A vhari dzheile nṱha!

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

"Litshani u ri nyadza. No Ri Nyadza Ro Neta”, izwi ndi zwe zwavha zwo ṅwalwa nga vhadzulapo vha vhupo ha Sinthumule, Kutama na Tshikota kha mugwalabo wa mulalo wa Musumbuluwo na Ḽavhuvhili. Vhovha vha khou gwalabela vha masipala vhane vhari ndi kale vha khou thudzela kule mbilaelo dzavho dza u wana nḓisedzo ya tshumelo u fana na maḓi, bada dza khwine na muḓagasi. Kha tshiṱereke itsho hovha hu songo tendelwa zwiambara zwa mahoro a polotiki afhambanaho.

Vhadzulapo vho dzhenelela kha mugwalabo wa maḓuvha mavhili he ha valwa vhunzhi ha mabindu doroboni ya noLouis Trichardt vhoramabindu vha tshi ofha u ṱangulelwa zwirengiswa zwavho. Vhagwalabi vho hwalwa nga mabisi na dzi thekhisi u bva vhuponi havho uya Louis Trichardt lwa maḓuvha ayo mavhili. Vho vala bada magondo u fana na D3715, D959, R522 na gondo lihulwane la N1. Hovha ho valwa dzi nḓila dzine dza swikisa vhathu ngomu ḓoroboni u fana na bada dza Nzhelele na Tshikota, khathihi na bada dza u ṱumanya Tshiozwi, Schoemansdal na Ravele. Hovha hu si na mabisi ane a khou shuma lwa maḓuvha ayo – ho shuma dzi thekhisi fhedzi. Zworalo na zwikolo zwinzhi zwovha zwo valwa sa izwi vhagudisi vho kundelwa u swika zwikoloni.

Ubva nga matsheloni a Ḽavhuvhili, dzi thekhisi dzi bvaho kha bada ya Elim uya Louis Trichardt dzovha dzo valelwa kha bada ya N1, Three Mile, he vhagwalabi vha kuvhanganya vha tshi gwalaba vha tshiya ofisini dza masipala wa Makhado. U gwalaba ho thoma nga awara ya vhufumi ya matsheloni hone vhovha vha khou gwalaba nga mulalo.

Nga Ḽavhuvhili, mudzulatshidulo wa foramu ya Zoutpansberg Community Development, Vho Patrick Sikhutshi vho netshedza vho neḓorobo vha masipala wa Makhado, Vho Dorcus Mboyi, na Cllr Samuel Munyai ḽiṅwalo ḽa mbilaelo dzavho, fhedzi vhovha vha khou ṱoḓa ḽiṅwalo iḽo ḽi tshi netshedzwa vho MEC vha zwa mishumo, bada na themamveledziso, Vho Nkakareng Rakgoale, fhedzi vha si swike sa zwe vhavha vho langana musi vha tshi ṱangana navho nga ḽa fumbili nthihi Phano, he vha fulufhedzisa vhadzulapo uri vha ḓo vha thusa. Vho Sikhutshi vhari ndi khwine vha tshi bviswa tshiduloni na zwenezwo. “Ri ṱoḓa u kwamana muphuresidente uri vha bvise vho MEC Rakgoale tshiduloni nga u bonya ha iṱo,” vha amba.

Vho Sikhutshi vhari tshiṱereke itshi ndi masiandaitwa a u balelwa ha u bveledzisa pfulufhedziso dzavho dza u fhaṱa dziṅwe bada. Vhari vhadzulapo vha khou ṱoḓa hu tshi fhedziswa luṱa lwa vhuvhili ha bada ya D3715 ya Madodonga. Nga u sinyuwa, vho ṱahisa zwauri pfulufhedziso dze vha neiwa nga vha muhasho wa mishumo na vha masipala wa Makhado, ndi dza ubva nga nwaha wa 2022. Vhadzulapo vha khou lilela nauri zwikolodo zwa vhadzulapo vha Tshikota zwi fanela u thuthiwa, vha ḓiselwa tshumelo ya maḓi na muḓagasi. “Ri fanela u farwa sa vhadzulapo vha manwe mavunḓu,” vha amba.

Rathekhisi, Vho Khangala Manyuha vho ṱahisa mbilaelo yavho. “Vhaofisiri vha hoyu muhasho vha ri fulufhedzisa u vusuludza bada, ine yavha khiḽomithara dza malo ubva Hamadodonga u swika Tshikhodobo, fhedzi na zwino ahuna tshanduko. Vho radzithekhisi na vhoradzithekhisi vhari vho neta u shumisa bada dzine dzo gwea lune adzi tshimbilei zwavhuḓi, zwihulu musi mvula yo na,” vha amba.

Munwe wa vhoramabindu vhe vha hana u bulwa dzina vho engedza uri vhunzhi ha vhathu vho balelwa uya mishumoni lwa maḓuvha mavhili hone avha nga ḓo badelwa kha maḓuvha ayo. “Maḓi ndi vhuḓifhinduleli ha masipala wa Vhembe, une wa wanala Thohoyandou. Vhunzhi ha dzi bada dzi wela fhasi ha dzhendedzi ḽa vunḓu, line ḽavha Polokwane. Ndi ngani vha tshi hwesa vhathu vhuḓifhinduleli vhusi havho?,” vha amba.

Date:26 January 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 179