Vho Noria Mabasa na Vho Ester Sinyegwe vho huliselwa u vhulunga vhufa

Tshiṱori nga Silas Nduvheni. Ṱhalutshedzo nga Khathutshelo Raliphaswa.

Vha khoro ya lushaka ya zwa vhufa Afrika Tshipembe (NHC) vho hulisa vhafumakadzi vhararu vha mihaga vhane vha khou shela mulenzhe kha u vhulunga sialala. Vho huliswa kha vhuṱambo ho khetehaho he ha farelwa George Phadagi Town Hall fhaḽa Ṱhohoyandou nga Lavhuṱanu ḽa fumbili-raru Ṱhangule. 

Bembela ḽa ḓuvha ḽa vhafumakadzi ḽo farwa vhe na tshumisano na vha muhasho wa mitambo, vhutsila na mvelele Limpopo, na thikhedzo dze dza bva kha mimasiapala ya Thulamela, Collins Chabane na wa tshiṱiriki tsha Vhembe. Vhaeni vha khuliso kha vhuṱambo uhu hovha vhafumakadzi vhararu vhane ndi Vho Noria Mabasa, Mama Mamaila Leah Ngobeni, na Vho Tshimangadzo Ester Sinyengwe.

MEC wa muhasho wa mitambo, vhutsila na mvelele Vho Jerry Maseko vho ṱahisa nga ha vhundeme ha u vhulunga vhufa ha mvelele nga kha nḓila dzau zwi kanḓisa vha vhea. “Nḓivho ya vhafumakadzi avha ye vhai wana ndi ya maṱhakheni hone ndi ya ndeme. Tshiṅwe tsha zwithu zwine ravha na ṱhahelelo yatsho musi zwi tshi ḓa khau vhulunga vhufa ha mvelele dzashu ndi ṱhahelelo ya nḓila kana zwishumiswa zwau kanḓisa ra vhetshela mirafho i ḓaho. Ri fanela u vhulunga nḓivho dzavho, vhukoni, pfunzo na vhundeme ri tshi itela mirafho i ḓaho,” vha amba.

Vho Noria Mabasa vha minwaha ya fumalo-rathi (86) vho livhuwa zwihulu u vhoniwa kha mushumo wavho une vha na minwaha i paḓaho mahumi mavhili vhe khawo. Vho ṱahisa zwauri vha takalela u amba zwiṱori zwavho nga kha vhutsila havho, hu tshi katelwa u vhumba nau vhaḓa. Nga kha zwine vha bveledzwa, vha davhidzana nau funza mivhundu nga ha zwithu zwi fanaho na khakhathi dza mbeu na nḓila dza mvelele dzau tandula dzi khuḓano miṱani na kha u tshilasana na vhaṅwe vhathu.

Vho Tshimangadzo Sinyengwe (72), muimbi wa mafulufulu, vho huliswa nga kha u shela havho mulenzhe khau vhulunga nau alusa muzika wa sialala wa Tshivenda. Vha dovha hafhu vha funza mitshino ya sialala u fana na malende, tshigombela, tshifasi na matangwa. Vho Sinyengwe ndi mutumbuli wa zwigwada zwiraru zwa mitshino muvhunduni wavho. “Lufuno lwanga na lutamo kha mvelele na muzika wa sialala zwo swikisa khauri ndi dzhielwe nṱha, zwine zwa ḓo ṱuṱuwedza mirafho i ḓaho ngamurau uri vha bvele phanḓa nau vhulunga nau alusa mitshino na muzika wa sialala,” vha amba.

Vha NHC vho khwaṱhisedza zwauri vhuṱambo uhu ndi tshipiḓa tsha mushumo wau rangela zwine ha ḓovha na mushumo wa lushaka wau khwaṱhisedza nau vhona uri vhathu vha mivhunduni vha dzhielwa nṱha lwo fanelaho nga kha u vhulunga vhufa ha sialala ha shango ḽashu.

Date:09 September 2024

By: Silas Nduvheni

Read: 97