Chauke u khou di sikela dzina nga vhutsila hawe ho khetheaho

Tshiṱori nga Thembi Siaga. Ṱhalutshedzo nga Khathutshelo Raliphaswa.

Mutsila ane a khou takuwa Dennis Chauke a bvaho Waterval, ane a ḓivhea khwine nga ḽa Mr Clean, u khou vhonala a tshi khou ḓi sikela dzina nga kha vhutsila hawe, vhune a fulufhela zwauri vhu ḓo kunga vhaendelamashango vha bvaho kha mashango a nnḓa u mona na ḽifhasi. Vhafuni/vhatikedzi vha mishumo yawe vha shumisa vhutsila hawe u nakisa dzi nnḓu dzavho nau ḓi sikela fhethu havhuḓi ha uḓi mbvumbvusa.

Vhutsila ha Chauke vhu takalelwa nau huliswa nga vhanzhi, hune vhunzhi havho vha ita nau vhudza vhaṅwe nga ha vhutsila hawe nau ṱahisa u funa havho u vhona vhutsila hawe vhu tshi bvela phanḓa nau aluwa. O amba zwauri vhafuni vha zwithu zwa vhutsila vha kungea zwihulu nga vhutsila hawe nau khethea ha vhutsila hawe, hune a shumisa maitele au fhambana na zwine vhaṅwe vha vhatsila vha shumisa one.

Lwendo lwa Chauke kha zwa vhutsila lwo thoma nga ṅwaha wa 2021 musi a tshi khou shuma Japie Stander Education fhaḽa Johannesburg. Nga hone uvha na mishumo i songo tou ḓalesaho, o ḓou wana tshifanyiso kha iṅwe ya bugu dzavho he a ḓou tshi ola. Afho ndi he ha takuwa dzangalelo ḽawe ḽa zwa vhutsila, he a wana thikhedzo kha mufunani wawe, Murendeni Dzivhuho, e avha thikho na ṱhuṱhuwedzo khae. Zworalo Chauke u dzulela u mu livhuwa nga thikhedzo ye a mu sumbedza yone kha lwendo lwawe lwa zwa vhutsila. .

“Ndi livhuwa thikhedzo i bvaho kha vharengi vhanga, vhane vha dzulela u hulisa nau renda vhukoni hanga ha vhutsila na nḓila ine vha dzulela u nṱoḓela vhaṅwe vharengi vhafuni vha zwithu zwa vhutsila vhune ndavha khaho. Ndi tenda zwauri ḽiṅwe ḓuvha, vhutsila hanga vhu ḓo kunga vhunzhi ha vhaendelamashango. Ndi tama u alusa nau ṱuṱula vhutsila hanga ngau ola zwifanyiso zwihulu zwine zwa sumbedza vhuḓi ha shango ḽashu.”

Urinaho a tshi ṱangana na dzi khaedu dzau fana na ṱhahelelo ya zwishumiswa, Chauke u dzulela u ḓi imisela kha vhutsila hawe. O amba zwauri ndoro yawe ndi uvha muṅwe wa vhatsila vhau ḓivhiwa u mona na ḽifhasi lothe, atshi sumbedzisa nga ha vhufa havhuḓi ha Afrika Tshipembe. “Ndivho yanga ndi u imelela Afrika Tshipembe nga kha vhutsila, ndi tshi alusa vhutsila ha Afrika Tshipembe zwine zwa ḓou vhoniwa u mona na ḽifhasi, nau ṱuṱuwedza vhaṅwe nga lwendo lwanga. Ndi ṱoḓa u sika vhutsila vhune avhu fheleli luvhondoni fhedzi ha davhidzana na vhathu,” a amba.

Date:04 September 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 78