Vhadzulapo vho sinyuswa ngau thuntshiwa ha vhana Musina

Tshiṱori nga Bernard Chiguvare. Ṱhalutshedzo nga Khathutshelo Raliphaswa. 

Vhaṅwe vha vhadzulapo Vhamatswale, Musina vhovha vha tshi khou ita misumbedzo yau gwalaba nga Ḽavhuvhili ḽa fumbili-iṋa Khubvumedzi, vha litsha u pembela ḓuvha ḽa vhufa. Misumbedzo iyo yavho ndi ye ya tevhela zwe ha ḓou thuntshiwa vhathu vhavhli vhane ndi khaladzi na khaladzi nga madekwana a Musumbuluwo vha tshi khou kelela maḓi. 

Vha Limpopo Mirror ndi vhe vha kwama mubebi wa vhana avho, fhedzi vho ḓou amba zwauri mapholisa vhovha vhudza zwauri vha songo amba na vha nyanḓadza mafhungo. Uya nga vhadzulapo, khaladzi na khaladzi avho vhovha vha tshi khou vhuya u kelela maḓi nga madekwana, hune fhethu ha hone hovha hu kule nyana na hayani havho.

Muvhigo wa mapholisa wo sumbedzisa zwauri nga Musumbuluwo wa ḽa fumbili-raru Khubvumedzi, vhapondiwa avho vhavhili, vha minwaha fumbili-raru na fumi-iṋa, vhovha vhe hayani havho musi hu tshi swika muthu ane ha ḓivhei wa munna. Vhapondiwa vho ḓou gidimela ngomu nduni, fhedzi munna uyo o ḓou thuntsha nga kha vothi, he wa mutukana a ḓou thuntshiwa kha thumbu, ngeno wa musidzana o thuntshiwa kha muṱana. Munna uyo o ḓou dovha hafhu a thuntsha kha ṱhanga ya mukhukhu a mbo shavha he tshiwo tsha itea hone a songo vhoniwa uri ndi nnyi.

Vhadzulapo vha Musina ndi vhane vha na minwedzi ire na tshivhalo vha sa wani maḓi nga nḓila yavhuḓi, zwe zwa kombetshedza vhaṅwe vha vhadzulapo uri vha thome zwau ṱoḓa maḓi vhusiku. Uya nga vhadzulapo vha muvhundu wa Matswale, maḓi a vulelwa vhusiku hone zwiṅwe zwifhinga, zwine zwa vha sia vhe si na dziṅwe nḓila nga nnḓa hau vuwa vha ya u kelela maḓi vhusiku.

Vha tshiamba na vha Limpopo Mirror, Vho Binky Sefake, vhane ndi mulangi mutshimbidzi wa tshiimiswa tsha Mantombazana, vho ṱahisa u vhaisala havho nga tshiwo itshi tshau thuntshiwa ha khaladzi na khaladzi. “Ahuna na muthu na muthihi, zwisina ndavha uri minwaha ndi mungafhani, ane a fanela u kombetshedzwa uya u kelela maḓi vhusiku sa izwi zwi songo tsireledzea. Vhana avho vhovha vhesina uḓi khethela fhedzi vha fanela u ya u ka maḓi vhusiku, he vha ita nau fhedza dzi awara vhasa wani maḓi,” vha amba.

Vha tshiimiswa itsho ndi vhane vhari vha khou pulana uvha na therisano na vha masipala wa tshiṱiriki tsha Vhembe, vhane ndi vha ndaulo ya maḓi. 

Musi vha masipala wa tshiṱiriki tsha Vhembe (VDM) vha tshi fhindula zwe vha nyanḓadza mafhungo ya Limpopo Mirror vha vha rumela, vha VDM vho ṱahisa zwauri vho thola vhorathendela uri vha bwe milonga ya maḓi yau engedza kha ine i hone zwa zwino Musina nauri hu lingiwe iyo ine a i shumi zwa zwino. “U swika zwino, vha VDM vho no kona u wana milonga mivhili, hone vha thimu vha ḓo bvela phanḓa nau wana maṅwe magwedzho,” hu amba muambeli wa masipala wa tshiṱiriki tsha Vhembe Vho Matodzi Ralushai.

Vho dou fulufhedzisa zwauri vha VDM vha ḓo ṱoḓulusa kha fhungo iḽi nau nea thikhedzo kha vhapondiwa vha tshiwo tsha Matswale. “Ahuna vhuṱanzi vhune ha fusha vhune ha sumbedzisa zwauri na ngoho u thuntshiwa kana tshiwo itshi ndi zwine zwa kwamana na fhungo ḽa ṱhahelelo ya maḓi, fhedzi zwi fanela u ḓivhea zwauri sa masipala ri ḓo thusa vha muṱa nga nḓila dzoṱhe dzine ra nga kona na vhane vha nga lozwa mashaka avho kha tshiṱiriki tsha shuma tsha Vhembe,” Vho Ralushai vha amba.

Zwi tshi tevhela tshiwo itshi, zwileludzi zwa vhudavhidzani zwa nnyi na nnyi zwovha zwo ḓala nga milaedza ye ya leleḓa vhathu vho sinyuwa vha tshi pomoka vha masipala wa tshiṱiriki tsha Vhembe uri vha khou kundelwa u netshedza vhadzulapo vha Musina maḓi o linganelaho. Miṅwe ya milaedza ndi ye ya ṅwaliwa zwauri: “Musi ri tshi amba, ri fhindulwa nga dzi khakhathi nau laelwa zwauri ri fhumule, zwine zwa sia hu tshi tambula vhana vhashu. Nga ṅwaha wa 2026, ri ḓo vuwa na tshanduko.” Muṅwe mulaedza wari ”Vha VDM vha a ḓivha nga ha mbilaelo dzashu, fhedzi avhari dzhieli nṱha.” Muṅwe wari : ”Vhafaramikovhe vhoṱhe vha Musina vha fanela u ya kha vha vhulangi ha masipala, hu tshi katelwa na neḓorobo vhone vhane. Vha fanela u ḓivha zwauri malofha asina mulandu, a vhane vha khou lila a zwanḓani zwavho.”

Zwa zwino munna uyo asa ḓivhei ea thuntsha khaladzi na khaladzi ha athu u fariwa ngeno muthihi wa avho vhe vha thuntshiwa e vhuongeloni.

Date:27 September 2024

By: Bernard Chiguvare

Bernard Chiguvare is a Zimbabwean-born journalist. He writes mainly for the online publication, Groundup.

Read: 23