Munna e a vhulaha mufunwa wawe o hanelwa beili khothe.

Tshiṱori nga Victor Mukwevho. Ṱhalutshedzo nga Khathutshelo Raliphaswa.

Vha muṱa wa ha Funanani Patience Mbadzi vho vha vho ḓalelwa nga dakalo ngomu khothe musi khumbelo ya beiḽi ya Avhapfani Eric Mundalamo i tshi hanwa nga madzhisiṱiraṱa wa khothe ya Ṱhohoyandou nga Lavhuṱanu ḽa vhege yo fhiraho. Mundalamo u khou hweswa mulandu wau vhulaha mufumakadzi wawe wa kale we avha a khou imba khakhwaira ya kerekeni ya Precious Blood of Jesus Christian Church ngei Makonde Shadani.

Musi ho no netshedzwa khaṱhululo nga madzhisiṱiraṱa Vho Grace Mashau, murathu wa musadziavhane Lienet Mbedzi, o ḓou tou hwelela kha Mundalamo he a bvisa maipfi a: “Iyani hune ha fanela uvha hone, muvhulahi onoyu.” Vhalwelapfanelo dza mbeu vhe vhavha vhe afho khothe vho ḓou thoma nga nyimbo dzavho, vha tshi sasaladza avho vhane vha tambudza vhana na vhafumakadzi shangoni lashu.

Mundalamo o farelwa u vhulaha mufamakadzi wawe wa kale nga nḓila ya tshiṱuhu, Funanani Patience Mbedzi, nga ḽa furaru Ṱhafamuhwe ṅwaha uno. Ovha a tshi ḓivhelwa uvha murangaphanḓa wa khwairi hone tshiwo itsho tsho itea musi vhe kati nau losha kerekeni.

Funanani Mbedzi ovha e na minwaha ya fuiṋa-mbili hone e muḓivhalea muvhunduni wa Khubvi. Ovha a tshi dovha hafhu avha ramabindu e na bindu ḽawe ḽa Funi’s Hair Salon.

Nga tshifhinga tsha khumbelo ya beiḽi, zwe zwa dzhia maḓuvha mavhili, muimeleli wamulayo wa Mundalamo, Vho Rendani Netshiunda, vhovha vhone vhe vha thoma u mu vhudzisesa sa nḓila yau lingedza u ṱuṱuwedza khothe uri vha nee Mundalamo beiḽi. Mundalamo o ḓou vhudza khothe zwauri nga murahu ha tshiwo, o ḓou ya Saselamani tsini nyana na Malamulele, he a lingedza u ḓi haṱula vhutshilo ene mune.

O dovha hafhu a amba zwauri ovha o tholwa nga muhasho wa pfunzo sa mugudisi hone ovha e ṱhoho ya muhasho kha tshikolo tsha nṱha tsha Thambatshira. O amba zwauri arali a hanelwa beiḽi, u ḓo lozwa mushumo hune a ḓo kundelwa u unḓa vhana vhawe vhaṋa.

Musi muimeleli wawe a tshi vhudzisa uri sa izwi e dzhele u khou shuma hani, Mundalamo o amba zwauri ovha o dzhia maḓuvha a vhuawelo ha minwedzi miraru musi tshiwo tshi sa athu u itea. O engedza zwauri hu na muholo we au hola nga ṅwedzi wa Fulwi une wa khwaṱhisedza zwauri na ngoho u khaḓi shuma. O engedza zwauri arali a vhofhololwa nga beiḽi, ha ngaḓo kandakena ndaela dzine aḓo ṋewa ngakhothe sa izwi e na nnḓu mbili; Hamatsika na Hasidou. O amba zwauri nga murahu ha tshiwo o tou ḓi vhiga ene mune mapholisani.

Mutshutshisi wa Muvhuso, ene o ḓou ḓa kha Mundalamo nga vhuhali, a tshi ṱuṱula vhuṱanzi ha Mundalamo. O vhudza khothe zwauri u ṱuwa ha Mundalamo a tshi bva Makonde a ya Saselamani zwovha zwo lingana u sumbedza uri Mundalamo u khombo kha tshitshavha na ene muṋe. O engedza zwauri Mundalamo o ita mulandu uyu phanḓa ha vhathu, hune na vhaṅwe vhagereki vhovha vha tshi nga huvhala kana vha vhulawa. “Ndi nga zwi amba ndi sa timatima zwauri sa zwe na vhudza khothe uri novha ni khou lingedza u ḓi haṱula vhutshilo nga murahu ha tshiwo tsha Makonde, hu na khonadzeo dzauri arali na ṋewa beiḽi, ni ḓo dovha hafhu na lingedza u ḓi haṱula vhutshilo,” vha amba.

Vho amba zwauri uḓi isa mapholisani ha Mundalamo hovha hu u vhona zwauri ahutshena hune a ḓo shavhela hone sa izwi mulandu wawe wovha u khou ḓivhea hoṱhe hune aḓo fhedza ngau farwa. “Sa Muvhuso, ri ri Mundalamo a songo neiwa beiḽi. Mulandu we au ita u wela fhasi ha tshiteṅwa 6 hone hu na tshililo nga ha mabulayo a vhana na vhafumakadzi kha shango ḽashu. U fanela u dzula tshiṱokisini u swika mulandu u tshi fhela,” vha amba.

Kha tsheo yavho, madzhisiṱiraṱa Vho Grace Mashau vho amba zwauri muhwelelwa o kundelwa u ṱuṱuwedza khothe uri ndi ngani a tshi fanela u wana beiḽi. Vho hana khumbelo ya beiḽi, mulandu wo fhiriselwa phanḓa uya kha ḽa ṱahe Ṱhangule ṅwaha uno.

Date:05 July 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 69