Luvhanḓe lwa Waterval ahu athu u fhela nga murahu ha minwaha ya sumbe

Tshiṱori nga Thembi Siaga/GroundUp. Ṱhalutshedzo nga Khathutshelo Raliphaswa.

Vhadzulapo vha vhupo ha Waterval na zwisi zwa tsini vhari vho neta nga pfulufhedziso dza masipala wapo wa Makhado dzi sa anwi mitshelo, izwo ndi ngauri luvhanḓe lwavho lwa Waterval ahu khou sumbedza u fhela naho hono fhela minwaha ya sumbe hone mushumo u kati, hone ho no shumiswa masheleni a paḓaho fumbili-malo ya  miḽiyoni dzadzi rannda kha mushumo wa luvhanḓe ulwo lwa mitambo.

Luvhanḓe ulu lu wanala tsini na mavhengele tserekano a Elim, hone ho ḓadzwa nga vhadzulapo vha Mpheni na Makhongele. Nga ṅwaha wa 2017, mushumo wa luvhanḓe ulwo wo ḓou thoma he havha hu tshi khou vusuludzwa sa mudavhi uri huvhe luvhanḓe lwa mitambo huu itela u farela hone vhuṱambo hau fhambana u fana na miṱaṱisano ya mitambo. Mushumo uyo wa 2017 wovha wo lavhelelwa kana u vhetshelwa uri u ḓo fhedza minwedzi ya malo fhedzi, fhedzi na zwino nga murahu ha minwaha ya sumbe mushumo utshe kati.

Fhedzi sa zwezwi minwaha i tshi khou ya, u fhela ha mushumo wau fhaṱa luvhanḓe zwo ḓou dzulela u fhiriselwa phanḓa lunzhi. Vha masipala wapo navho vhovha vha sa khou bvela khagala zwavhuḓi nga ha masheleni ane o no shumiswa kha luṱa lwau thoma na lwa vhuvhili lwa mushumo uyu.

Mushumo wo lambedzwa nga kha vha gavhelo ḽa themamveledziso dza masipala (Municipal Infrastructure grant MIG), fhedzi na vha masipala wapo wa Makhado vho ḓou shumisa maṅwe a masheleni avho u lambedza mushumo uyu. Kha zwitatamennde zwa 2021/22 zwa masheleni zwa ṅwaha na ṅwaha, ho anḓadzwa zwauri ho no shumiswa masheleni a paḓaho miḽiyoni dza 12.54 rannda.

Thendela ya luṱa lwa vhuraru na lwau fhedza kha mushumo uyu yo ḓura masheleni a paḓaho miḽiyoni dza 28.4 rannda, hone ha engedzwa masheleni a miḽiyoni mbili nga murahu. Mugaganyagwama na zwiṅwe zwitatamennde azwi sumbedzi arali masheleni ayo o shuma kha luṱa lwa vhuraru fhedzi kana hovha hu masheleni o shumaho kha mushumo woṱhe. 

Mushumo luvhanḓeni ulo wo shumiwa lwa minwaha minzhi, hone vha tshi ita vha tshi ima mushumo nau ḓa na dzi khaedu dzau fhambana. Vhashumi vhe vha newa thandela dza mushumo uyu ndi vhe vha pomokana nga ha usa fhela ha mushumo uyu, hone vha masipala vho vhewa mulandu nga nṱhani hausa badela vhashumi vha mushumo uyu. Zworalo ho itiwa na pfulufhedziso dzauri mushumo uyu unga fhela lini naho zwi songo anwa mitshelo.

Nga ṅwedzi wa Nyendavhusiku 2022, muambeli wa masipala wapo wa Makhado, Vho Louis Bobodi, vho ḓou vhudza vha Limpopo Mirror zwauri masipala u khou fhedzisa thendela ine ya ḓo newa vhashumi vhaswa vhane vha ḓo shuma u fhedzisa mushumo wo salaho. Nga ṅwedzi wa Fulwi uno ṅwaha, vho ḓou amba zwauri mushumo wa zwino u kha luṱa lwau fhedzisela hone “luvhanḓe lu ḓo fhedza ṅwedzi wa Fulwi utshi fhela” - ayo hovha maipfi avho khavha Limpopo Mirror.

Fhedzi luvhanḓe ulo alungo fhela naho ṅwedzi wa Fulwi wo fhela, hone musi vha Limpopo Mirror vha tshi dalela luvhanḓe nga ḽa 22 Thangule, hovha husina vhashumi- hu na vhalindi fhedzi. Zwi vhonala vhudzulo kana zwidulo zwa khothe dza dza mitambo ya tennis, volleyball na basketball dzovha dzi tshi vho tshinyala hone hu tshi vho mela maḓaka.

“Arina vhupo ho fanelaho ha u tambela mitambo, hone ri fulufhela uri vha masipala vha ḓo vhea phanḓa khumbelo dzashu sa izwi ri na minwaha ro lindela uri luvhanḓe lwashu lu fhele,” hu amba mudzulapo Vho Prince Mageza.

Vho Clarence Majoko vhane vha bva kha Tsonga Chronicles, khamphani ya zwa vhuṱambo kha vhupo uho, vho vhudza vha Limpopo Mirror zwauri luvhanḓe luḓo ḓisa nyaluwo ya ikonomi ya khwine. “Hu ḓo kunga vhathu vhanzhi, zwine zwa ḓo engedza na mishumo ine ya ḓo sikiwa, zwihulu kha vhaswa vha vhupo hashu,” vha amba.

Vha Limpopo Mirror vho thoma u vhudzisa Vho Bobodi dzi mbudziso nga ha u fhela ha luvhanḓe nga ṅwedzi wa Fulwana mathomoni. Vha humbudzwa hafhu nga ḽa fumi-rathi Fulwana na ḽa fumi-mbili Fulwane, ro founa ra vha humbudza hafhu. Vho ḓou humbela uri hu rumelwe inwe khumbelo, zwe ra ḓo ita sa Limpopo Mirror. Ra tevhela hafhu nga ḽa fumbili-thihi Ṱhangule na ḽa fumbili-raru Ṱhangule, hu tshi katelwa mbudziso nga ha masheleni ono shumaho u swika tshifhinga itsho kha mushumo uyu. Nga ḽa fumbili-rathi Ṱhangule, vho fulufhedzisa u fhindula nga ḓuvha ḽi tevhelaho. Fhedzi musi vha Limpopo Mirror vha tshi founa nga ḽa fumbili-sumbe Ṱhangule, vho ḓou amba zwauri vha ngasi kone u fhindula mbudziso dze ra rumela.

Tshiṱori tsho ṅwaliwa na vha nyanḓadza mafhungo ya GroundUp. 

Date:10 September 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area. Thembi studied at the Tshwane University of Technology, where he completed his diploma in Journalism in 2021.

Read: 77