ADVERTISEMENT:

 
 

Dj a ḓivheaho Dj Khoro e mitshinini kha ḽiṅwe ḽa maḓikiṱa. Tshifanyiso tsho bveledzwa.

Dj Khoro o vhuya nga huhulu

 

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa

Mulidzi makone a ḓivheaho, Deejay Khorommbi Makhavhu o vhuya kha nḓowetshumo ya zwa muzika, he avha o awela lwa minwaha i hovhelelaho rathi.

Dj Khoro o fhedzisela u mbvumbvusa vhathu nga ṅwaha wa 2018, he vhunzhi ha vhatevheli vhawe vhovha vho ḓalelwa nga mbudziso dza uri naa u ngafhi hone ho itea mini khae. Mafhungo a ḓisaho dakalo ndi auri Dj Khoro u tshe hone, hone ovha e bephani ḽe ḽa farwa Shuma Park ngei Shayandima nga ḽa mbili Shundunthule. O sia vhanzhi vho takala, he a mbvumbvusa vhathu e na mumbvumbvusi a ḓivheaho Deejay Ganyani.

Musi atshi vhudziswa uri ndi ngani o dzhia tshifhinga tshilapfu asa vhonali kha nḓowetshumo ya muzika, Dj Khoro a bvaho Itsani o amba zwauri ovha o neta nga vhutshilo vhune vha mbvumbvusi kana vho ramuzika vha kombetshedzea u tshila hone. Vhutshilo uho hu katela zwine vhathu vhavha na masiku ane a vha eḓeli nau dzulela u enda nyendo ndapfu vha tshi ya fhethu hune havha na mabepha.

“Ndovha kha nḓowetshumo iyi lwa tshikhala tshilapfu, he nda thoma nga ṅwaha wa 1997 hu khaḓi shumiswa dzone dzi khasete, he ndavha ndi tshi mbvumbvusa vhathu kha vhuṱambo ha vhonyalunako na maḓikiṱa. Nga ṅwaha wa 1998, ro ḓou pfulutshela khau shumisa dzi CD. Izwo hovha hu zwone zwifhinga zwi takadzesaho,” a amba.

Dj Khoro uri u humbula vhunzhi ha zwifhinga zwe zwavha zwi tshi takadza nga tshifhinga itsho. “Ndo mbvumbvusa vhathu fhethu hunzhi kha mabepha mahulwane u fana na kha Univen Freshers Ball, Royal Gardens, na magudedzini manzhi au mona na Limpopo. Ndo ḓi dovha nda mbvumbvusa vhathu ngei Club 930 ire Hoedspruit na kha mitambo ya Black Leopards na TTM FC, na miṅwe minzhi, ” a engedza.

Zworalo musi e lwendoni lwawe o tamba e na vhanwe dzi Dj khulwane kha shango ḽashu, u fana na Black Coffee, Oskido, Dj Tira na Dj Cleo.

Nga ṅwaha wa 2009, e na khonani yawe Castro Musinyali, Dj Khoro o thoma pfumbudzo yawe yau pfumbudza vhafariwa vha senthara ya ndulamiso ya Ṱhohoyandou. Vhaṅwe vhavho zwa zwino vho no bva dzhele hone vha khou shuma zwavhuḓi kha nḓowetshumo ya muzika.

“Nga murahu ha minwaha minzhi, ndo ḓou dzhia tsheo ya u ṱutshela nḓowetshumo iyo ndaya kha nḓowetshumo ya zwa dzi thekhisi. Zwa zwino ndi mune wa MK Car Wash, MK Spaza na fhethu hau ḽela ngei Shayandima Zone 1. Fhedzi naho zworalo, vhatevheli vhanga a vhango tenda uri ndi nothe lwa tshoṱhe, “ a amba.

Dj Khoro uri u fulufhedzisa vhatevheli vhanwe uri vha songo vhilaela. “Ndi tshe ono uḽa Dj Khoro ane vha mu ḓivha kha nḓowetshumo iyi,” a amba a tshi vhina.

 

Date:27 June 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 94

 

ADVERTISEMENT

 

ADVERTISEMENT:

ADVERTISEMENT:

 

Recent Articles

ADVERTISEMENT