Mufumakadzi o farwa nga murahu hau posa lushie bungani

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Mufumakadzi wa miṅwaha ya furaru, Fortune Ramkhododo, o farwa nga Lavhuna (25 Lambamai) ḽa vhege yo fhiraho zwi tshi tevhela u wanala ha lushie lwo laṱwa ngomu ha mulonga wa bunga . Tshiwo itsi tsho itea kha kusi kwa Tshikuwi khala Nzhelele.

Muambeli wa mapholisa a Vhembe, W/O Vuledzani Dathi vho khwaṱhisedza tshiwo. Vho amba zwauri mapholisa vho vhidziwa nga mufarisi wa mufumakadzi uyo. O amba zwauri o wana lushie ulwo ngomu ha mulonga wa bunga ḽa nnḓa tsini na nnḓu yavho ngei Tshikuwi.

“Mapholisa vha tshi swika, vho lingedza u phulusa tshitumbu tsha lushie ngomu ha bunga. Ndi he ha takuwa u vhudziseswa ha muhumbulela he a swika khau amba zwauri ua ḓivha nga ha zwe zwa itea, a mbo farwa na zwenezwo,” vho Dathi vha amba.

Muhwelelwa oḓi vhonadza khothe ya madzhisiṱiraṱa wa Dzanani nga Musumbuluwo, hone mulandu wawe wo fhiriselwa phanḓa kha Musumbuluwo wa ḽa rathi Shundunthule, zwa zwino u tsiṱokisini.

Muṅwe we a luma vha Limpopo Mirror ndevhe a thembeaho o amba zwauri muhwelelwa o rumela mulaedza kha vhudavhidzani ha WhatsApp ya muvhundu, he a vhudza vhadzulapo uri o pfa lushie lu tshi lila ngomu ha bunga, musi oya uḓi thusa.

“O bvela phanḓa nau amba zwauri ha pfesesi uri ndi ngani muthu atshi nga laṱa lushie ngomu ha bunga. Sa tshitshavha, rovha ro akhamala nau shushea, hone rovha ro kholwa zwe a amba u vhuya u swika he ra ḓi vhudzisa luvhili na luraru ra swika khau humbulela uri ndi zwiito zwawe ene mune. Nga murahu ha maḓuvha asi gathi tshiwo tsho itea, o ḓou gungula nga ha upfa vhuṱungu a tshi ḓi thusa bungani. Ro limuwa nauri ovha atshi dzulela u kanyela thavhula u dzumba thumbu,” a amba. Muhwelelwa o kona u dzumba vhuimana hawe lwa tshidele na lwatshifhonga tshilapfu.

Muṅwe wa vhadzulapo vha Tshikuwi o ṱahisa muhwelelwa sa muthu  avha a tshi funa kereke hone a fulufhedzeaho kha mufarisi wawe. “Ovha akhou dzula na mufarisi wawe nḓuni ya muhalivho wawe ane avha khaladzi a mufarisi wawe. Ri tshe ro shushea. Rovha ri songo zwi lavhelela ubva khae zwihulu ngauri ndi mudzulapo ane aḓi dzhenisa zwihulu kha mishumo ya tshitshavha,” vha engedza.

Date:03 May 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology. He is passionate about current news and international affairs. He worked as part of the Zoutnet team as an intern in 2017. He is currently a freelance journalist specialising in news from the Vhembe district.

Read: 217