Mutambi wapo vha kha fulo ḽa uvula khamphani yau bveledza matambwa

Tshiṱori nga: Victor Mukwevho. Ṱhalutshedzo nga: Khathutshelo Raliphaswa.

Mutambi wa matambwa, Vho Nyambeni Robert Munyamela, vha kha fulo ḽau ṱoḓa u vula khamphani ya vhubveledzi ha matambwa uri vha kone u pfumbudza vhatambi vhane vha takalela nau ṱoḓa u aluwa kha nḓowetshumo ya matambwa ubva kha vhupo havho, uri vha kone u imedzana na vhaṅwe vhatambi u mona na shango nau bvela nnḓa u mona na ḽifhasi musi zwikhala zwi tshi vha bvelela.

Vho Munyamela, vhe vha bebwa Makwarani vha ḓivhiwa khwine nga vhubvumbedzwa he vha tamba kha ḽitambwa a theḽevishini kha SABC 2, "Muvhango". U swika zwino, Vho Munyamela vho no tamba kha matambwa a paḓaho mahumi mavhili kha zwiṱitshi zwa radio dza lushaka.

Vha tshi amba na vha nyanḓadza mafhungo ya Limpopo Mirror, Vho Munyamela vhari lufuno lwavho kha zwa matambwa lwo simuwa musi vha tshi tshikoloni tsha fhasi tsha Makwarela nga ṅwaha wa gidiḓaṱahe fuṱahe-raru. “Ndovha ndi tshipiḓa tsha ḽitambwa ḽi tambiwaho luvhanḓeni na vhaṅwe vhagudiswa, hone ndavha wa mashudu nda kone u dzhenelela dzi mishumo yau pfumbudzwa nga ha matambwa ngei gudedzini ḽa Yunivesithi ya Venda fhasi ha u gudiswa nga Vho Dakalo Kwinda,” vha amba.

Nga ṅwaha wa gididaṱahe fuṱahe-sumbe, vho dou thoma u tamba kha matambwa a radioni ya Phalaphala FM vha tshe mugudiswa wa tshikolo tsha nṱha tsha Vhutavhatsindi. “Vhathu vhanzhi vhovha vha tshi dzulela u mmbudzisa uri ndi zwi kona hani uvha mutambi ngeno ndi kha murole wa vhuṱahe tshikolo. Zwe ndavha ndi tshi di vhudza zwone ndi zwauri arali muthu a na mpho na vhukoni hone ana ḓora ḽau bvelela, minwaha ivha nomboro fhedzi,” vha ṱalutshedza.

Vho ḓou ṱuṱuwedzwa nga vhagudisi vhavho uri vha ṅwale zwiṱori nau gudisa vhaṅwe vhagudiswa nḓila dzau dzhenelela kha matambwa a luvhanḓeni tshikoloni, zwe zwa swikisa khau sika thero dza vhutsila ye ya bveledza matambwa a luvhanḓeni manzhi. Kha Phalaphala FM, vho ḓivhiwa nga madzina a fanaho na Vho Biriki, Mavhele, Bra Maputra, Materi, na mubvumbedzwa wa zwino Vho Jomboro.

Nga ṅwaha wa gidimbi-sumbe, vho ḓou ḓi dzhenisa kha matambwa a theḽevishini, he vha tamba mubvumbedzwa Mmbengeni Nekhavhambe kha ḽitambwa ḽa Muvhango kha SABC 2. Nga murahu ha tshifhinga, vha tamba vhe murangaphanḓa wa sialala kha ḽitambwa ḽeneḽo

Nga nnḓa ha zwa u tamba matambwa, vho bveledza vidio ya ramuzika wa rege Khakhathi “Murida” Tshisikule, “Vhafari vha Piki”, vha dovha hafhu vha shuma na ramusika Makhadzi kha luimbo lwawe lwa “Tshanḓa iya, tshanḓa vhuya” . Vho ṅwala, vha langa, vha dovha hafhu vha bveledza fiḽimu ine ya vhidzwa “Nndwa ya maṱo” nga ṅwaha wa 2009, ye ya kandiswa kusini kwa Maṱangari na ḓoroboni ya Thohoyanḓou, ye ya shuma zwavhuḓi kha ndowetshuymo nathengiso. Vho dovha hafhu vha bveledza fiḽimu dza fanaho na “Vhadowa”, “Black Jew”, na “Grade 10”. Zwa zwino vha tamba kha “Uzalo”, tshine tsha tamba kha SABC 1 Musumbuluwo u swika Ḽavhuṱanu nga hafu ubva kha awara ya vhumalo nga madekwana.

Date:15 May 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 199