Holo ya musalauno i ḓuraho miḽiyoni ya malo wa dzi rannda yo netshedzwa kusi kwa Tshikhudini

Tshiṱori nga: Development. Ṱhalutshedzo nga: Khathutshelo Raliphaswa.

Vhamusanda vha kusi kwa Tshikhudini, tsini na Folovhodwe, Vhamusanda Vho Piet Munyai, vho ita khuwelelo kha vharangaphanḓa vha tsini uri vha shume na muvhuso zwavhuḓi kha u ḓisa mveledziso kha zwisi zwavho. Vho Munyai vho amba na vhorapolotiki, vhaimeleli vha vhafaramikovhe, na vhadzulapo kha mushumo wau netshedza holo ya muvhundu ya Tshikhudini.

Holo iyi ntswa, ye ya fhedza miṅwedzi ya fumi-na-mbili u fhaṱiwa i na zwishumiswa zwa musalauno u fana na phera yau ṱangana, phera yau bikela, ofisi ya u ṱanganedza nau ṅwalisa, vhupo hau paka zwiendedzi, thannga ya maḓi ire fhasi ha mavu, mulonga wa maḓi na mathannga a maḓi.

Vho amba zwauri, lwa minwaha minzhi, vhadzulapo vha kusi kwavho vhovha vha khou ṱangana na khaedu musi vha tshi fanela uvha na mishumo ya tshitshavha kana maguvhangano a vhadzulapo na vhaeni kha kusi kwavho. “Ro takala uri muvhuso wapo wo kona u thetshelesa zwililo zwashu vha swika khau fhindula mbilaelo dzashu nga u ri ṋea holo ya lushaka. Ndo dzhenelela miṱangano minzhi, ndi sina gonobva, u khwaṱhisedza uri ndoro ya tshitshavha tshashu uri ri wane holo zwivhe ndoro yo wedzaho kha kusi kwashu. Hezwi zwi touvha tsumbo yauri arali vhadzulapo vha shuma zwavhuḓi na muvhuso kana vhathu vhare kha vhulangi vhaa kona u bveledza zwinzhi nau khwinifhadza vhupo ha mahayani,” vha amba.

Kha mushumo uyu wau netshedza holo ya tshitshavha, neḓorobo vha Musina Vho Nkhanedzeni Godfrey Mawela vho ita khuwelelo kha vhadzulapo uri vha ṱhogomele tshifhaṱo itshi, uri vha kone u tshi shumiswa lwa minwaha minzhi husina na tshinyalelo. “ Iyi ndi yone holo yo nakaho nau kuna u fhira dzoṱhe dza wadi dzashu dza fumi-na-mbili kha masipala wapo wa Musina. Tshifhaṱo itshi asi tsha vhadzulapo vha Tshikhudini fhedzi, tshi dovha hafhu tshavha tsha vhadzulapo vhoṱhe vha wadi iyi; na avho vhane vha dzula kha dzi wadi dza tsini vho tendelwa u ḓa u tshi shumisa. Nga nnḓa hau ḓisela vhadzulapo vhukhudo vhu ṱoḓeaho, iyi ndi holo ine yo dovha ya thusa vhadzulapo vha paḓaho mahumi mavhili nga mishumo nga tshifhinga tsha musi holo i khou fhaṱiwa,” vha amba.

Mukhantselara vha wadi yapo Vho Melta Munzhelele vho fulufhedzisa uri vha ḓo shuma zwavhuḓi na vhadzulapo kha u ṱhogomela ndaka iyi ye ya ḓura miḽiyoni dza malo wa dzi rannda.

Date:16 April 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 89