Muhulwane wa Absa vha hulisa Vhamusanda vha Hamastila nga mushumo wavho wa mveledziso

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Mushumo wa mveledziso ya mahayani, ye ya takuswa kha kusi kwa Hamatsila, u khou bvela phanḓa nau kunga vhaendelamashango ubva kule na tsini. Mushumo uyu wo rangiwa phanḓa nga Vhamusanda Vho Livhuwani Matsila na vha tshikwama tsha Matsila Development, wo kona u kunga mato a mivhundu ya mahayani u mona na shango, hune vhathu vhanzhi vha dalela vhupo ha Vhembe u guda zwinzhi nga vhupo uhu. Muṅwe wa vhaeni vhe vha dalela vhupo uhu ndi muofisiri muhulwane wa tshigwada tsha Absa, Vho Arrie Rautenbach, vhe vha vha vhe na tshigwada tshavho nga Mugivhela wa ḽa raru Luhuhi.

Vho Khulani Qoma, mulangi muhulwane wa vhudavhidzani na mufaramukovhe kha nyambedzano dza Absa, vhari vhori upfa nga ha mushumo une wa khou itwa Hamatsila vha vhona zwo fanela uri vha ḓe vha zwi vhone nga avho maṱo. “Rovha ri tshi ṱoḓa u vhona mveledziso ine ya khou itea kha vhupo ha mahayani ine Vho Matsila vha khou itela muvhundu wavho. Afrika Tshipembe ndi ḽiṅwe ḽa mashango ane a khou ṱangana na dzi khaedu dzo fhambanaho. Inṅwe ya dzi khaedu idzo ndi u pfuluwa hune ha itea kha vhupo vhunzhi, vhathu vha kombetshedzea u pfuluwa ubva kha mivhundu yavho vha pfulutshela dzi ḓoroboni. Zwe Vho Matsila vha ita zwi sumbedza uri mveledziso inga iswa vhathuni hune vha dzula hone,” vha amba.

Vho Qoma vho ombedzela uri mushumo uyu woṱhe, u sumbedza u maanḓafhadzwa ha ikonomi ya vharema nga nḓila yo teaho. “Ro takala vhukuma ngau dalela mishumo iyi yoṱhe nau ṱangana na vhathu vhe vha zwi gudela vha tshi ḓi ṱongisa nga mushumo wavho. Zwine Vho Matsila vha khou ita zwi fanela u edziselwa kha mivhundu minzhi hu u itela u tandulula khaedu dzine ra ṱangana nadzo. Ri dzhiela nṱha mveledziso ya mahayani sa izwi ri tshi tenda kha mivhundu ya khwine i bveledza vhadzulapo vha khwine,” vho Qoma vha engedza.

Vho Arrie Rautenbach vho ḓou ṅwala ḽiṅwalo vho ḽi livhisa khau livhuwa Vhamusanda Vho Matsila nga u vha ṋea tshikhala tsha u dalela kusi kwavho uri vha gude nga ha zwine zwa khou bvelela. “Vho sumbedza bono lavhuḓi vhukuma na vhurangaphanḓa ha khwine vhune ha sumbedza vhukoni ha muvhundu wavho na vhathu vhavho, nau sika zwikhala zwa mveledziso. Vho sumbedza udi ṋekedzela havhuḓi vhune ha ḓo vhulunga nau alusa mvelele yavho ya khwine nau sumbedza uḓi kukumusa na vhuḓikukumusi kha vhaswa. Ri tenda uri Afrika ndi fhethu ha zwikhala zwi sa fheli, hone ri khou vusuludza vhukoni ha vhanzhi,” vha amba.

Vho Matsila vho ṱahisa dakalo ḽavho nga u dalelwa nga vha tshigwada tsha vhaofisi vha nannga ya Absa. “Ro ṱuṱuwedzwa nau takala uri vhaofisiri vhahulwane vha bvaho Absa vho ri dalela hu u itela uri sumbedza thikhedzo yavho na uri dededza kha mushumo une ra khou ita. U vhonwa uhu na thikhedzo yavho zwo ri maanḓafhadza uri ri bvele phanḓa nau ḓisa mishumo ine ya sika mveledziso ri na mafulufulu, na vhuḓidini hashu kha u lwa na vhushai nau alusa ikonomi yashu. Ri lavhelela u shuma zwavhuḓi na uvha na ṱhanganyelo na bannga dzi fanaho na Absa na dziṅwe bannga khulwane na sekhithara dza phuraivethe,” vha amba.

Date:20 February 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 192