Vhatukana vhavhili vho ṱhaselwa nga ngwena mulamboni wa Lutanandwa.

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

Vhatukana vhavhili vha minwaha ya vhukati ha ṱahe na fumi-na-mbili vha bvaho Tshakhuma vha khou ongiwa vhuongeloni nga murahu ha u ṱhaselwa nga ngwena mulamboni wa Lutanandwa nga Lavhuṋa ḽa iṋa Phando. Vho phuluswa vhe na mafuvhalo a tatisaho zwe zwavha swikisa vhuongeloni.

Nga matsheloni a ḓuvha ḽa tshiwo itsho, vhatukana avho vhavhili vhane vhavha murathu na mukomana, Mokiti Mushiana (9) na Rofhiwa Mudau (12), vhovha vhoya mulamboni uyo u bambela sa izwi hovha hu na mufhiso, nga hone usa ḓivha uri vha ḓo ṱangana na ngwena mulamboni uyo. Rofhiwa o vhudza vha nyanḓadza mafhungo ya Limpopo Mirror uri, vho swika vha dzhena maḓini, ndi he Mokiti a thoma u ṱavha mukosi a tshiri o farwa nga ngwena. “Ndo ḓou gidima nda lingedza umu phulusa nga umu bvisa maḓini. Ndi he na nne nda kokodzwa nga ngwena iyo!”

Uya nga Rofhiwa, ngwena yo mu kokodzela fhasi ha maḓi lwa tshivhalo. “Ndori ndi tshi ima kha muṱana wayo, ya nana u sinyuwa, ndi he ya gavha mulenzhe wanga wa monde ya nngwise thungo ya ngei na ngei. Ndo pfa rambo la mulenzhe wa monde li tshi kwashea. Zwenezwo ndi khou lwela vhutshilo hanga, murathu wanga ovha a khou ṱoḓa thuso, fhedzi ndovha ndisa kholwi uri ndi ḓo kunda ngwena iyo. Na zwino thi kholwi uri ndo bva hani, fhedzi ndo fhedza ndo bva,” a amba.

Vho Mashudu Davhana, vhe vhavha vhe munwe wa vhathu vhe vha phulusa vhatukana avho, vhari vho pfa tshililo tsha u ṱoḓa thuso u bva mulamboni, ndi he vha gidimela mulamboni u thusa. “Rori ri tshi swika na vhanwe vhadzulapo, ra wana Rofhiwa o farelela muri. Ngwena yo lingedza umu kokodzela maḓini hafhu, fhedzi na rine ravha ri khou mu kokodza he ra fhedza ngau kunda ngwena iyo. Rofhiwa ovha ena mafuvhalo, a khou phopha malofha a tatisaho. Ro ḓou vhidza vha zwa vhupo vhe vha swika vha thuntsha ngwena iyo ya fa nga Mugivhela wa ḽa rathi Phando,” vha amba.

Vhadzulapo vho no ḓalelwa nga nyofho kha dzingwena zwihulu ngauri vhunzhi havho vha shumisa maḓi a mulambo wa Lutanandwa. Muambeli wa mapholisa a Vhembe W/O Vuledzani Dathi vhari hovha na zwiwo zwinzhi zwa u nuvhela ha vhathu maḓini nga minwedzi ya tshilimo sa izwi mifhiso yo kalulaho yovha i khou kombetshedza vhathu uri vhaye u bambela milamboni na madamuni. Vhari vhathu vha fanela u ṱutshela kule na u bambela kha milambo na madamu khathihi na u rea khovhe fhethu hu songo tsireledzeaho. Vho Dathi vhari vha khou kaidza vhadzulapo uri vha thetshelese ndayo ubva kha vhaofisiri hone na endedzi vha zwikepe vha ṱutshele kule na uya madamuni. Mapholisa vha khou ṱangana na dzi khaedu sa izwi milambo yo no ḓala dzi ngwena khulu.

Date:12 January 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 241