Vha bennde ya Mudzinginyo vha tshe na mafufulu au mbvumbvusa vhathu nga muzika wa Tshivenda

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Nga murahu ha minwaha i paḓaho furaru ho sikwa tshigwada tsha muzika wa Tshivenda wa sialala tsha Mudzinginyo Band vha kha ḓi bvela phanḓa nau avhela vhathu muzika u fushaho. Bennde iyi yo tumbuliwa nga ṅwaha wa gidiḓaṱahe fuṱahe-raru kusini kwa Duvhuledza nnḓa nyana ha Thohoyanḓou.

Kha minwaha iyi yoṱhe, vho dzulela u bveledza muzika wa Tshivenda wa sialala, vha tshi bveledza nyimbo dzi takalelwaho nga vhafuni vhatevheli vhavho. Vhatumbuli vha bennde iyi ndi Vho Shandukani Neduvhuledza, Vho Tshifhiwa Mudau, Vho Phathutshedzo Thanyani, Vho Venter Ralukukwe, Vho Vhalinavho Thanyani, na munnaavhane Vho Rihangwele Nangammbi.

Vho kanḓisa alibamu yavho yau thoma, ye ya vhidziwa “Midzimu yo Lala”, nga ṅwaha wa gidimbili fumi-na-ina, ye ya tevhelwa nga aḽibamu ya “Vhathu Ri ya Fhela” nga ṅwaha wa gidimbili fumi-na-ṱahe. Nga aḽibamu iyo, vho ḓouvha kha mutevhe wa vho nkhetheni kha pfufho dza TSHIMA kha ḽwaha uyo. Izwi zwa tevhelwa nga luimbo lwe lwa vhidziwa “Khorona” nga ṅwaha wa gidimbili fumbili, ha tevhela na luṅwe luimbo lwe lwa vhidziwa “Thogomelani Vhabebi”, nga ṅwaha wa gidimbili-fumbilimbili.

U pembela minwaha ya furaru-thihi vha kha nḓowetshumo, vho anḓadza luimbo lwa “Mukwasha” mathomoni a ṅwedzi wa Ṱhafamuhwe. Luimbo ulo lwo kanḓiswa nḓuni dza u kanḓisa muzika dza MIP dzire kusini kwa Mpandoni.

“Lwovha lwendo ḽu lapfu, he ra ṱangana na zwivhuya na zwikonḓaho kha iyi nḓowetshumo. Hovha na tshifhinga tshe ra ṱoḓa u fhambana kha bennde zwi tshi itwa nga miṅwe ya mishumo yashu, fhedzi ra konḓelela ra dzula sa nganda nthihi. Ri vhanwe vha zwigwada zwa kale zwa muzika wa sialala ya Tshivenda vhane vha khaḓi bveledza muzika nga luambo lwa ḓamuni. Ri imba nga ha zwine ra ṱangana nazwo zwine zwa mbvumbvusa zwa dovha hafhu zwa kovha mulaedza na nḓivho,” Vho Neduvhuledza vha amba.

Vho engedza zwauri muzika wavho u kwama matshilo a vhathu vhanzhi nga nḓila yavhuḓi. “Ri khou pembela nga nḓila yo khetheaho nga kha muzika nyimbo yashu ya ‘Mukwasha’. Ri khou dovha hafhu ra pembela u vhuya murau ha mulidzi wa katara washu, Vho Tshifiwa Mudau, vhe vha vha vha siho lwa tshifhinga tshilapfu. Zwa zwino ri kha nzudzanyo dza aḽibamu i tevhelaho,”  vha amba vha tshi vhina.

Date:18 April 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 84