Khaedu ya maḓi yo swikiwa mudzulapo khau gwa mulonga wa maḓi ene muṋe

Tshiṱori nga Thembi Siaga na Elmon Tshikhudo. Ṱhalutshedzo nga Khathutshelo Raliphaswa.

Thonifhani Dzebu wa minwaha ya fumbili-ṱhanu, ane a bva muvhunduni hune havha na ṱhahelelo ya maḓi Tshifudi Tshikombole, o dzhia tsheo ine ya kundela nau ofhisa vhanzhi u lwa na ṱhahelelo ya maḓi kha muvhundu wawe. Afho ndi he a ḓou ngwa gwenzho ḽa maḓi hune havha mithara dza fumi-ṱhanu u tsa fhasi.

U aluwa kha muvhundu hune havha na miḓi i paḓaho zwigidi zwiraru, hune vhadzulapo vha anzela u shumisa maḓi ane vha a shumisa khathihi na zwifuwo, zwo ḓou ṱuṱuwedza Thonifhani khauri a wane thandululo ine ya ḓo thusa vhadzulapo vha muvhundu wawe.

Kha muvhundu uyo hu na magwedzho a paḓaho maṋa ane zwa zwino ha shumi na luthihi, hone o fhedzisela u shuma minwaha i paḓaho fumbili-ṱhanu. Nga hone u neta ngau shumisa maḓi mathihi na zwifuwo, Thonifhani o ḓou dzhia piki, fosholo, na hamula, a thoma u ungwa he avha a tshi tenda uri ndi hone hune a ḓo wana maḓi. 

U bwa uho ho ḓou dzhia minwaha miraru, hune Thonifhani o no fhira mithara dza fumi-ṱhanu a tshi khou gwa. U shumisa thambo u bva nau dzhena ngomu afho u kelela maḓi, hune a thusiwa nga khaladzi na mme awe musi a tshi bva.

“Ndo no ṱangana na matombo mahulwane mavhili tshe nda thoma hone zwa zwino ndi khou lingedza u kwasha ḽa vhuvhili, ḽine ḽa vhonala ḽi ḽihulwane,” a amba.

Naho a tshi ḓi ṱangana na dzi khaedu na u shuma oḓi imisela, Thonifhani u dzula o lavhelesa kha tshipikwa tshawe; hune havha u ḓisela vhadzulapo vha muvhundu maḓi uri a fhungudze khaedu yau shumisa maḓi mathihi na zwifuwo. Zwa zwino u vhonala o no swikelela khau wana maṅwe a maḓi, fhedzi ndi maḓi ane hango tou lingana zwavhuḓi. 

“Muvhundu hoyu ndi kale husina maḓi, hone ndi khaedu khulwane sa izwi ri tshi fanela u shumisa maḓi ane a dovha hafhu a shumiswa nga zwifuwo u ṅwa ubva kha milambo ya tsini na zwisima. Hafhu futhi maḓi ayo avha a songo kuna, hone vhaṅwe vhathu vha fhedza vha tshi khou vhaisala, zwihulu vhana vhaṱuku na vhaaluwa,” a engedza.

Thonifhani o engedza zwauri tshe a bebiwa, o fanela u shumisa maḓi ane a shumiswa nga zwifuo, sa izwi vha masipala wa tshiṱiriki tsha Vhembe (VDM) vha tshi kundelwa u ḓisela vhathu maḓi o kunaho mivhunduni yavho. Vhadzulapo vho amba zwauri hu na dzi bommbi ṱhukhu dzine dza wana maḓi luthihi nga ṅwedzi. Hune vha wana hone maḓi ndi kha damu ḽa tsini, hune vha amba zwauri ndi fhethu hune ahungo tsireledzea.

Musi vha GroundUp vha tshi dalela vhupo uho nga ḽa fumi-iṋa Khubvumedzi, vhaṅwe vha vhadzulapo vhovha vhe kudamboni kwa tsini vha tshi khou kuvha zwiambaro zwavho. Ayo ndi maḓi ane a dovha hafhu a shumiswa nga zwifuwo u ṅwa nga tshifhinga tshenetsho. Nga tsini, hovha hu na tshisima tshine vhadzulapo vha tshi shumisa u kelela maḓi a u ṅwa nau bika.

Ṅwedzi wo fhelaho, vhadzulapo vha muvhundu uyo vhovha vha tshi khou ita misumbedzo, vha tshi vala dzi bada na u hoṱhe u gwalaba muvhunduni wavho. Fhedzi zwo ralo, mugwalabo uyo ndi une a ungo anwa mitshelo, hone na nyimelo yavho aingo shanduka u swika na zwino. Nyimelo iyi ya ṱhahelelo ya maḓi ndi ine i kha ḓivha khaedu nau sinyusa vhadzulapo vha muvhundu wa Tshifudi.

“Ri pfa ro furalelwa nga muvhuso wa vhukati, hone ri dzulela u ita khuwelelo khavho uri vha ri humbule sa miṅwe mivhundu. Maḓi are milamboni ya muvhundu washu a khou xa sa izwi hu na tshanduko ya kilima. Husi kale, ri ḓo kombetshedzea u ya mulamboni wa Luvuvhu, hune havha dzi ngwena dze dza ḓou vhulaha muṅwe washu nga ṅwaha wa gidimbili fumbili-mbili hune havha minwaha mivhili yo fhiraho,” hu amba mudzulapo Tshilidzi Ndou.

Thonifhani uri ha na vhuṱanzi uri u fanela u ngwa u swika ngafhi uri a kone u wana maḓi ane o linganela. Khuliso Muvhango, mutumbuli wa khamphani ya u ngwa maḓi kana magwedzho, Muvex Drilling, o amba zwauri zwi nga dzhia tshifhinga tshilapfu uri Thonifhani a kone u swikelela fhethu hure na maḓi. “Mithara dzine dzavha ṱhukhu hune ha wanala maḓi ndi kha mithara dza fuiṋa u swika kha furathi kha vhupo ha Tshifudi,” a amba.

Murangaphanḓa wa sialala, Vhamusanda Vho Collen Mashau, vho khwaṱhisedza uri na ngoho muvhundu wavho u na ṱhahelelo ya maḓi hone vha khou ṱangana na vhuleme nga nwambo wa vhuleme uhu. “Fhedzi mushumo uyu u nga thusa khau shandukisa nyimelo yashu, hone ri khou humbela thuso ubva kha vhaṅwe vhathu uri vha ri thuse nga maḓi ,” vha amba.

Muambeli wa masipala wa tshiṱiriki tsha Vhembe Vho Matodzi Ralushai vho amba zwauri sa masipala vho no pulana uri hu khwinifhadzwe tshiko tsha maḓi tsha Xikundu uri hu kone uvha na nyengedzedzo ya maḓi uya kha muvhundu uyu. Vho amba zwauri masipala wo no ḓisa bommbo ntswa vhege yo fhiraho, hune zwa zwino hu khou shuma bommbo mbili. “Masipala u tshe wo lindela uri hu ḓisiwe bommbo mbili dzine ndi ntswa, hone ri ḓo dovha hafhu ra lugisa magwedzho ane ha shumi zwa zwino,” Vho Ralushai vha amba.

Date:01 October 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area. Thembi studied at the Tshwane University of Technology, where he completed his diploma in Journalism in 2021.

Read: 120