Mugudiswa o bvisela u sinyuwa hawe kha modoro wa mudededzi

Tshiṱori nga Elmon Tshikhudo. Ṱhalutshedzo nga Khathutshelo Raliphaswa.

Mugudiswa we avha o sinyuwa wa tshikolo tsha nṱha tsha Ṱhohoyanḓou Technical High o ḓou vusa ruvhuruvhu fhaḽa tshikoloni, he a ḓou swika khau tshinyadza tshiendedzi wa mudededzi nau ṱhasela mune wa moḓoro.

Tshiwo itsho, tshine tshi tshe milomoni ya vhathu vhanzhi, tsho sia vhadededzi na vhagudiswa vho akhamala nau shushea. Zwo dovha hafhu zwa sia vhathu vha tshi ḓi vhudzisa zwihulu nga ha tsireledzo ya vhagudisi kha mishumoni yavho ya tshikolo  sa izwi zwiwo zwi fanaho na izwi zwi tshi khou anda u itea zwikoloni.

Khuḓano iyo, ine yo vuswa nga mugudiswa wa ṅwananyana wa minwaha ya fumi-ṱhanu, yo itea vhege yo fhiraho nga Ḽavhuṱanu nga matsheloni.

Muambeli wa SAPS kha tshiṱiriki tsha Vhembe W/O Vuledzani Dathi vho khwaṱhisedza tshiwo, he vha amba zwauri mugudiswa uyo o ḓou farwa malugana na u tshinyadza tshiendedzi tsha tshanḓa tsha ṱhoho ya tshikolo. O ḓou vhoniwa mulandu malugana nau tshinyadza ndaka mugudiswa uyo ovhewa fhasi ha ndango ya vhabebi sa izwi atshe muṱuku kha minwaha.

“Ṱhoḓisiso thangeli dzo bveledza zwauri muhwelelwa o ḓou ya ofisini ya tshanḓa tsha ṱhoho ya tshikolo u vhiga nga ha khaḽikhuḽeitha yawe ine yo ngalangala. Ho ḓou vuwa khuḓano ya maipfi yo kalulaho vhukati ha avho vhavhili, hone muhwelelwa o ḓou bvela nnḓa u bvisela mbiti dzawe kha tshiendedzi tshwavho nga u posa matombo khatsho,” hu amba Vho Dathi.

Uya nga muambeli wa mapholisa Vhembe, mapholisa vho ḓou vhidziwa he tshiwo tsha itea hone, he vha ḓo thoma u sedzulusa ṅwananyana uyo, vha ḓou mu wana e na phanga khae. “O ḓou fariwa a vhewa fhasi ha ngado ya vhabebi vhawe sa izwi e muṱuku,” vha engedza.

Vho Richard Ramabulana vhane vhavha muraḓo wa Vhembe Concerned Group, tshiimiswa tshine tsha lavhelesana na u lwa na vhugevhenga kana dzi khakhthi nau alusa pfanelo dza vhadzulapo, vho ṱahisa u vhilaela havho nga u anda ha dzi khakhathi zwikoloni. “Ḓuvha ḽiṅwe na ḽiṅwe ri pfa nga ha mikhwa i songo ṱanganedzeaho zwikoloni, hune vhagudiswa vha tambudzana nga tshavho na uḓi dzhenisa kha zwiito zwa vhudzekani zwikoloni phanḓa ha vhaṅwe vhagudiswa. Zwa zwino vho no thoma na zwiito zwau ṱhasela vhadededzi. Ri tou khuthadzwa ngauri zwa zwino vha a farwa, zwine zwa ḓo kaidza vhaṅwe khau tevhedza zwiito izwo,” vha amba.

Date:13 September 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 167