Khwairi ya God is Love yo fhirelwa phanḓa kha makhaulatshele a muṱaṱisano wa Mapungubwe

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

“Ndi azwi ḓivha uri lwendo lwa uya kha makhaulatshele lu ḓovha lu songo leluwa, fhedzi ro ḓi imisela u vhuya hayani na tshiphuga.” Ayo ovha maipfi a bvaho kha Doctor Khorommbi, murangaphanḓa wa khwairi ya God is Love ya Ṱhohoyanḓou, nga murahu ha u tou fhenya kha vhuṱambo hau lugisela muṱaṱisano wa khwairi wa Mapungubwe.

Vhuṱambo uho ho farelwa vhugalatenga ha Yunivesithi ya Venda nga Mugivhela wa ḽa fumi-iṋa Khubvumedzi. Dzi khwairi dzo ita mbambe kha zwiteṅwa zwa zwikolo na zwa mivhundu. Tshiteṅwa tsha zwikolo tsho ḓou kundwa nga vha khwairi ya EPP Mhinga High, ngeno vha Ṱhohoyanḓou God is Love vho fhenywa kha tshiteṅwa tsha khwairi ya khwine ya muvhundu. Kha zwiphuga zwe zwa pfufhiwa hu katelwa na masheleni a paḓaho zwigidi zwa dzi rannda zwa fumi (R10,000) e vha avhelwa one.

Makhaulatshele a dzingu ndi e a dzudzanyiwa nga vha masipala wa tshiṱiriki tsha Vhembe (VDM). Vho Vincent Netshivhodza, tshanḓa tsha mulangi wa muhasho wa mitambo, vhutsila na mvelele, vho amba zwauri ndivho ya muṱaṱisano uyu ndiu vusuludza muzika wa khwairi zwikoloni na mivhunduni nauri vhathu vha dzulele u ḓi dzhenisa kha mizika ya dzi khwairi.

Khwairi dza khwine ubva kha madzingu ndi vhane vha ḓo fhirela kha mbambe ya vunḓu, ine ya ḓou farelwa Tivumbeni nga ḽa fumbili-ṱahe Khubvumedzi ṅwaha uno. “Ri tenda zwauri mbambe iyi iḓo ṱuṱuwedza vhaṅwe vhathu hone ṅwaha u ḓaho ri khou lavhelela uri vhathu vha dzhenelele vhe vhanzhi,” hu amba Vho Netshivhodza.

Vho Doctor Khorommbi vha Ṱhohoyanḓou is Love vho amba zwauri u wina kha muṱaṱisano zwovha zwi tshi touvha matakadzambilu khavho na hune vha bva hone. “Hezwi zwoṱhe zwi touvha ṱhuṱhuwedzo kha rine. Ro ḓi lugisela zwihulu hone ri ḓo shuma nga uḓi vhudza na mafulufulu uri ri vhuye hayani Vhembe na tshiphuga,” vha amba.

Khwairi iyi ye ya vhumbiwa minwaha ya fumi-raru yo fhiraho, ndi inwe ya dzi khwairi dza khwine hone dza kale kha shango ḽashu ḽa Afrika Tshipembe. Khwairi iyo yo fhaṱwa nga ṱhama tharu – Vho Doctor Love Khorommbi, Vho Edward Shandukani, na Vho Colbert Tshililo – vhane vhoṱhe vha bva vhuponi ha Hamphego, hune ndi nnḓa nyana ha Ṱhohoyanḓou nga ṅwaha wa 1993.

Date:25 September 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 87