DSD yo shumisa R271 miḽiyoni u thusa madzangano Limpopo

Tshiṱori nga Anton Van Zyl. Ṱhalutshedzo nga Khathutshelo Raliphaswa.

Vha muhasho wa mveledziso ya tshitshavha fhano Limpopo (LDSD) vho vhetshela thungo masheleni a swikaho R271.7 miḽiyoni ane vha ḓo lambedza madzangano uri vha thuse vhathu vha shayaho kha ṅwaha wa muvhalelano wa 2023/24. Kha tshiṱiriki tsha Vhembe fhedzi, vha muhasho vho tikedza madzangano a paḓaho maḓana mavhili ane ha shumeli malamba.

Vha nyanḓadza mafhungo ya Limpopo Mirror vho ḓou sengulusa magavhelo e a netshedzwa madzangano asa shumeli malamba vho lavhelesa zwidodombedzwa zwe zwa ḓiswa nga vha DSD ya Limpopo, zwi tshi tevhela zwe vha ḓou wana thendelo yau dzhia zwidodombedzwa. Khumbelo yovha ya zwidodombedzwa zwa magavhelo oṱhe e a badelwa nga vha LDSD kha minwaha ya vhukati ha 2014 na 2024, fhedzi zwa zwino vho ḓou netshedzwa zwidodombedzwa zwa minwaha ya muvhalelano wa 2023 na 2024.

Nga kha u lavhelesa vhe vha vhuyelwa kha minwaha iyi mivhili, zwi khagala uri hutshe na thoḓea ya masheleni u mona na vunḓu ḽa Limpopo.

Kha masheleni e a vhonala o netshedzwa madzangano, tshiṱiriki tsha Vhembe ndi vhane vha vhonala vho wana masheleni manzhi, he vha wana R57.06 miḽiyoni uya kha madzangano ane a ḓisela tshumelo kha vhathu na mivhundu uya ngau fhambana.

Tshiṱiriki tsha Mopani vho wana R55.88 miḽiyoni ngeno tshiṱiriki tsha Waterberg vho wana masheleni a paḓaho R44.55 miḽiyoni. 

Masheleni a paḓaho R50 miḽiyoni o shumiswa kha dzi senthara dza u swikela khadzo. Yo ṱanganyiwa na R30 miḽiyoni ye ya shumiswa kha senthara dza zwa vhaswa, izwi zwi sumbedzisa zwauri phesenthe dzi swikaho furaru (30%) ya mugaganyagwama wa LDSD ndi ine yovha yo lavhelesana na zwine zwa kwama vhaswa.

Ṱhoḓea yau shumela kana u thusa vhaaluwa ndi ine yo sumbedziswa afho, he masheleni a swikaho R17.52 miḽiyoni yo shumiswa kha tshumelo dza vhaaluwa, na R12.35 miḽiyoni khau thusa mahaya ane a lavhelesana kana u thusa vhaaluwa. Madzangano ane a shumana na zwau thusa vhathu mahayani o netshedzwa R22.42 miḽiyoni. 

Miṅwe ya mishumo ye ya ḓou netshedzwa masheleni ndi ine ya sedzana kana u thusa vhapondiwa vha zwiwo zwo yaho ngau fhambana, zwihulu vhapondiwa vha khakhathi dzau tambudzana zwa mbeu. Avho ndi vhane vho wana masheleni a swikaho R20.72 miḽiyoni.

Magavhelo mahulwane

Mutevhe wa madzangano kana zwiimiswa zwafumi vhe vha wana masheleni hu katelwa Abraham Kriel Children’s Home ya fhaḽa Modimolle vhe vha wana R9.13 miḽiyoni khau lambedzwa ha 2023/24, zwine zwa tou fhira R8.73 miḽiyoni ye vha i wana ṅwaha wo fhiraho.

Vha Takalani Children’s Home ire Siloam ngei Nzhelele vho wana R4.33 miḽiyoni u thusa kha thoḓea dzavho, hu tshi vhambedzwa na R4.25 miḽiyoni ye vha i wana ṅwaha wo fhiraho.

