Humbulani Tharaga murendi vha bvaho Tshilata vho dzhia vhuimo hau thoma kha zwa vhurendi

Tshiṱori nga Thembi Siaga. Ṱhalutshedzo nga Khathutshelo Raliphaswa.

Vho Humbulani Tharaga, murendi are na mpho vha bvaho Hadavhana vhuponi ha  Vuwani, vho wina kha vhuimo hau thoma kha tshiteṅwa tsha Tshivenḓa kha muṱaṱisano wa vhurendi hune ha lambedzwa nga AVBOB ha ṅanwaha (2024). Vhuṱambo hau pfufhiwa ho farelwa fhaḽa vhugalatenga ha Pretoria Country Club nga Ḽavhuraru ḽa fumi-malo Khubvumedzi.

Vho Tharaga vho pfufhiwa tshiphuga nga kha tshirendo tshavho tsha 'O fhola'. Vhovha vhe muṅwe wa vharendi vha fumi-thihi vhe vha pfufhiwa, he muṅwe na muṅwe ovha a tshi khou imelela luambo lwa tshiofisi lune lwa ṅwaliwa fhano Afrika Tshipembe. Muṱaṱisano uyu ndi une ndivho yawo ndi u pembela mvelele kana tshaka dza Afrika Tshipembe kha uno ṅwedzi wa Khubvumedzi wau pembelela vhufa Afrika Tshipembe.

Ngau vhona uri hu na zwirendo zwi paḓaho fuiṋa-mbili zwine zwa anḓadzwa nga vha ḽaiburari ya AVBOB, Vho Tharaga vha vhona u upfufha havho havho hu tshi touvha u livhuwa u ḓi imisela nau shuma vhe na mafulufulu havho kha ndowetshumo ya zwa vhurendi. “Naho zwo ḓa sa tshimangadzo, ndovha ndi tshi ḓi zwiḓivha zwauri nṋe ndo bebelwa zwithu zwavhuḓi hone zwihulu, zwihulu kha hei nḓowetshumo ya zwa vhurendi, sa izwi lufuno lwanga lu kha zwa vhurendi. Ndi shuma ndo ḓi imisela khau bveledza vhurendi hanga. Ndi tenda zwauri u bvelela hanga zwi ḓo vhuyedza hune nda bva hone nau ṱuṱuwedza vhaṅwe vharendi uri vha dzhenelele muṱaṱisano uyu tshifhinga tshiḓaho nau fhaṱa vhuḓifulufheli havho kha maṅwalo,” vha amba.

Lufuno lwa Vho Tharaga kha zwa vhurendi lwo thoma vhe kha murole wa vhuṱanu vhe tshikoloni tsha fhasi tsha Matamela, he vhovha vha tshi dzulela u vhala mishumo ya murendi wa Tshivenḓa Dokotela Vho Paul Ramudzuli Ngwana. Mudededzi wavho wa tshikolo tsha nṱha, Vho Nditsheni Makwarela, vho ḓou vha ṱuṱuwedza uri vha tevhedze miḽoro yavho. Nga murahu hau fhedza tshikolo, vho ḓou ḓi ṅwalisa kha khoso ya Information Management gudedzini ḽa Pretoria Technical College nga ṅwaha wa gidimbili-mbili. Zwa zwino vha shuma sa administrator kha vha tshumelo ya mapholisa Afrika Tshipembe (SAPS).

“Ndi dzulela u vhona zwithu zwine zwa khaula mbilu kha dzi dokhethe mushumoni wanga, hune kanzhi lufu lwa amba tshiṱori tshine tsha vhaisa kha muṅwe muthu. Vhurendi ndi hone vhune ha nthusa khau lavhelesana na zwithu zwinzhi zwine zwa vhaisa zwine nda ṱangana nazwo. Ndi ṱoḓa u bveledza kana u sumbedzisa vhathu uri lufu ndi zwithu zwa ngoho, hune ahungo lindelwa Yeso atshi vhuya fhedzi,” vha amba.

Vha vhona u bvelela havho ha zwino hu hone mathomo hone zwi tshi ṱuṱuwedza vhaṅwe vharendi, zwihulu vhaswa, uri vha dzhiele nṱha luambo lwavho lwa ḓamuni. “Zwia vhaisa u vhona uri ri khou lozwa luambo lwe vhomakhulukuku washu vha lu sia na rine. Onoyo ane a humbula kana u vhona unga luambo lwashu asi lwa vhuṱhogwa u fanela u humbula zwavhuḓi hafhu. Ndi tama u alusa luambo lwashu lwa Tshivenda lwa ya kha lunwe luta lwa ntha,” vha amba.

Date:27 September 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area. Thembi studied at the Tshwane University of Technology, where he completed his diploma in Journalism in 2021.

Read: 92