Vhabebi vha vhana vhari ahu dzhiiwe maga a ndaṱiso

Tshiṱori nga Kaizer Nengovhela. Ṱhalutshedzo nga: Khathutshelo Raliphaswa.

Vhabebi vha vhagudiswa vha tshikolo tsha nṱha tsha Sinugani tshine tsha wanala Hamagau, vha khou gwa zwauri hu dzhiiwe maga a shishi kha vhagudiswa vhane vha tambudza vhaṅwe afho tshikoloni. Izwi zwi khou tevhela zwe ha ḓou leleḓa vidio kha zwileludzi zwa vhudavhidzani, hu tshi sumbedza mugudiswa wa murole wa vhuṱahe a tshi khou tambudza vhaṅwe vhagudiswa vhavhili afho tshikoloni nga hone u vha ṱhasela. 

Kha vidio iyo, ye ya ḓou anḓadzwa kha Facebook, mugudiswa uyu o vhonala a tshi ṱhasela avho vhavhili nga hone u vha pomoka zwauri vho dzhia muṅwe mugudiswa wa ṅwananyana e avha a tshi khou seisana nae lwa vhafunani. Hu pfala zwauri izwi asi u thoma zwi tshi itea zwine mugudiswa uyo a ita zwau tambudza vhaṅwe vhagudiswa ngae.

Nndwa iyo, ine hapfi yo thoma ngomu tshikoloni nga ḽa fumi-ṱhanu Ṱhangule ṅwaha uno, yo kaidzwa zwihulu. Vhabebi vha vhana vhe vha ṱhaselwa vha tambudzwa vhari vha sola vhulangi ha tshikolo uri vho kundelwa u langa tshiimo tsha u tambudzwa ha vhaṅwe vhagudiswa tshikoloni itsho. Nga tshifhinga tsha muṱangano we wa ḓou farelwa tshikoloni, vhaṅwe vhabebi vho humbela uri mugudiswa e avha a tshi khou tambudza vhaṅwe a imiswe u ḓa tshikoloni, ngeno vhaṅwe vhabebi vho amba zwauri zwithu zwi songo swikiswa afho. Vhabebi vha khou ṱoḓa uri vha vhulangi ha tshikolo vha dzhie maga a khwine khau tandulula thaidzo dzau tambudzana tshikoloni.

Mubebi, vhane vho humbela usa bulwa dzina, vho amba zwauri avhango takadzwa nga nḓila ye vha vhulangi ha tshikolo vha dzhiela zwithu fhasi. “Sa vhulangi ha tshikolo avha tei u dzhiela fhasi mafhungo au tambudzana ha vhagudiswa ngomu tshikoloni. Nga murahu ha tshiwo, ṅwana wanga na muṅwe mugudiswa vho ḓou vhidzwa ofisini dza tshikolo vha vhudzwa uri vha farane zwanḓa vha hangwelane. Ndi hafha ndo sinyuwa nau dzheniwa nga nyofho uri ṅwana wanga a ngavha a songo tsireledzea tshoṱhe tshikoloni,” vha amba.

Vho Lucky Malema, vhane vhavha muraḓo wa komiti ya muvhundu, vho amba zwauri ndi zwa ndeme uri hu dzhiiwe maga a khwine u kaidza u tambudzana zwikoloni nau lulamisa maitele aya. “Arali ra sa dzhenelela hu tshe zwino, vha ḓo takalela zwau tambudzana nau lwa. Ri kholwa uri vhagudiswa vha ḓo amba nga ha zwiito zworaliho sa izwi zwi tshi thithisa vhupo havhuḓi kha vhagudiswa na ngudo dzavho,” vha amba.

Vho Malema vho engedza zwauri vha ḓo thoma fulo ḽau kaidza nau amba nga ha masiandaitwa au tambudzana zwikoloni, vhugevhenga, na maitele asi avhuḓi kha vhaṅwe vha vhugudiswa. “Ri dovha ri kha fulo heḽi ri phanḓa ha zwikolo zwa mivhundu ya tsini u vhuya u swika ri tshi vhona tshanduko kha sia ḽau tambudzana na maṅwe maitele ane a sia vhaṅwe vhagudiswa vha songo tsireledzea,” vha amba.

Muambeli wa muhasho wa pfuzno, Vho Mosebjane Kgafe, vho amba zwauri vhadzulapo vha fanela u shuma vho farana zwanḓa uri vha ambe nga ha fhungo ḽau tambudzana. “Musi ṅwana a tshi pfa a tshi khou tambudzwa, u fanela u zwi vhudza vhahulwane, uri a wane thuso yo teaho uzwi imisa,” vha amba. Vho engedza zwauri sa muhasho vha ḓo ṱoḓisisa kha tshiwo tshau tambudzwa ha vhagudiswa tshikoloni tsha Sinugani.

Date:02 September 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 144