Tshiṅwe tshiimiswa tshe tsha wana masheleni ndi tshiimiswa tsha Holy Family Care Centre tsha vhaswa tshine tsha wanala Maruleng ngei tshiṱirikini tsha Mopani, vhe vha wana R3.78 miḽiyoni, ngeno vha Martha Hofmeyr Polokwane vho wana R3.44, avho ndi vhane tshumelo dzavho dza lavhelesana na vhaaluwa.

Vha Epilepsy Home for Disabled kha masipala wa Elias Motsoaledi vho wana masheleni a swikaho R3.17 miḽiyoni, ngeno vha Noah’s Ark Children’s Home ngei Tzaneen vho netshedzwa R2.7 miḽiyoni. 

Senthara dzau ṱhogomela vhana Vhembe

Senthara dza fusumbe-malo kha tshiṱiriki tsha Vhembe dzine ha swikelwa khadzo vho wana ndambadzo ubva kha vha LDSD. Masheleni e a kovhekanywa senthara idzi dzoṱhe ndi R12 miḽiyoni. Mishumo mivhili, Takalani Children’s Home (R4.33 miliyoni), na CWM (The Christian Women Ministries) Children’s Project ire Musina (R1.62 miliyoni), vho wana masheleni au shumisa kha dzi senthara dza vhaswa.

Ndambadzo i ḓovha yo takalelwa vhukuma CWM. Nga ṅwaha wa 2021, ho ḓou ambiwa zwauri senthara iyo yovha i tsini nau valwa sa izwi vha LDSD vhovha vho imisa zwau i lambedza, izwo zwovha zwo itwa nga nwambo wauri vhovha vha songo vusuludza uḓi ṅwalisa havho nga tshifhinga.

Nga tshifhinga itsho, senthara yovha i tshi ṱhogomela vhana vha 41. Zworalo vha CWM vho ḓou tandulula khaedu yavho, he nga ṅwaha wa 2022/23, vha ḓou netshedzwa masheleni a swikaho R1.42 miḽiyoni. 

VEP dzedza thuswa u fhelisa u tambudza ha vhathu

Hu na zwiimiswa zwi paḓaho fumbili nthihi zwine zwa lavhelesana na vhapondiwa vhau tambudzwa dzine dzavha hone fhano Vhembe. Kha izwi, tshihulwane tshi vhonala hu tshine tsha wanala Ṱhohoyanḓou, he vha Ṱhohoyanḓou VEP vha ḓou wana R587 599. Avho vhaṅwe vho wana ndambadzo dzi swikaho R300 000, ine ha tendiwa zwauri yo thusa khau thusa fhano na fhaḽa.

U lwa na tshitzili tsha HIV/AIDS ndi zwine zwa khou vheiwa phanḓa, hone zwiimiswa zwi paḓaho fumbili fhano Vhembe zwono wana magavhelo ubva kha DSD. Madzangano mavhili vhe vha wana masheleni manzhi hovha vha Tshiendeulu Home-Based Care na Pfananani Home-Based Care & Aids Awareness, he vhoṱhe vha wana R478,466 tshiimiswa thithihi tshithihi.

U tambudzwa ha zwidzidzivhadzi zwi sala zwi tshe khaedu khulu kha vhupo ha Vhembe, hone madzangano a fumi vhane avha shumeli malamba vhane vha sedzana na khaedu idzi vho ḓou wana thikhedzo. Masheleni ea netshedzwa zwiimiswa izwi o vha e a vhukati ha R100,000 na R285,400, ye ya netshedzwa vha Xalamuka Rehabilitation kha vhupo ha Collins Chabane.

Senthara idzo mbili vho wana ndambadzo fhasi ha ṱhoho ya “Behavioural Change.” Vha Nyavhani Home-Based Care na Zwoitwa Community Project vho wana R1.72 miḽiyoni. Vhuvhili ha senthara idzo ndi dzine dza wanala kha vhupo ha masiapala wa Thulamela.

