Tshikolo tsha Sinthumule vha na khaedu yau ḓala ha phera dzau gudela

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.

U valwa ha shikolo tsha nṱha tsha Magoni zwo sia vhathu vhanzhi kha vhupo uho vhe na mbilaelo, zwihulu kha zwikolo zwa vhupo ha tsini u fana na tshikolo tsha nṱha tsha Sinthumule, vhane vha khou ṱangana na khaedu ya u ḓala ha phera dzau gudela zwine zwa sia zwi khou kwama kushumele kwa vhagudiswa nga nḓila isi yavhuḓi. Innwe ya dzi mbilaelo ndi dzine dza khou ṱahiswa nga vhabebi vhane vhari vhana vhavho avha khou kona u guda zwavhuḓi musi phera idzo dzo ḓala lwo kalulaho.

Uya nga muvhigo, tshikolo tsha Sinthumule zwa zwino tshi na vhagudiswa vha paḓaho zwigidi zwiraru. Phera nthihi yau gudela i kona u lingana vhagudiswa vha fuṱhanu, fhedzi zwa zwino vhagudiswa vha khou dzhena vha tshi paḓa fumalo kha phera nthihi, zwihulu kha mirole ya malo, ṱahe na fumi. Zwa zwino ahuna fhethu hu ne vhagudisi vha kona u shumisa u tshimbili-tshimbila vha tshi gudisa kha mirole iyo.

“Zwine rine sa vhabebi ra ṱoḓa ndi uri huvhe na phera na zwishumiswa zwo linganelaho vhana vhashu,” hu amba mubebi wamunwe wa mugudiswa, Vho Mpho Nzhiri. “Ro no isa mbilaelo dzashu lunzhi kha vha muhasho wa pfunzo uri vha thuse ngau engedza phera dzau gudela, fhedzi ahuna thuso ye ra wana.” Vho Nzhiri vhari phera khwalwa dzi nga thusa kha tshifhinga tsha zwino sa izwi hu na ṱhahelelo ya phera dzau gudela, vha nga ḓisa phera idzo kana vha tou fhaṱela vhana vhashu phera dzau gudela ntswa.

Vho dovha hafhu vha ṱahisa ḽauri u ḓala ha phera dzau gudela zwi vhea mutsiko kha vhagudisi sa izwi zwithithisi zwinzhi zwi tshi thithisa u guda ha vhagudiswa. “Zwia vhilaedza u wana vhana vhashu vha khou gudiswa kha phera dzo ḓalaho lwo kalulaho hone vhaṅwe vhavho vho tou dzula fhasi vha tshi gudiswa,” Vho Nzhiri vha amba.

Vhabebi vha vhagudiswa vha tshikolo tsha Sinthumule vho no thoma na zwiito zwau shushedza uri vha ḓo gwalaba arali vha muhasho vha si ḓise thandululo kha khaedu iyi. “Arali vha nga sedza kha zwiṅwe zwikolo kha vunḓu ḽashu, vha do zwi vhona uri vha dzhena kha zwikolo zwine zwi kha maimo a khwine. Ri khou ita khuwelelo kha vha muhasho wa pfunzo, vha vunḓu na vha lushaka, uri vha dzhenelele nga tshihaḓu kha khaedu iyi,” hu amba munwe wa vhabebi.

Muṅwe wa vhagudiswa we a hana u bulwa dzina uri zwinwe zwifhinga vha funziwa dziṅwe thero vho neta ngau ima ubva kha thero dza murahu. Vhari vha guda fhasi ha nyimele dzi kondaho, he ari na mutsho une wavha u hone kha phera zwi thithisa nḓila dzavho dzau funziwa. Vhagudiswa avha vha kombetshedzea u tou vhea mikhwama yavho nṱha havho uri vha kone u ṅwala zwavhuḓi. “Ari koni u bvela phanḓa nau guda kha phera dzo ḓalaho lwo kalulaho, ri balelwa u thetshelesa zwavhuḓi zwine zwa thithisa kushumele kwashu kha pfunzo dzashu.”

MEC wa zwa pfunzo, Vho Mavhungu Lurule-Ramakhanya, vho fhindula zwauri hu na khaedu ya ṱhahelelo ya phera dzau gudela kha zwikolo zwinzhi kha vunḓu lashu. Vho engedza zwauri u valwa ha tshikolo tsha Magoni na ṱhanganyelo yavho na tshikolo tsha Sobani, vhunzhi ha vhagudiswa vho nanga uya kha tshikolo tsha Sinthumule ngau vhona nḓila ine vha shuma ngayo kha u phasa ha vhagudiswa, hone kha vhaṅwe vhagudiswa ndi tshone tshikolo tshire tsini na hayani. Vho Lerule-Ramakhanya vho fulufhedzisa zwauri khaedu iyi yau ḓala ha tshikolo tsha Sinthumule iḓo tandululwa.

Date:30 April 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 116