Vho Rampson Rambuwani vho wana haya huswa Vhembe FM.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Muhashi wa kale wa radio ya Univen FM, muimbi wa gosipele, vhafunzi na mukhantselara wa tshiṱiriki tsha Vhembe Vho Rapson Rambuwani vho ita ḓivhazwakale yavhuḓi vha tshi hasha mbekanyamushumo yavho yau thoma kha radio ya Vhembe FM.

Avha muḓivhalea vhane vha vha ḽidzhakandila kha muzika wa gosipeḽe, vhane vha ḓivhelwa luimbo lwavho lwe vha lu anḓadza kale lwa “Mune Wanga”, vho thoma na lwendo lwavho kha Vhembe FM nga Sondaha ya ḽa sumbe Lambamai. Vho dzhena kha mbekanyamushumo ya zwa vhurereli ya Mvuseledzo, ine ya hashiwa ubva nga awara ya vhurathi u swika awara ya vhuṱahe, tshikhala itshi tshovha tsho siiwa nga u ṱuwa ha Tendani “Lady T” Mushasha, e a ṱuwa a tshiya uvha muraḓo wa Phalaphala FM u thoma nga ḽau thoma ḽa ṅwedzi uno.

Vho Rambuwani vhovha muhashi kha radio ya Univen FM lwa minwaha ya fumi-na-malo, vha tshi hasha mbekanyamushumo ya vhurereli ya ‘Delight in the Lord’ ye yavha i tshi hashiwa nga Sondaha ubva nga awara ya vhurathi u swika awara ya vhufumi  nga matsheloni, na mbekanyamushumo ya “Nkho ya Lushaka” nga Lavhuraru nga awara yau thoma u swika awara ya vhuvhili nga masiari.

Vho Rambuwani vhari vha pfa vho hulisea zwihulu nau takala uvha muṅwe wa vhahashi vhare kha mutevhe muswa wa vhahashi vha Vhembe FM. “ U ya hanga kha Vhembe FM zwovha zwithu zwo humbulwaho lwo fanelaho. Muthu ha dzuli fhethu huthihi lwa tshifhinga tshilapfu. Ndi khou vhona zwiṅwe zwiswa, hone Vhembe FM hovha hone fhethu ha khwine kha nṋe. Ndi ḓo lingedza nga nḓila dzoṱhe u engedza tshivhalo tsha vhathetshelesi kha radio yashu. Ndi tenda khauri ndi ḓo shuma zwavhuḓi na vhalangi na vhathetshelesi,” vha amba.

Mulanga tshiṱitshi tsha Vhembe FM, Vho Mukhethwa Ravhuhali vhoṱahisa Vho Rambuwani sa muṅwe wa hashi vhavhuḓi nazwibhuya zwa itea kha tshiṱitshi tshavho kha ṅwaha uno. “Vho Rambuwani ndi muhaga vha dovha vhavha muthu ane a kone  u kunga vhathu, zworalo u vha na muhashi o raliho zwi amba zwihulu kha rine. Vha ḓo ri thusa zwinzhi kha alusa tshiṱitshi tshashu nau swikelela ndivho dzashu nau dzula ri kha vhuimo hashu ha u thoma kha vunḓu ḽa Limpopo. Ndi kale vhe kha nḓowetshumo ya vhumbvumbvusi, hone nḓivho yavho ya zwa radio ido engedza tshileme kha tshiṱitshi tshashu,” vha amba.

Date:16 April 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 165