Tshelede iya kule

Senthara ya Zwoiitwa ine ya wanala Tshitereke, khiḽomithara dza 15 devhula ha Ṱhohoyanḓou. Sentahra iyo i ṱhogomela vhana vha 167 nau vha ṋea zwiḽiwa ḓuvha ḽiṅwe na ḽiṅwe. Nga nnḓa ha u ṱhogomela vhana, senthara iyo i dovha hafhu ya ṱhogomela vhathu vhane vha shaya. Senthara iyo vha tshi bikela vhathu zwiḽiwa luvhili ḓuvha ḽiṅwe na ḽiṅwe kha vhashayaho vhuponi uho, vha dovha hafhu vha thusa vhathu avho nga mishumo ya hayani ngau fhambana hayo.

Musi vha Limpopo Mirror vha tshi dalela senthara nga Lavhuvhili ḽa vhege yo fhiraho, mulangi Vho Rejoice Phuluwa vho hana u fhindula. Vho amba zwauri avhango tendelwa u amba na vhathu vha nyanḓadza mafhungo.

Huṅwe he vha Limpopo Mirror vha dalela, ndi Takalani Children’s Home ngei Siloam. Senthara iyo vho wana magavhelo mavhili, R3,78 miḽiyoni ya senthara yau swikelwa hone na R550.000 ya tshumelo dza miṱa.

Mulangi wa senthara, Vho Dzivhuluwani Mudau, vho ṱalutshedza zwauri vha ṱhogomela vhana vha fusumbe. “Vha DSD vha ri ṋea masheleni ane khao ṅwana muṅwe na muṅwe u wana R150 nga ḓuvha. Tshelede i netshezwa ho sedzwa vhana vhane vhavha hone. Kha tshelede iyo, rine ri i shumisa u rengela vhana yunifomo na zwiṅwe zwishumiswa zwa ḓuvha ḽiṅwe na ḽiṅwe. Tshelede i badelwa nga murahu ha minwezi ya rathi miṅwe na miṅwe nga murahu hauri ri ite khumbelo nau khwaṱhisedza nomboro ya vhana vhane vhavha hone sentharani,” vha amba.

Vho Mudau vho amba zwauri ndi Vhuḓifhinduleli havho hauri vha vhone uri vhana vha khou ṱhogomelwe. Vho engedza zwauri naho tshelede iyo i bvaho kha vha DSD i tshi thusa, aingo lingana u swikelela khau vhona uri zwoṱhe zwine vhana vha ṱoḓa zwia ṱhogomelwa. “Zwi ḓura masheleni a fhiraho R6 miḽiyoni u tshimbidza senthara hei ṅwaha muṅwe na muṅwe, ri ḓi tika zwihulu nga hone u lambedzwa. Ri tshe na ṱhahelelo ya zwithu zwinzhi,” vha amba.

Nḓila ye vha DSD LIMPOPO vha tevhedza milayo

Kha sia ḽa milayo ya muhasho wa mveledziso ya vhathu, muhasho wa lushaka na mihasho ya vunḓu vha fanela u anḓadza ripoto ya u fhela ha ṅwaha ya mbadelo dzoṱhe dzine dzo badelwa kha vhudavhidzani ha muhasho uyo husa athu u fhela minwedzi miraru nga murahu ha ṅwaha wa muvhalelano.

Vha Limpopo DSD a vhana dzi ripoto nga ha mbadelo dza madzangano au ṱhogomela vhathu zwa zwino kha vhusiabuvhi havho. Vha na dzi ripoto fhedzi idzo adzina zwidodombedzwa zwine zwa khou ṱoḓea.

U wana zwidodombedzwa nga ha magavhelo, vha nyanḓadza mafhungo ya GroundUp vho rumela PAIA khumbelo ya kha DSD nga ḽa ṱahe Shundunthule.

Nga ḽa fumbili-iṋa Fulwi, vha muhasho vho rumela zwidodombedzwa zwo khakheaho kana zwisi zwone, he zwa ḓou vhonwa nga tshihaḓu, vha muhasho vho ḓou ita khumbelo yau engedzelwa maḓuvha a 30 uri vha ḓo konou fhindula.

Nga ḽa rathi Ṱhangule, Vho Nkanyane vho ḓou ḓisa zwidodombedzwa zwa ṅwaha wa muvhalelano wa 2023 na 2024 fhedzi azwina zwidodombedzwa zwine zwa khou ṱoḓea.

Date:22 August 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 107