Vhadzulapo vha Hanthabalala vha shumisa maḓi o tshikafhalaho.

Tshiṱori nga: Thembi Siaga. Ṱhalutshedzo nga: Khathutshelo Raliphaswa.

Vhadzulapo vha Hanthabalala vhari vha tshe na khaedu ya ṱhahelelo ya maḓi ine yo no swika minwaha ya fumi-na-ṱhanu. Izwi zwi vha kombetshedza u shumisa maḓi a mulamboni ane o tshikafhala ane vha a shumisa na zwifuwo. Kha vhupo uho hu na milonga ya maḓi ine ai shumi zwavhuḓi zwine zwa kombetshedza miḓi i paḓaho ya zwigidi zwina uri vha tevhele maḓi milamboni ya tsini.

Ṱhahelelo ya maḓi zwo kwama vhagudisi na vhagudiswa vha tshikolo tsha fhasi tsha Vari, hune milonga ya rathi yo xa maḓi. Vho Josephine Lugaga, mubebi kha tshikolo itsho, vho vhudza vha nyanḓadza mafhungo ya Limpopo Mirror uri ḓuvha ḽiṅwe na ḽiṅwe vhavha na khaedu yau wana maḓi. “Ri kombetshedzea uya kha zwilambwane na zwisima u wana maḓi sa izwi ri sa swikeleli u renga maḓi ane ari ḓurela rannda ṱhanu ravha ḽithihi, sa izwi ri si na mishumo. Ro tou vhea fulufhelo ḽashu kha muvhuso uri vha dzhenelele vhana vhashu vha sa athu u khavhiwa nga malwadze a fanaho na cholera nga u shumisa maḓi aya o tshikafhalaho,” vha amba.

Vho Patrick Rambau, munwe wa vhadzulapo, vhari milonga ya maḓi yo xa maḓi oṱhe. “Zwa zwino, ro no fhedza ṅwedzi ri si na maḓi. Vhadzulapo vha wana maḓi milamboni, hune vha a shumisa na zwifuwo u fana na dzi kholomo na mbudzi,” vha amba.

Vho Bridget Nakedi, mudzulatshidulo wa khoro mbusi ya tshikolo, vho ṱahisa uri ndi kale vha tshi lingedza u isa mbilaelo dzavho kha vha masipala fhedzi ahuna thuso ine ya ḓa kha vhadzulapo. “Ri na fulufhelo ḽauri vha muhasho wa pfunzo vha ḓo thusa kha u ḓisela vhagudiswa maḓi vha sa athu u lwala,” vha amba.

Vhamusanda Vho John Makamu vhari vho isa mbilaelo dzavho na vhadzulapo nga ha ṱhahelelo ya maḓi kha vha masipala wa tshiṱiriki tsha Vhembe (VDM), fhedzi ahuna thuso ye ra ḓiselwa yone. “Hu na mushumo u sa athu u fhelaho wa mulonga wa maḓi we wa thoma miṅwaha mivhili yo fhiraho, fhedzi zwa zwino fhethu afho ho tshinyadzwa. Ro fulufhedziswa uri vha VDM vha ḓo ri ṋea mathannga a maḓi, fhedzi u swika namusi, ari athu u vhona na thannga lithihi li tshi ḓiswa tshikoloni kana muvhunduni washu,” vha amba.

Muambeli wa muhasho wa pfunzo Limpopo Vho Mike Maringa vho hanedza mafhungo ayo vhari tshikolo tshi wana maḓi ubva kha muvhundu awara mbili fhedzi nga vhege. “Vhovha na thendelano uri muvhuso u ḓo ḓisela vhathu mathannga a maḓi arali hu si na maḓi. Vha khou nanisa mafhungo hone ahu athu uvha na tshifhinga tshe vhathu vha ṱwa vha si na maḓi,” vha amba.

Muambeli wa VDM, Vho Matodzi Ralushai, vhari milonga wa maḓi yoṱhe yovha i khou shuma musi vhathu vha tshi thoma ui shumisa. “Vhadzulapo ndi vhone vhe vha tshinyadza milonga iyo na u tswa khevhele dza muḓagasi, Zwa zwino ri ṱoḓa u vhea phanḓa mushumo wau lugisa milonga iyo yoṱhe,” vha amba.

Ṱhoho:

Date:23 February 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 183