Tanaka Moyo u khou ḓi sikela mushumo ngau rengisa tshiṅwiwa tsha mutshelo wa Mazwilu

Ṱhalutshedzo ya tshiṱori nga Khathutshelo Raliphaswa.

Khaedu dza masheleni kha shango ḽa Zimbabwe dzi kombetshedza vhathu uri vha ḓi ṱoḓela nḓila dzau ḓi unḓa, afho hu katelwa na Tanaka Moyo wa minwaha ya fuiṋa we a ḓou ḓi wana e fhano Afrika Tshipembe a tshi ṱoḓa nḓila dza uḓi unḓa e ḓoroboni ya Musina. Tanaka ndi we a ḓou thoma na bindu ḽawe ḽine a ḽingo ḓowelea ḽa u rengisa tshiṅwiwa tshau itiwa nga mutshelo wa ḓaka. Mutshelo uyo u vhidzwa Masau nga TshiShona, ngeno kha luambo lwa Tshivenḓa u tshi vhidzwa Mazwilu.

Uya ngavha Healthline.com, mutshelo uyo wa mazwilu una mafulufulu, dzi vithamini, na mineraḽa ine yavha ya tshivhalo tsho linganaho, zwine zwa ita uri ivhe tshinwiwa tshavhuḓi mivhilini ya vhathu. Lusiabuvhi ulo vho ṱahisa zwauri naho Mazwilu ana tshivhalo tsha fhasi tsha dzi vithamini na mineraḽa ndi mutshelo une u na vithamini c ya nṱha ine yavha yavhuḓi mivhilini ya vhathu, hune yavha ya vhuṱhogwa khau engedza nungo na mafulufulu kha muthu. U dovha hafhu wavha na vithamini dzine dza shela mulenzhe kha uvha na vhulangi kha zwiendanungo.

Tanaka uri u takalela nḓila ine bindu ḽawe ḽa khou tshimbila ngayo . “Vhathu vhanzhi vha takalela mutshelo uyu wa ḓaka, zwihulu vhathu vhane vha bva kha ḽa Zimbabwe. Vhadzulapo vha Afrika Tshipembe vha khou thoma u ḓowela mutshelo uyu, hone u renga havho zwi khou anda ḓuvha ḽiṅwe na ḽiṅwe. Mitengo ya tsinwiwa itsho ndi ine ya tshimbila nga R10 na R20, athi lali na nḓala nga ḽone bindu ḽanga,” a amba.

O amba zwauri mutshelo uyo u aluwa khwine kha ḽa Zimbabwe, zwihulu kha vhupo ha Mazarabani kha ḽa Mashonaland. “Vhadzulapo vha fhano ndi vhone vhane nda renga khavho mutshelo uyu nda rengisa zwiṱaraṱani zwa fhano Musina. Ndi ita khuwelelo kha vharathu na khaladzi dzanga vhane ra bva roṱhe kha ḽa Zimbabwe uri arali vha tshi takalela u ḓa u dzula Afrika Tshipembe avha ḓe ngeno nga nḓila dza mulayo . Izwi ndi zwi amba ngauri arali vha ita ngauralo vhavha vho vhofholowa u tshila zwavhuḓi nau shuma vha sa thithisiwi nga vhathu sa izwi zwi tshi vha ita tshipiḓa tsha tshitshavha tsha Afrika Tshipembe,” a amba.

Date:05 September 2024

By:

Read: 87