Naa ndi nnyi mune wa Muvango wa Vhege?

Tshiṱori nga: Entertainment. Ṱhalutshedzo nga: Khathutshelo Raliphaswa.

Vhafuni vhatevheli vha muzika vha ḓiphina nga muzika wa mithethe ya furaru u sa thithiswi une wa vhidziwa “Muvango wa Vhege” nga Lavhuṱanu ḽiṅwe na ḽiṅwe kha radio ya lushaka ya Phalaphala FM. Fhedzi mbudziso ine muṅwe na muṅwe avha nayo ndi yauri naa ndi nnyi ane avha murahu ha muzika uyo? Vha nyanḓadza mafhungo ya Limpopo Mirror vho ḓou zwi sala murahu he vha wana uri ndi muvango wa Ndiafhi Nethonzhe (41) he ra mu humbela uri a kovhe nḓila yawe yau bveledza muvango uyu hone o swika hani kha nḓowetshumo ya vhumbvumbvusi.

Nethonzhe, ane a ḓivhea khwine nga ḽa DJ Dogmore, o bebwa Tswinga nnḓa nyana ha Thohoyanḓou hone zwa zwino u dzula Muledane. Afha ndi he ra mu wana hone. Nethonzhe o ṱalusa nḓila ye a thoma u funa ngayo muzika: “Lufuno lwanga kha muzika lwo thoma musi ndi tshe mugudiswa wa tshikolo tsha fhasi tsha Mahwashane. Musi ndi hayani, mme anga Vho Tshavhungwe Tshikororo, vhovha vha tshi ṱomba vha rengisa halwa ha Sialala, nga tshifhinga itsho ndovha ndi tshi ḓovha ndi khou tamba muzika kha khasethe ndi tshi mbvumbvusa vharengi vhahalwa hanefha hayani. Nga hone u bva muṱani u shayaho, ndovha ndi tshi balelwa u swikelela u renga zwishumiswa zwo teaho zwa mulidzi wa muzika, fhedzi nda kombethsedzea u shumisa zwenezwo zwe ndavha ndi nazwo uri ndi kone u bveledza muzika wavhuḓi. Ndo aluwa na ulo lufuno lwa muzika u swika na kha mirole ya tshikolo tsha nṱha musi ndi tshi dzhena kha tshikolo tsha Sam Mavhina.”

O amba zwauri sa zwezwi atshi aluwa, o ḓou ṱuṱuwedziwa nga vhathu vha fanaho na DJ Cleo, DJ Fresh, na Oskido. “Vhutshilo hanga ho shandukela zwa khwine musi ndi tshi ṱangana na Mulalo Madadzhe na DJ Khoro, vhe vha nṋea tshikhala tsha u shuma navho musi vha tshi ya u lidza nau mbvumbvusa Vhathu. Thanganyelo yanga na DJ House , DJ Mpho Phala, na DJ Fox yo vula mavothi na zwikhala zwe zwa ntswikisa kha u rambiwa uri ndivhe mulidzi wa hanefho kha vhunzhi ha zwiimiswa na fhethu. Izwi zwo nthusa uri ndi vhulunge masheleni uri ndi kone u renga zwishumiswa zwo teaho zwau lidza, zwine zwa zwino ndi zwi hadzimisa vhathu kha mishumo yo fhambanaho hune ndavha ndi khou shuma sa mulidzi nga lenelo ḓuvha.”

O amba zwauri nga nnḓa hau itela vha tshiṱitshi tsha Phalaphala FM muvango wa vhege, u dovha hafhu a itela vha tshiṱitshi tsha Vhembe FM. U tenda khauri, uvha mulidzi are na vhutsila hau bveledza, uvha na nḓivho ya nga ha muzika ndi zwa vhuṱhogwa. “Vhatevheli vhanga ri katela vhaswa na vhaaluwa, hune vha mvelele na siala zwo fhambanaho, zworalo ndi khwaṱhisedza uri ndi vha mbvumbvusa vhoṱhe vha fushee. Ndi fanela u dzulele u ḓivha nga ha mizika ine ya khou ita takalelwa nga tshenetsho tshifhinga na ntswa dzine dzavha dzo anḓadzwa, uri ndi kone u bveledza muvango u fushaho,” a amba.

U eletshedza vhathu vhane vha ṱoḓa u tevhedza kha maga awe uri vhavhe na lufuno kha zwine vha ita. “Arali muthu atshi funa zwine a ita, a kona u langa tshifhinga tshawe kha zwoṱhe zwine a ita, a dovha hafhu a kona u fara vhathu vhawe zwavhuḓi nga lufuno na thonipho, ua kona u swikelela zwinzhi kha vhutshilo,” a vhina.

Date:18 April 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 136