Vhutsila ha Vunene ho sia vhatevheli vha Bafana Bafana vho takala.

Tshiṱori nga: Thembi Siaga. Ṱhalutshedzo nga: Khathutshelo Raliphaswa.

Nga murahu ha mutambo wa bola nga Mugivhela wa ḽa raru Luhuhi, we wa sia vhadzulapo vha ḽa Afrika Tshipembe vho ḓala nga dakalo, ho leleḓa khuwa na dzi khuliso u bva kha vhadzulapo uya kha vhatambi vha thimu ya lushaka ya Bafana Bafana. Munwe wavho hovha Vunene Mabasa, ane avha muoli a bvaho Hachavani. Vunene o anḓadza tshifanysio tshawe o ola mulangavhuno na mulanga vhatambi ngae wa Bafana Bafana, Ronwen Williams kha khana yawe, atshi shumisa zwinakisi. Izwi hovha hu khuliso kha mulangavhuno uyo sa izwi o phulusa thimu ya lushaka vha tshi imedzana na vhatambi vha shango ḽa Cape Verde.

Kha gundo ḽavho ḽe vha kona uya kha makhaulatshele a AFCON, Ronwen o vhonwa sa mulamuleli wa lushaka nga u phulusa kha dzi thaho dzi sathithiswi. Vhutsila ha Vunene ho takalelwa nga vhatevheli vhawe kha masiaṱari a vhudavhidzani o fhambanaho.

Vunene una digirii ya Computer-systems engineering ubva kha gudedzi ḽa Yunivesithi Ya Tshwane (TUT), fhedzi nga usa wana mushumo naho ana ṱhoḓea dzo teaho, o ḓou thoma zwa vhutsila hau ola zwau nakisa. Kha Vunene, zwinakisi asi nga ha u engedza lunako fhedzi, fhedzi zwi dovha zwavha nga ha u engedza dakalo na tshileme kha zwifhinga zwa vhuṱhogwa. U ola hawe Ronwen azwingo sumbedza vhutsila hawe fhedzi, zwo mu ṱumanywa na vhanwe vhateli vha bola ya milenzhe, vhane vha takalela vhutsila hawe.

Vhutsila ha Vunene avhu thomi u takalelwa namusi, nga ṅwaha wa 2023 o takalelwa nga vhanzhi musi a tshi ola muimbi Kiernan Jarryd Forbes, ane ovha a tshi ḓivhiwa nga ḽa AKA, musi a tshi lovha nga u vhulawa, iyo hovha hu nḓila ya Vunene yau mu hulisa nau isa ndiliso. “Nga murahu hau vhona mutambo wa Mugivhela, ndo tou zwi ḓivha uri hezwi zwi ḓovha vhutsila hanga ha vhege ino. Ronwen oi phulusa lu akhamadzaho; zworalo ovha a khou fanela u huliswa. Ndo wana milaedza minzhi ubva kha vhatevheli vhanga. Nḓila ye vhavha vha khou ntikedza nau takalela vhutsila hanga ndi ine na nṋe muṋe yo sia ndo ḓalelwa nga dakalo u ḓivha uri vhathu vha takalela mishumo yanga. Ubva ḓuvha le nda anḓadza vhutsila hanga, ndo thoma uvha na vhatevheli vhanzhi vha fhiraho tshigidi nga ḓuvha lithihi fhedzi khasiatari la Facebook”

Sa munakisi ane a touḓi shuma, Vunene u anzela u ṱangana na zwifhinga zwine zwa konḓa u wana vhathu vhane vha ṱoḓa tshumelo yawe nau fhelelwa nga nḓila dzau sika vhutsila vhuswa vhu kungaho mato a vhathu. A tshi vhudziwa uri musi atshi ṱangana na khaedu idzo u dzi kunda hani, Vunene uri una maano au ṱoḓa u shumisa vhudavhidzani ha Facebook nga nḓila ine aḓo wana masheleni. “A zwingo leluwa, fhedzi ndi khou lingedza u shuma khazwo.,” a amba.

Date:13 February 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 204