiṱa vha muḓagasi na mafulufulu, Dokotela Vho Kgosientsho Ramokgopa, musi vha tshi rwela ṱari mushumo wa mafulufulu wau thoma une wa vhidziwa uri Micro-grid Solar-Energy. Mushumo wau rwela ṱari ndi we wa itiwa nga Sondaha ya ḽa fumi-raru Tshimedzi.

Mushumo uyu ndi wau thoma u itiwa kha shango ḽashu ḽa Afrika Tshipembe, hone ho vhetshelwa thungo masheleni a swikaho R20 miḽiyoni uri a shume khau fhedzisa mushumo wa u fhaṱa tshiko tsha muḓagasi. Mivhundu iyo mivhili ine ya wanala devhula ha Vhembe, ho tumbulwa nga murahu ha uri tshigwada tsha miraḓo ya ofisi ya minisiṱa

Mushumo hoyu u ḓovha wo dzula fhethu huvhili:Madimbo na Mabvete. Dziṅwe phaneḽe dza sola dzi ḓo shuma u kokodza ḓuvha, ḽine ḽa ḓo shumiswa miḓini nga kha mapala na dzi thambo. Hu ḓo dovha hafhu havha na dzi beṱiri dzine dza ḓo shuma nga zwifhinga zwa dzi mvula. Mushumo uyu u ḓo katela mavhone a dzi sola na Wi-Fi ya mahala fhethu ha nnyi na nnyi kha mivhundu iyo mivhili. Wi-Fi i ḓovha i mahala na kha vhadzulapo vha afho mivhunduni.

Musi vha tshi rwela ṱari mushumo uyu, Dr Kgosientsho Ramokgopa, vho amba zwauri ndi zwa vhuṱhogwa uri vhadzulapo vha Afrika Tshipembe vha thome uvha na fulufhelo kha zwiko zwavho zwau bveledza. “Mushumo uyu au ḓuri hone u ṱoḓa zwibveledzwa zwa vhupo. Ri tshi thoma hoyu mushumo wau ḓi kokodzela mafulufulu rine vhane, rivha ri tshi khou fhaṱa mutheo wo khwaṱhaho wa mveledziso, sa izwi husina shango ḽine li nga bvelela husina muḓagasi,” Vho Ramokgopa vha amba.

Minisiṱa vho amba zwauri vha dovha vhe mushumoni kha ino vhege uri mushumo u takutshedze zwino. Vho engedza zwauri zwenezwo musi mushumo u tshi khunyeledzwa, wa thoma u shuma, u ḓo thoma u iswa na kha zwiṅwe zwipiḓa u mona na shango sa nḓila yau lingedza u lwa na khaedu ya nḓisedzo ya muḓagasi.

Thovhele Vho Ratshibvumo II Rambuda vho ṱanganedza mushumo uyu, he vha amba zwauri u ḓo thusa khau sika mishumo mivhunduni iyo. “Ndo imela vharangaphanḓa vhoṱhe vhane vha wela fhasi ha ndaulo ya khoro ya ha Rambuda, ri ṋea minisiṱa thendelo yauri vha thome na mushumo wavho kha mavu ashu. Ri tenda zwauri ndi zwithu zwine zwa ḓo shandukisa zwithu zwinzhi kha mivhundu yashu,” vha amba.

“Nga nnḓa hau vhuyelwa kha mafulufulu a sola, ro takala ngauri vhathu vhashu vha ḓo kona u wana mishumo hezwi hoyu mushumo u kati nahone vha ḓo bvela phanḓa uvha na mishumo musi hu na zwikhala kha mushumo uyu uya phanḓa,” vha engedza.

Neḓorobo vha masipala wapo wa Musina, Vho Nkhanedzeni Godfrey Mawela vho zwi khwaṱhisedza kha minisiṱa na miraḓo ya ofisi yavho uri vha do ṱhogomela zwishumiswa zwa mushumo uyu kha mivhundu yoṱhe. “Ri pfa ri vha mashudu uvha vhathu vha u tou thoma kha shango loṱhe ḽa Afrika Tshipembe vhe vha neiwa itshi tshikhala tshauri mushumo hoyu u thome kha mavu a masipala washu,” vha amba.

Date:18 October 2024

By:

Read: 11